ХэушъхьафыкIыгъэ дзэ операциеу Украинэм щыкIорэм бэмышIэу къикIыжьыгъэх Моисеевхэу Андрейрэ ащ ыкъоу Александррэ. Ахэм гущыIэгъу тафэхъугъ.

Мыекъопэ къэзэкъ отрядым ыцIэкIэ хэушъхьафыкIыгъэ дзэ операцием хэлэжьэнхэу зэдежьэгъэ нэбгырэ 11-мэ Андрей япоходнэ атаманыгъ. Ахэр зэкIэри район зэфэшъхьафхэм къарыкIыгъэх.

ИкIалэу Александр къызэриIуагъэмкIэ, лагъымэкъэгъэо батареем наводчик шъхьаIэу хэтыгъ.

Моисеевхэр дзэ операцием зэрэкIощтхэм бэрэ егупшысагъэхэп. ГуфакIохэу ятэрэ ыкъорэ мэзищым ащ къэтыгъэх.

— Сэ сшъхьэкIэ хэгъэгу кIоцI Iоф­хэмкIэ Министерствэм къулыкъур бэрэ щысхьыгъ, — еIо Андрей, — дзэ Iофым хэшIыкI фысимыIэу щытэп. Хэтрэ дзэ­кIолIи Хэгъэгур къыухъумэныр ипшъэрылъ шъхьаIэу сэлъытэ.

— Ахъщэ къэдгъэхъэным пае мыщ тыкIуагъэп, — ятэ игущыIэ Александр къыпидзагъ. — Хэгъэгум IэпыIэгъу зэрищыкIагъэр, къэтыухъумэнэу зэрэщытыр къыдгурэIоти, а лъэбэкъур тэ тишIоигъоныгъэкIэ тшIыгъэ. Егъэлыягъэу тыгущыIэныр ти­кIасэп, ау патриотизмэр пстэуми акIыIу хъугъэу сэлъытэ.

Къыхэзгъэхъожьмэ сшIоигъу, Александр кIэлэ ныбжьыкI нахь мышIэми, дзэ Iофым хэшIыкI фыриI, дзэм къулыкъур зеухым етIани зэзэгъыныгъэм кIатхи, зэпхыныгъэмкIэ батальоным илъэсищрэ хэтыгъ.

А зы унагъом нэбгыритIу ибгъэкIынышъ, хэушъхьафыкIыгъэ дзэ операцием бгъэкIоныр IэшIэхэп. Ягупсэхэм къазэрадырагъэштагъэм тыкIэмыупчIэн тлъэкIыгъэп. Александр теубытагъэ хэлъэу зэрэрихъухьагъэр ишъхьэгъусэ зыреIом, хиIухьагъэ щыIэп. Янэ игугъу къэтшIымэ (Андрей ишъхьэгъусэ), ар офицерым ыпхъу, ятэ бэрэ унэм зэримысыщтыгъэм есагъ, хъулъфыгъэм пшъэдэкIыжьэу хэгъэгум ыпашъхьэ щыриIэр дэгъоу къыгурэIо.

ТхьамэфитIум къыкIоцI Урысыем ишъолъырхэм ащыщ ятэрэ ыкъорэ зызыщагъэхьазырым ыуж хэушъхьафыкIыгъэ дзэ операцием ащагъэх.

— Къыблэ-Донецкэ лъэны­къоу тыздэщыIагъэм, нахьыбэ­рэмкIэ, топыщэхэр агъэфедэх, — къеIуатэ Александр. — Гъэ­пытэгъэ позициер пыим щау­хъумэным фэшI тиротэ щэ­рыонхэм ахафэу къыхэкIыгъ. Ащ фэдэ зэпэуцужьэу шэкIогъум и 26-м щыIагъэм чIэна­гъэхэр тигъэшIыгъэх, дзэкIолIхэм ащыщхэри къауIагъэх, ау къытфагъэуцугъэ пшъэрылъыр зэ­рифэшъуашэу ащ дэжьым дгъэцэкIагъэ.

Джащ фэдэу Александр къызэрэхигъэщыгъэмкIэ, Донецкэ икъыблэ лъэныкъокIэ 2014-рэ илъэсым къыщегъэжьагъэу цемент-мыжъо зэхэгъэчъыхьагъэ­кIэ пыим дэгъоу зигъэпыта­гъэу щыт. Ащ етIани Украинэм идзэ­къулыкъушIэ закъохэр арэп къащыпэуцугъэхэр.

ХэушъхьафыкIыгъэ дзэ операцием анахьэу щагъэфедэу тигущыIэгъухэм къаIуагъэр цIыф зэрымыс къэзыбыбыхьэрэ пкъыгъохэр ары, нэмыкIэу къэп­Iон зыхъукIэ — дронхэр. Ахэм акIоцI тепловизорхэмкIэ, каме­рэхэмкIэ зэтегъэпсыхьагъ.

— Тыздэсыгъэ окопым бэрэ дронхэу гранат зыпышIагъэхэр къышъхьарыбыбэу къыхэкIыгъ, — къаIуатэ ятэрэ ыкъорэ. — Удэплъыемэ метритфым нэсэу ахэр къехынхэ алъэкIы. ЦIыфым окопым зыкъызэрэщигъэсы­сыгъэм тетэу гранатэр къыре­дзыхы. Ащ ыуж псынкIэу мэбыбыжьы. Украинэм и УIэшыгъэ ащ фэдэу авиациер ыгъэфе­­дэ­рэп, джа цIыф зэрымыс ­пкъыгъохэр нахь къыхехы. Е ар икъоу яIэп, е къухьэлъатэр дэ­­быбэегъу имыфэу псынкIэу къы­раутэхы. НахьыбэрэмкIэ ла­гъымэхэр агъэфедэх.

Мамыр щыIакIэм кIэхъопсырэ цIыфэу Украинэм щыпсэу­хэрэри тигущыIэгъухэм шIукIэ агу къинагъэх. Къоджэ псэу­пIэхэм ащыщхэр, гущыIэм пае, Александровкэм дэт унэ зэхэтышхор пыим зэрэзэхигъэта­къорэр янэрылъэгъугъ, янасыпкIэ цIыфхэр къыращынхэу игъо ифагъэх.

Александр къызэриIотагъэмкIэ, урысые дзэкIолIхэм цIыфхэр къафэнэгушIохэу къапэ­гъокIых, къауIагъэхэм IэпыIэгъу афэхъух, яIэ гъомылапхъэхэмкIэ къадэгуащэхэу къыхэкIы.

Ащ дакIоу, ежь дзэкIолIхэм къафэкIорэ шIушIэ IэпыIэгъур афагощэу бэрэ мэхъу. Сыда пIомэ чIыпIэрысхэр зыщы­псэу­хэрэм адэкIыхэу, гъомылэп­хъащэ кIошъухэрэп.

Урысыем ишъолъыр пстэуми, Адыгеири ахэтэу, къарыкIырэ шIушIэ IэпыIэгъур тидзэкIолIхэм тхьамафэм зэ-тIо аIумыкIэу хъу­рэп. Мыщ гъомылэпхъэ зэфэшъхьафхэм, щыгъынхэм адакIоу техникэри афащэ. Ахэр анахьэу автомобиль псынкIэхэу «УАЗ», «Нива» зыфаIохэрэр ары.

Моисеевхэр зыхэтыгъэхэ отрядыр БАРС-м хэхьэ. Ащ шъуашэкIи, IашэкIи, шхыныгъокIи къызэтырегъэпсыхьэх. Нэбгыри 120-мэ шхыныгъо стырхэр афэзыгъэхьазырырэ къекIокIырэ пщэрыхьапIэ яIагъ. ПытапIэм зыкIохэкIэ, паек гъушъэр араты.

ТигущыIэгъухэр щтыргъукIым хиубытагъэх.

— Окопым чъыIэр градус 27-м щынэсэу къыхэкIыгъ, — къеIуатэ Андрей. — ДзэкIолIхэм загъэфэбэным фэшI окопнэ шэф остыгъэхэр, хьаку гъэ­нэфагъэхэр зыдаIыгъых. Къызэ­рамылъэгъущтхэм пае ма­шIо­кIэ къэнэфырэ пкъыгъохэр агъэфе­дэнхэу хъурэп.

Андрей ежь иунэе хъызмэтшIапIэ иI, шы зекIоным фэгъэзагъ. Охътэ гъэнэфагъэ тешIэмэ, хэушъхьафыкIыгъэ дзэ операцием джыри ыгъэзэжьын гухэлъ иI. Александр джыдэдэм техническэ станцием Iоф щешIэ. Ащ дакIоу Лъэпкъ гвардием хахьэ шIоигъоу тхылъхэр егъэхьазырых. Ащ икъулыкъу­шIэхэр дзэ операцием хэла­жьэхэшъ, джыри зэригъэзэжьыщтым ицыхьэ телъ.

Iэшъынэ Сусан.