Тыркуем ыкIи Шам чIыгусысынэу къащыхъугъэм иягъэ зэригъэкIыгъэ тилъэпкъэгъухэу мы къэралыгъохэм ащыпсэухэрэм IэпыIэгъу ягъэгъотыгъэным пае Адыгэ Республикэм иобщественнэ движениеу «Адыгэ Хасэм» банкым счет къыщызэIуихыгъэу шIушIэ ахъщэр щаугъои.

Республикэм ит хъызмэтшIэпIэ зэфэшъхьафхэр, предприятиехэр, унэе сатыушIхэр, цIыф къызэрыкIохэр - шIоигъоныгъэ зиIэ пстэури мы Iофтхьабзэм хэлажьэ. Адыгэ Хасэм ипащэу ЛIымыщэкъо Рэмэзан къызэриIуагъэмкIэ, непэрэ мафэм ехъулIэу къызэIуахыгъэ счетым сомэ 1 200 000-м къехъу къихьэгъах. Ахъщэ угъоиныр къэзыгъэпсынкIэщт счетым икюар-тамыгъэ игъэнэфэн шIэхэу хьазыр хъущт.

Джащ фэдэу мылъку IэпыIэгъур щаугъои Мыекъуапэ имэщыт шъхьаIэ.

Шам иныбжьыкIэхэм якультурнэ Гупчэ иволонтерхэр кIэщакIо фэхъухи, машинэ заулэ хъурэ шIушIэ IэпыIэгъур мы мафэхэм а хэгъэгум атIупщыгъ. Щыгъын фабэхэр, пIэтехъохэр, гъомылэпхъэ зэфэшъхьафхэр, сабый къэхъугъакIэхэм апае шхынхэр ащ хэхьагъэх. АР-м щылэжьэрэ фондэу «Сделаем вместе» зыфиIорэм ипащэу Барцо Руслъан къызэриIуагъэмкIэ, яшIушIэ куп изакъоми охътэ кIыхьэм къыкIоцI мыкIодырэ гъомылэпхъэ тонн мини 2 къыугъоигъ. ГъомылапхъэкIэ ушъэгъэ машинэр Москва кIощт. Ащ икIынышъ, шIушIэ IэпыIэгъур Шам нэсыщт. ГупыкI зиIэхэу, къин хэфагъэхэм IэпыIэгъу языгъэкIынэу фаехэм Адыгэ Хасэм къызэIуихыгъэ счетым ахъщэр рагъэхьан алъэкIыщт.

Тэу Замир.