«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къызэрэщыдэлъытагъэу, илъэсэу къихьагъэм Адыгеим и Джэджэ район иавтомобиль гъогоу шъолъыр мэхьанэ зиIэм щыщ Iахь ыкIи лъэмыджитIу щагъэцэкIэжьыщт.

Станицэу Джаджэм икIэу селоу Штурбинэм кIорэ гъогум щыщ агъэкIэжьыщтыр, километ­ри 2,2-рэ мэхъу, сомэ мил­лион 27,9-рэ ащ пэIухьащт. Лъэпкъ проектым ишIуагъэкIэ мы гъогум иIахьэу асфальтыр зыщызэблахъурэр ящэнэрэу мэхъу.

Поселкэхэу Келеметовым, Заревэм, Ульскэм, Чернышевым ягъогухэр мыщ къекIуалIэх. Арышъ, ахэм апщыпсэухэрэмкIэ мы гъогум изытет мэхьанэшхо иI. «Адыгеяавтодорым» къызэритыгъэмкIэ, подрядчикэу Iоф­шIэныр зыгъэцэкIэщтыр мэзаем ыкIэм нэс къэнэфэщт.

Мы гъогум ияхэнэрэ километрэ телъ лъэмыджэу псыхъоу Джаджэ зэпызычырэри икIэрыкIэу ашIыжьыщтхэм ащыщ. Проектым къыдыхэлъытагъэу ащ пкъэоу чIэтхэри, ахэм ате­лъы­ри зэблахъущтых. Транспортыр къызэтемыуцоным фэшI лъэмыджыр тIоу агощынышъ, чэзыу-чэзыоу IофшIэнхэр ахэм ащызэшIуахыщтых. ПстэумкIи метрэ 36,5-рэ икIыхьагъ, сомэ миллиони 143,7-рэ пэIухьащт.

Джащ фэдэу Джэджэ районым иавтомобиль гъогоу «Сергиевское — Тамбовский — Фарсовый» зыфиIорэм телъ лъэмыджэу псыхъоу Фарзэ зэ­пызычырэри икIэрыкIэу ашIы­жьыщт. Ар селоу Сергиевскэм игъунапкъэ дэжь щыI, ащ фэшI изытет цIыфэу дэсхэр лъэшэу ыгъэгумэкIыщтыгъэх. Джы мары лъэпкъ проектым ишIуагъэкIэ лъэмыдж кIэу афашIыщт пIоми хъущт. ПстэумкIи ар метрэ 56,7-рэ мэхъу, сомэ миллион 228-рэ тефэщт.