Аэрофлотыр зызэхащагъэр илъэси 100 зэрэхъурэм фэгъэхьыгъэ мэфэкIым АР-м и Лъэпкъ тхылъеджапIэ хэлэжьагъ. ЮбилеимкIэ тхылъ къэгъэлъэгъонэу «Серебряные крылья» зыфиIорэр ыгъэхьазырыгъ.

МэфэкI Iофтхьабзэр культурэм и Унэу «Гигантым» щыкIуагъ, ащ граждан авиациемкIэ Темыр-Кавказ авиаотрядым и Мыекъопэ объединение иIофышIэхэр ыкIи иветеранхэр хэлэжьагъэх. 2023-рэ илъэсым Урысые авиацием имэфэкI зэфэшъхьаф­хэр агъэмэфэкIых. Илъэси 100-кIэ узэкIэIэбэжьмэ, мэзаем, 1923-рэ илъэсым граждан авиациемкIэ Совет ыкIи «Общество друзей Воздушного флота» зыфиIорэр щыIэ хъугъэх.

СССР-мкIэ апэрэ зэхэт обще­ственнэ организациер Ошъогу флотым хэхъоныгъэ ышIыным имызакъоу, авиацием ишIуагъэ зэлъягъэшIэгъэным пылъыгъ. Авиацием анаIэ тырарагъэ­дзэным ыкIи ащ шIуагъэу, лъэ­кIэу иIэр цIыф жъугъэхэм агу­рыгъэIогъэным анахьэу пылъыгъэхэр рекламнэ компаниехэр ары. Ащ пае лекциехэр зэхащэщтыгъэх, бгъэхалъхьэхэр къыдагъэкIыщтыгъэх, шIоигъоныгъэ зиIэхэр ыпкIэ хэмылъэу къухьэлъатэмкIэ къыращэкIыщтыгъэх. IофыкIэм бгъэшIэгъо­нэу бэ хэлъыгъэр, цIыфхэри къызфищагъэх. Зы илъэс за­къо­кIэ мы обществэм нэбгырэ миллионым нахьыбэ хэхьэ­гъагъ.

Гъэтхапэм и 17-м, 1923-рэ илъэсым Урысые обществэм иошъогу флотэу «Добролет» зыфиIорэр зэхащэгъагъ. Хэгъэ­гум играждан авиацие зэтегъэ­псыхьэгъэныр ащ ипшъэры­лъыгъ. Лъэпкъ хъызмэтым ифэIо-фашIэхэр — цIыфхэр, почтэр, хьылъэхэр зещэгъэнхэр ыкIи аэросурэт техынхэр шIыгъэнхэр ащ къыдилъытэщтыгъ. «Добролетым» иIофтхьабзэу зэхащэхэрэм къакIэкIуагъэхэмкIэ апэрэ авиалиниехэм ящыкIэгъэ быбырэ пкъыгъохэу IэкIыб къэралхэм къащашIыгъэ­хэр ащэфыгъагъэх. Ащ ыуж хэгъэгу кIоцIым щашIыгъэ къу­хьэлъатэхэу цIыфхэр зезыщэщтхэр къашIыхэ хъугъэ.

МэфэкI Iофтхьабзэу культурэм и унэу «Гигантым» щыкIуагъэм граждан авиацием Iоф щызышIэгъэ цIыфыбэ хэлэ­жьагъ. Зэлэгъу-ныбджэгъухэр, зэIофшIэгъугъэхэр, къиныгъохэр къызэранэкIызэ текIоныгъэм фэ­кIуагъэхэр мыщ щызэIукIа­гъэх.

Анахь мэхьанэ зиIагъэр къэ­гъэлъэгъонэу «Серебряные крылья» зыфиIорэм иIахьэу гъэзет тхыгъэхэр бэу зыхэлъы­гъэхэр арых.

Экспозициер сурэттехыгъэхэми къагъэбаигъ, Мыекъопэ аэродромым иIофшIэгъу мафэ­хэр ахэм ащыолъэгъу.

Мыекъопэ авиапредприятием игъэмэфэ отряд итарихъ къыриIотыкIыгъ ащ икомандиры­гъэу Р.О. ШъэуапцIэкъом. МэфэкI Iофтхьабзэр творческэ коллективхэм яконцерткIэ аухыгъ.