АР-м и Къэралыгъо Совет — Хасэм ия XX-рэ зэхэсыгъоу непэ иIагъэм хэлэжьагъэх АР-м и ЛIышъхьэу КъумпIыл Мурат, федеральнэ ыкIи республикэ къулыкъухэм, муници­паль­нэ об­разованиехэм япащэхэр, нэмыкIхэр. Iофтхьабзэр зэрищагъ Парламентым и Тхьаматэу Владимир Нарожнэм.

Пстэумэ апэу ыкIи анахь шъхьаIэу зытегущыIагъэхэр АР-м иминистрэхэм я Кабинет и Тхьаматэу КIэрэщэ Анзаур гъэнэфэгъэныр ары. Ащ икандидатурэ къыгъэлъэгъуагъ АР-м и ЛIышъхьэу КъумпIыл Мурат. Премьер-министрэм иIэнатIэ зыщигъэцэкIагъэм иIофшIэн хэшIыкI фызиIэу, республикэмкIэ шIуагъэ къэзытыщт предложениехэм кIэщакIо афэхъоу, пшъэрылъэу иIэхэр зэрифэ­шъуашэм тетэу пхырищын зы­лъэкIырэ пащэу зыкъызэри­гъэ­лъэгъуагъэр ЛIышъхьэм къы­хи­гъэщыгъ.

— Анзаур Аслъанбэч ыкъом шъолъырым игъэIорышIэкIо командэ мымакIэу Iоф щишIагъ, опытышхо иI. Депутат корпусым ыкIи федеральнэ гупчэм къыдырагъаштэмэ, Адыгеим игъэцэкIэкIо хэбзэ къулыкъоу ар зипэщэщтхэм лъэпкъ гухэлъэу УФ-м и Президентэу Владимир Путиным къыгъэнэфагъэхэм ягъэцэкIэнкIэ гъэхъэгъэ инхэр зэрашIыщтхэм сицыхьэ телъ. Тапэ IофшIэнышхо илъ. Къиныгъохэр зэрифэшъуашэм тетэу зэпытчышъунхэ, Адыгеим щыпсэухэрэм ящыIакIэ нахьышIу тшIызэ тылъыкIотэн фае, — къыIуагъ КъумпIыл Мурат.

КIэрэщэ Анзаур гущыIэр зештэм, республикэм ипащэ цы­хьэ къыфишIи, икандидатурэ къызэригъэлъэгъуагъэм фэшI зэрэфэразэр къы­хигъэщыгъ, ипшъэрылъэхэр шIуагъэ къытэу гъэцэ­кIэгъэнхэм амалэу щыIэ пстэур зэрэрихьылIэщтым къыкIигъэтхъыгъ.

— Республикэм ихэ­хъоныгъэхэм япсынкIагъэ къыщымкIэу лъыгъэкIотэгъэныр, цIыфхэр пащэхэм зэращыгугъыхэрэм зэрэхахъорэр къыдэтлъытэзэ, ахэм зэпхыныгъэ адытиIэныр пшъэрылъ шъхьаIэу АР-м и ЛIышъхьэ къытфигъэуцухэрэм ащыщых, — къыIуагъ КIэрэщэ Анзаур.

АР-м иминистрэхэм я Кабинетрэ Къэралыгъо Совет — Хасэмрэ зэдэлэжьэнхэм мэхьанэу иIэм хэушъхьафыкIыгъэу игугъу ашIыгъ. Аужырэ илъэсхэм гъэсэныгъэм, псауныгъэм икъэухъумэн, культурэм, спортым, гъогу хъызмэтым ыкIи энергетикэм алъэ­ныкъокIэ проектышхохэр зэдыпхыращыгъэх. Лъэпкъ проектхэм, къэралыгъо программэхэм ыкIи АР-м социальнэ-экономикэ хэ­хъо­ныгъэхэр егъэшIыгъэнхэмкIэ унэе программэм къадыхэлъытагъэхэм ягъэ­цэкIэнкIи ащ тетэу Iоф­шIэнхэр лъыгъэкIотэгъэнхэ фае. Зигъот макIэхэм, хэушъхьафыкIыгъэ дзэ опе­рацием хэлажьэхэрэм, ахэм яунагъохэм социальнэ IэпыIэгъу ятыгъэныр анахьыбэу унаIэ зытебгъэ­тын фаехэм ащыщ.

Депутатхэм амакъэ затым ыуж, зэкIэми икандидатурэ зэрэдарагъэшта­гъэм фэшI КIэрэщэ Анзаур фэгушIуагъэх ыкIи АР-м иминистрэхэм я Кабинет и Тхьамэтэ IэнатIэу зыIу­хьэрэм шIуагъэ къытэу иIофшIэн щылъигъэкIотэнэу фэлъэIуагъэх.

Нэужым депутатхэм Къэ­ралыгъо Советым — Хасэм илIыкIохэр АР-м и Очыл палатэ икваллификационнэ комиссие хагъэ­хьагъэх, республикэ хэбзэ­гъэуцугъэхэм япроектхэм атегущыIагъэх, апэрэ еджэгъумкIэ аштагъэх.

2023-рэ илъэс бюджетым, 2024-2025-мкIэ агъэ­нэфагъэхэм зэхъокIыны­гъэхэр афашIыгъэх. Ахэм къызэрадэлъытагъэмкIэ, чIыпIэхэм хэхъоныгъэ ягъэ­шIыгъэнымкIэ Фондым зымыгъэзэжьыщт мылъкоу къыхэлъхьагъэ хъугъэм ишIуагъэкIэ хахъохэр сомэ миллион 38,8-кIэ нахьыбэ хъугъэ ыкIи сомэ миллиард 37,3-м нэсыгъ. Бюджетым ихъарджхэр сомэ миллиард 41,6-рэ зэрэхъурэр. ЩыкIагъэу фэхъущтыр УФ-м ибюджет Кодекс ыкIи федеральнэ зэзэгъыныгъэхэм яшапхъэхэм адештэ.

Джащ фэдэу къэлэгъэ­псыным, муниципальнэ къулыкъум, административ­нэ комиссиехэм, къэралыгъо мылъкум игъэIорышIэн, нэмыкIхэм афэгъэхьыгъэ республикэ хэбзэгъэуцу­гъэхэми гъэтэрэзыжьынхэр мы зэхэсыгъом щафашIыгъэх, Къэралыгъо Советым — Хасэм 2023-рэ илъэсым Iоф зэришIэщт планыр щаштагъ.

Адыгэ Республикэм и ЛIышъхьэ ипресс-къулыкъу

Сурэтхэр: А. Гусев.