Мыекъопэ районым ит псэупIэу Кужорскэм дэт еджапIэу N 6-м чIэсхэм дзэкIолIхэм апае шIухьафтынхэр агъэхьазырыгъэх. ХэушъхьафыкIыгъэ дзэ операцием хэтхэм ыкIи дзэ сымэджэщым щылажьэхэрэм ахэр алъагъэIэсыщтых.

Хэгъэгум иухъумакIо и Мафэ ехъулIэу Мыекъопэ къэзэкъ от­делым а Iофтхьабзэр зэхищагъ.

Адыгеим ис къэзэкъ ныбжьыкIэхэм я Союз хэтхэм ямыза­къоу а 1-рэ классым къыщыублагъэу я 11-м нэс арысхэм яIахь ащ хашIыхьагъ, къэмлан 33-рэ къаугъоигъ. Ахэм гъомылапхъэхэр, щыгъын фабэхэр, зызэрагъэкъэбзэщт пкъыгъохэр, джащ фэдэу «зэолIым фэкIорэ тхыгъэр» зыфиIохэрэр адалъхьагъэх.

Кужорскэм иатаманэу Александр Хомяковымрэ цIыф гукIэгъухэмрэ а шIухьаф­тынхэр зэкIэ зы чIыпIэ щызэрагъэуIугъэх.

КIэлэцIыкIухэм, кIэлэегъаджэ­хэм, ны-тыхэм — зэкIэ гукIэгъу къызхэфэгъэ пстэуми инэу та­фэраз. Ащ къегъэлъагъо заом хэтхэм зэрафэгумэкIыхэрэр, ТекIоныгъэм яцыхьэ зэрэтелъыр.

— Мы Iофтхьабзэр ятIо­кIэ­нэрэу щыт, — къыIуагъ Мыекъо­пэ къэзэкъ отделым ипащэу Александр Даниловым. — Ащ джыри зэ къегъэлъагъо цIыфхэм цыхьэ къызэрэтфашIырэр, агъэ­хьазырыгъэ шIухьафтынхэр зан­кIэу зэраIэкIэхьащтхэм шIошъ­хъуныгъэ зэрэфыряIэр. Тигуфэбэныгъэ изы Iахь тиухъумакIохэм арэнэс, кIуачIэ къахерэлъхь.

Екатерина Загорулько.