IофшIэнхэр зэрэлъыкIуатэхэрэм зыщигъэгъозагъ
Адыгэ Республикэм и ЛIышъхьэу КъумпIыл Мурат Тэхъутэмыкъое районым зыщэIэм кIэлэцIыкIухэмрэ зыныбжь икъугъэхэмрэ апае Инэм щашIырэ IэзапIэм изытет зэригъэлъэгъугъ. Шъолъыр программэм тегъэпсыхьагъэу сомэ миллион 380-рэ ащ пае къафыхагъэкIыгъ.
Квадрат метрэ 5135-рэ хъурэ псэуалъэм ишIын илъэсэу икIыгъэм рагъэжьагъ. НепэкIэ ащ ылъапсэ агъэчъыгъ, ыпкъ ашIыным епхыгъэ Iофхэр зэшIуахых. Мы илъэсым поликлиникакIэм ипчъэхэр къафызэIуихынхэу мэгугъэх, нэбгырэ 450-мэ яфэIо-фашIэхэр зы сменэм мыщ щагъэцэкIэшъущтых.
Адыгэ Республикэм псауныгъэр къэухъумэгъэнымкIэ и Министерствэ къызэрэщатыгъэмкIэ, Инэм щагъэпсырэ поликлиникэм ишIуагъэкIэ медицинэ фэIо-фашIэхэм язытет бэкIэ нахьышIу хъущт. Терапевтхэм, педиатрэхэм, джащ фэдэу нахь зыщыкIэхэрэ специалистхэм ащ Iоф щашIэщт, рентгенологым икабинет къызэIуахыщт, ультразвуковой диагностикэр ыкIи нэмыкIхэр щашIыщтых.
«Поликлиникэм къекIуалIэхэрэмкIи, ащ щылажьэхэрэмкIи зэкIэ Iэрыфэгъу хъун фае, ячэзыу ежэхэу зэрэщытыгъэм джы фэдэжьыщтэп, медицинэ фэIо— фашIэхэри нахьышIу хъущтых», —къыхигъэщыгъ КъумпIыл Мурат.
Адыгеим и ЛIышъхьэ муниципалитетымрэ АР-м псауныгъэр къэухъумэгъэнымкIэ и Министерствэрэ япащэхэм пшъэрылъ афишIыгъ псэуалъэр ипIалъэм шIомыкIэу ухыгъэ хъуным лъыплъэнхэу. Урысые Федерацием и Президентэу Владимир Путиным псауныгъэм икъэухъумэн епхыгъэ псэуалъэхэм яIофшIэн уахътэм нахь диштэу шIыгъэнымкIэ пшъэрылъхэу къыгъэуцугъэхэр гъэцэкIэгъэнхэм мэхьанэшхо зэриIэр КъумпIыл Мурат къыхигъэщыгъ.
Ащ пае илъэси 5-м телъытэгъэ шъолъыр программэ республикэм щызэхагъэуцуагъ. Ащ къызэрэдилытэрэм тетэу 2021-рэ илъэсым къыщыублагъэу 2025-м нэс поликлиникэхэр, фельдшер-мамыку IэзапIэхэр, амбулаториехэр кIэу ашIыщтых ыкIи агъэцэкIэжьыщтых, оборудованиякIэмрэ автотранспортымрэ къащэфыщтых. ГущыIэм пае, псэупIэу Каменномостскэм поликлиникэр зычIэт унэр щагъэцэкIэжьыгъ, Кощхьэблэ районымкIэ псэупIэу Дружбэмрэ Теуцожь районымкIэ къуаджэу Джэджэхьаблэрэ амбулаториитIу ащашIы. Гавердовскэм 2024-рэ илъэсым врач амбулаторие къыдэтэджэщт, жъы хъугъэ фельдшер-мамыку IэзапIэм ычIыпIэ ар къиуцощт. Джащ фэдэу къалэу Мыекъуапэ поликлиникакIэм ишIын щаухыщт, урамэу Чкаловым ыцIэкIэ щытым тет къэлэ поликлиникэри агъэцэкIэжьын мурад яI.
АР-м и ЛIышъхьэ ипресс-къулыкъу