Непэрэ мафэм гурыт еджапIэм Iоф щызышIэхэрэм щысэ зытырахэу, уп­чIэжьэгъу зыфэхъунхэу Iутхэм ащыщ Хьаджым Натусе. КъэкIорэгъэм илъэс 50 хъущт мы еджапIэм Iоф зыщишIэрэр. Пэублэ классхэм якIэлэегъаджэу илъэсипшI фэдизрэ Iоф ышIагъэу урысы­бзэмрэ литературэмрэкIэ ригъаджэхэу ыублагъ. Илъэс зэкIэлъыкIохэм пащэм пIуныгъэ чIыфэхэмкIэ игуадзэу Iоф ышIагъ. Джы адыгабзэр арегъэхьы. Сыдигъуи ригъэджэгъэ кIэлэеджакIохэр яшэн-зекIуакIэкIи, яшIэныгъэхэмкIи нэмыкIхэм къахэщых. Мы лъэхъаным класс ыIыгъэп, ау аужырэ классэу зипэща­гъэм исыгъэ нэбгыритфымэ дышъэ медаль къалэжьыгъагъ.

— УищыIэныгъэ гъогу зэппхыщт сэнэхьатыр угукIэ къыхэпхыгъэ зыхъукIэ гухахъо хэбгъуатэзэ уиIофшIэн бгъэцэ­кIэщт. СицIыкIугъом къыщегъэжьагъэу сыгукIэ сыфэщэгъагъ. Езгъэджэрэ кIэлэеджакIохэм ягъэхъагъэхэм сагъэгу­шхо, гъогу тэрэз сызэрэтетыр къызгу­рэIо. Шъыпкъэ, укIэлэегъэджэныр IэшIэ­хэп, сабыим шIэныгъэ ебгъэгъотын за­къор арэп, щыIэныгъэ гъогу занкIэ тепщэным пае IофшIэнышхо тэгъэцакIэ. Нэбгырэ пэпчъ шъхьафэу Iоф дэпшIэн фае, шIэхэу материалыр къызыгурыIуи, нахь къин къызыфэхъуи ахэт. КъызыгурымыIорэм охътэ нахьыбэ етэгъэхьы, дэгъоу еджэрэм тылъымыIэсышъоу къы­хэкIы. Непэ зыкI къэралыгъо ушэтынхэм зэрифэшъуашэу афэдгъэхьазырыныр типшъэрылъ шъхьаI, ащ тыдэлажьэ.

Си­кIэлэеджакIохэм илъэс пчъагъэрэ яз­гъэ­шIагъэр къаушэтыжьэу, балл ин къы­захьыкIэ, шIухьафтын лъапIэу сэ­лъытэ, — еIо Хьаджым Натусе.

Натусе иIофшIэн шIу елъэгъу, зыщищыкIагъэм пхъэшэн елъэкIы, сэмэркъэу дахи адешIы. ШIэныгъэ дэгъу аритынымкIэ екIолIэкIэ шъхьафхэр къегъотых. Мы бзылъфыгъэр ящысэтехыпIэу бэмэ кIэлэегъэджэ сэнэхьатыр зэрагъэгъотыгъ, ышыпхъуи ежь игъогу рыкIуагъ, ыш тарихъымкIэ кIэлэегъаджэу илъэс пчъагъэ хъугъэу Iоф ешIэ. Ригъэджэгъэ нэбгырэ пчъагъэми а сэнэхьатыр къыхахыгъэу ацIэ къыриIуагъ.

— ТиеджапIэ чIэсхэм янахьыбэр урысых е нэмыкI лъэпкъхэм къахэкIыгъэх. Ахэм программэм елъытыгъэу адыгэ­бзэ литературэр урысыбзэкIэ зэ­рагъашIэ. Адыгэу къакIохэрэм нахь игъэкIотыгъэу яныдэлъфыбзэ зэрагъэшIэ­нэу фаехэ зэхъум, классхэр агощыгъэх. Къа­сIомэ сшIоигъу сабыйхэм адыга­бзэр зэрагъэшIэнэу зэрэфаехэр, урыс кIэлэцIыкIу-хэри къыскIэрэхьэх, «сэри зэзгъэ­шIэнэу сыфай» аIо, — къеIуатэ ти­гу­щыIэгъу.

Хьаджым Натусе сыд фэдэ къиныгъо ыпэ къикIыгъэми, зыкъитыгъэп, зэрифэшъуашэу иIофшIэн ыгъэцэкIагъ. Ар къеушыхьаты щытхъуцIэу къыфагъэшъошагъэхэм. Ахэм ащыщых Просвещением и Отличник зэ­рэхъугъэр, 2019-рэ илъэсым «Адыгеим и Щытхъузехь» зыфиIорэ медалыр къыратыгъ, бэмышIэу Адыгеир илъэси 100 зэрэхъурэм фэгъэхьыгъэ медаль къыхалъхьагъ. Джы «УФ-м изаслуженнэ кIэлэегъадж» зыфиIорэ цIэр къыратынэу тхылъхэр агъэ­хьазырых.