Мороз Аннэ игъэхъагъэхэм уарыгушхонэу щыт. Апэрэ классым къыщегъэжьагъэу «5» за­кIэкIэ еджэ, илъэс къэс предмет зэфэшъхьафхэмкIэ олимпиадэхэм ахэлажьэ ыкIи текIоныгъэ къащыдехы. Медицинэм ищыIэныгъэ гъогу зэрэрипхыщтым къыхэкIэу химиемрэ био­логиемрэ нахь игъэкIотыгъэу зэригъэшIэнэу ыублагъ.

— ЦIыфхэм сишIуагъэ яз­гъэ­кIынэу сыфай. Медицинэм сызыфэщагъэр бэшIагъэ, сянэ пе­диатрэу сымэджэщым щэлажьэ, сицIыкIугъом къыщегъэ­жьагъэу сызыдищэзэ бэ слъэгъугъэр, уз зэфэшъхьафхэр зэ­­рэбгъэхъужьыщтыри сшIэ сыхъугъ. Лъэныкъоу къыхэсхыщтым джыри сегупшысагъэп, ау терапевт сэнэхьатым сыгукIэ нахь сыфэщагъ. Охътэ лые сиIэ хъумэ медицинэм фэгъэхьыгъэ тхылъхэм е сериалхэм сяплъы­ныр сикIас, — еIо Аннэ.

Пшъэшъэжъые нэутхэр гъэ­рекIо кIэлэцIыкIу гупчэу «Артекым» щыIагъ. Джыри «Большая перемена» зыфиIорэм хэ­лэжьэн мурад иI. ШIэныгъэу рагъэгъотырэмкIэ икIэлэегъа­джэхэм зэрафэразэр ыкIи ахэм анахь дэгъу щымыIэу зэрилъы­тэрэр Аннэ къытиIуагъ.

Мыгъэ я 11-рэ классыр къэзыухырэ Александр Уваровыр еджэнымкIи спортымкIи апэ ит. ЗекIом краеведческэ IофшIэным илъэс пчъагъэрэ пылъыгъ, апэрэ разряд иI. Апэрэ классым къыщегъэжьагъэу «5» закIэкIэ еджэ, гъэхъагъэу иIэхэм яшIуа­гъэкIэ гъэрекIо «Полярисым» щыIагъ. Аужырэ сменэм щызэхащэгъэ Iофтхьабзэм хэлэ­жьагъ ыкIи Джэджэ районым къикIыгъэ пшъэшъэжъыеу Кристинэ игъусэу агъэхьазырыгъэ проектым текIоныгъэ къырихыгъ. Ащ иш1уагъэк1э К. А. Тимирязевым ыцIэ зыхьырэ Урысые къэралыгъо аграрнэ университетым фэгъэкIотэнхэр и1эхэу чIэхьан амал къыраты. Ащ зыфегъэ­хьазыры.