Джыри зы хъызмэтшIапIэ къахэхъощт
Къэралыгъо IэпыIэгъум ыкIи бэдзэршIыпIэм дэгъоу зэрэщыIукIырэм яшIуагъэкIэ пцэжъыехъуным Адыгеим зыщеушъомбгъу.
Осетрэ лъэпкъым пылъ мэкъумэщ-фермер хъызмэтшIапIэу къуаджэу Пэнэхэс дэтым изакъоу сомэ миллион 34,7-рэ ауасэ блэкIыгъэ илъэсым продукцие IуигъэкIыгъ.
Мы пцэжъые лъэпкъым пылъ зы хъызмэтшIапIэ охътэь благъэхэм иIофшIэн ригъэжьэщт. ШэпхъэшIухэм адиштэрэ системэу ащ щагъэпсыщтым ишIуагъэкIэ илъэс псаум пцэжъыер щаIыгъын алъэкIыщт.
ХъызмэтшIапIэр фермерэу Роман Шестовыр ары къызэIузыхыщтыр. Лъэпкъ проектэу «Бизнес цIыкIур ыкIи гурытыр, унэе предпринимательхэр кIэщакIо зыфэхъухэрэр» зыфиIорэм къыдыхэлъытагъэу, грантэу сомэ миллионрэ мин 779-рэ ащ къыратыгъ. Ары егъэжьапIэ фэхъугъэр.
АР-м мэкъу-мэщымкIэ и Министерствэ къызэрэщаIуагъэмкIэ, фермерыр ипроект ипхырыщын ыуж ит. ИлъэсныкъокIэ псэолъэшIын IофшIэнхэр зэшIуихыгъэх, инженер псэуалъэу ищыкIагъэхэр ышIыгъэх, мы уахътэм оборудованиер егъэуцу.
— Мэкъумэщ хъызмэтым IэпыIэгъу етыгъэныр апшъэ тшIыхэрэм ащыщ. Къэралыгъо программэу республикэм щыпхырытщыхэрэм яшIуагъэкIэ бизнес цIыкIум ыкIи гурытым заушъомбгъун амал яIэ хъугъэ. Ар экономикэм хэхъоныгъэхэр ышIынхэм, IофшIэпIэ чIыпIэхэр, хэбзэIахьхэр нахьыбэ хъунхэм, IэкIыбым къитымыщэу, мыщ къыщашIыгъэ гъомылапхъэхэр дгъэфедэнхэм ар фэIорышIэщт, — къыIуагъ АР-м и ЛIышъхьэ ащ фэгъэхьыгъэу.