Iофтхьабзэу «ЗэкIэ ТекIоныгъэм пай!» зыфиIорэм къыдыхэлъытагъэу шIушIэ марафон тыгъуасэ Адыгеим щызэхащагъ.

Урысые народнэ фронтыр Iофтхьабзэм кIэщакIо фэхъугъ, Адыгэ къэралыгъо университетым щырагъэкIокIыгъ. ХэушъхьафыкIыгъэ дзэ операцием хэлажьэхэрэм IэпыIэгъу афэхъу­гъэныр ыкIи шъхьафит ашIыжьыгъэ чIыпIэхэм ащыпсэухэрэм адеIэгъэныр ары пшъэ­рылъ шъхьаIэу зэхэщакIохэм зыфагъэуцужьыгъэр.

Iофтхьабзэм хэлэжьагъэх Адыгэ Республикэм и ЛIышъхьэрэ министрэхэм я Кабинетрэ я Администрацие ипащэу Владимир Свеженец, АР-м и Къэралыгъо Совет — Хасэм идепутатхэр, министрэхэм я Кабинет хэтхэр, федеральнэ ыкIи муниципальнэ къулыкъу зэфэшъхьафхэм ялIыкIохэр, ветеран­хэр, Къыблэ федеральнэ шъо­лъырым и Зэхэт стратегическэ командование, общественнэ организацие зэфэшъхьафхэм ялIыкIохэр, нэмыкIхэри.

АР-м и ЛIышъхьэу КъумпIыл Мурат ыцIэкIэ Iофтхьабзэр къы­зэIуихыгъ Владимир Свеженец. ТидзэкIолIхэм ыкIи шъхьафит ашIыжьыгъэ чIыпIэхэм ащыпсэухэрэм IэпыIэгъу афэхъугъэныр, ТекIоныгъэр къэгъэблэгъэгъэныр ищыкIэгъэ шъыпкъэу зэрэщытхэм АР-м и ЛIышъхьэ къызэрэк|игъэтхъырэр ащ къыIуагъ.

— ТекIоныгъэр къыдэхыгъэным хэлажьэхэзэ, патриотизмэм зегъэ­ушъомбгъугъэным ыкIи Урысыем щыпсэурэ лъэпкъ зэ­фэшъхьафхэм язэкъотныгъэ гъэ­пытэгъэным нэбгырэ пэпчъ иIа­хьышIу къыхелъхьэ, — къы­Iуагъ Владимир Свеженец.

ХэушъхьафыкIыгъэ дзэ операцием хэлажьэхэрэм лIыхъужъ­ныгъэу зэрахьэрэр, пшъэры­лъэу къафагъэуцухэрэр зэрифэшъуа­шэу зэрагъэцакIэхэрэр В. Све­женец къыхигъэщыгъ. Нэужым Владимир Путиным игущыIэхэр къэзэрэугъоигъэхэм агу къыгъэ­кIыжьыгъ: «Непэ чIыпIэу тызэ­рытыр тилъэпкъ, Урысыем ита­рихъ, къыткIэхъухьэрэ лIэуж­хэм янеущрэ мафэ къэтыухъу­мэнхэм афэгъэхьыгъ. ТицIыф­хэм яеплъы­кIэ ыкIи апсэ зэ­щызгъэ­къон гу­хэлъ зиIэхэм тапэшIуе­кIон фае».

ШIушIэ Iофтхьабзэм хэлэжьагъэхэм зэрафэразэхэр В. Свеже­нец къыIуагъ. Адыгеим щаугъоигъэ ахъщэ IэпыIэгъумкIэ ящыкIэгъэщт Iэмэ-псымэхэр, щыгъын фабэхэр, квадрокоптерхэр, Iэзэгъу уцхэр ащэфыщтых.

Урысыем и ЛIыхъужъэу, Адыгэ Республикэм и Къэралыгъо Совет — Хасэм и Тхьаматэ игуадзэу Цэй Эдуард нэужым гущыIэ ратыгъ. Урысыем и Президент иунашъо зэрэдырагъаштэрэр ащ къыIуагъ. Ветеранхэм ахэлъ орденхэр къазэрахатхъыхэрэм, саугъэтхэр зэрэIуахыжьхэрэм, бзылъфыгъэ­хэр, сабыйхэр зэраукIыхэрэм, цIыфхэр псаоу зэрагъэстыхэрэм, фашизмэм апэшIуекIогъэн зэрэ­фэягъэр ащ къыIуагъ. Апэрэ мафэм къыщегъэжьагъэу тидзэ­кIолIхэм адырагъаштэ ыкIи ама­лэу яIэмкIэ IэпыIэгъу афэ­хъух. Депутатхэм аугъоигъэ мылъкур фондым зэрэрагъэхьагъэр, тапэкIи хэ­ушъхьафыкIыгъэ дзэ операцием хэлажьэхэрэм ыкIи яунагъохэм IэпыIэгъу зэрафэхъущтхэр къы­хигъэщыгъ.

Народнэ фронтым ишъолъыр къутамэу Адыгэ Республикэм щыIэм ипащэу Юрий Гороховым непэ лIыхъужъныгъэ зезыхьэ­хэрэм IэпыIэгъу ягъэгъотыгъэным, цIыфхэр зэракъотхэр зэхашIэным мэхьанэшхо зэриIэр къыIуагъ.

— Республикэм щыпсэухэрэм яшIуагъэкIэ IэпыIэгъу тонн 20-м ехъу тыугъоигъ. Ахэм ахэлъых щыгъын фабэхэр, Iэзэгъу уцхэр, шхынхэр, нэмыкIхэри. КъыткIэхъухьэрэ лIэужхэм атхыгъэ письмэхэри ахэлъых. Джащ фэдэу къаугъоигъэ ахъщэмкIэ джыри анахь ящыкIэгъэщт Iэмэ-псымэхэр тщэфыщтых, —къыIуагъ Юрий Гороховым.

ХэушъхьафыкIыгъэ дзэ операцием хэлажьэхэмрэ цIыфхэмрэ IэпыIэгъу язы­гъэкIырэр бэ. ГущыIэм пае, Мыекъуапэ дэт ательем дзэкIолIхэм ащыгъыщт щыгъын фабэхэр ыпкIэ хэмылъэу афедых, унагъо горэм лъэпэдхэр ыкIи Iалъэхэр афехъых, унэгъо ныбжьыкIэм джэгум къафырахьылIэгъэ ахъщэр фондым къыритыгъ, IэпыIэгъу языгъэкIы зышIоигъохэм яспискэ кIыхьэ. Джащ фэдэу госпиталым чIэлъхэм агу къыдащэеным пае концертхэр къафатых.

Непэ кIорэ хэушъхьафыкIыгъэ дзэ операцием тинеущырэ мафэ зэрелъытыгъэр, тызэкъотэу, амалэу щыIэмкIэ дзэкIолIхэм IэпыIэгъу тафэхъун зэрэфаер къыIуагъ Адыгэ Республикэм иветеранхэм я Совет итхьаматэу Къоджэ Аслъан.

Iофтхьабзэм къыдыхэлъытагъэу «ЗэкIэ ТекIоныгъэм пай!» зыфиIорэ фондым исчет ахъщэр зэрэрагъэхьащт шIыкIэр къаIуагъ. Шъолъыр пэпчъ и QR-кодкIэ ар аугъоинэу агъэнэфагъ. ШIоигъоныгъэ зиIэхэр хэлэжьэнхэ алъэкIыщт.

Iофтхьабзэм икIэух къэзэрэугъоигъэ­хэм концерт къафатыгъ.

ДЕЛЭКЪО Анет.