Советскэ дзэхэр Афганистан къызыращыжьыгъэхэр илъэс 34-рэ зэрэхъугъэм фэгъэхьыгъэ зэхахьэ саугъэтэу «ДзэкIолIым ипсынэкIэчъ» зыфиIорэм дэжь непэ щыкIуагъ.

Iофтхьабзэм хэлэжьа­гъэх Адыгэ Республикэм ихэбзэ къулыкъушIэхэр, дзэкIолI-интернациона­листхэр, Мыекъопэ гар­низоным къулыкъур щызыхьыхэрэр, общественнэ движениехэм ялIыкIохэр, ны-тыхэр, фэхыгъэхэм яIа­хьылхэр, ныбджэгъухэр, ЮнАрмием хэтхэр.

Адыгэ Республикэм щыщхэу Афганистан дзэ къулыкъур щызыхьыгъэхэм яобщественнэ организацие ипащэу Николай Николенкэм пэублэ гущыIэкIэ зэхахьэр къызэIуихыгъ. Илъэс 34-кIэ узэкIэIэбэжьмэ советскэ дзэхэр Афганистан къызэрэращыжьыгъэхэм ар къытегущыIагъ. Адыгеим икIыгъэ дзэкIолI 880-мэ къулыкъур Афга­нистан щахьыгъ, 23-р лIы­хъужъэу щыфэхыгъ. Агу къытемыожьырэми, лIы­гъэу зэрахьагъэмкIэ непи дзэкIолI-интернациона­листхэр къытхэтых.

Адыгэ Республикэм и ЛIышъхьэу КъумпIыл Мурат ыцIэкIэ зэхахьэм къыщы­гу­щыIагъ республикэм Iоф­шIэнымкIэ ыкIи социаль­нэ хэхъоныгъэмкIэ ими­нист­рэу, Афганистан заом хэ­тыгъэу Мырзэ Джанбэч.

— ТидзэкIолIхэм лIы­хъужъныгъэ Афганистан щызэрахьагъ, яинтернациональнэ пшъэрылъ агъэцакIэзэ фэхыгъэхэр егъа­шIэм тщыгъупшэщтхэп. Зэо­-зэпэуцужь зэфэшъхьафхэм ахэлэжьагъэхэм, ахэм ахэкIодагъэхэм яуна­гъохэм IэпыIэгъу ягъэгъотыгъэныр республикэм икъэралыгъо органхэм япшъэрылъ. ДзэкIолI-интернационалистхэр, ана­хьэу шъобж ыкIи уIэгъэ хьылъэу атещагъэхэм апкъ къикIыкIэ щыIэныгъэм чIы­пIэ зэжъу ригъэуцуагъэхэр, социальнэу къызэрэтыухъумэщтхэм ыуж тит, — хигъэунэфыкIыгъ министрэм.

Джащ фэдэу зэо зэфэшъхьафхэм яветеранхэм зэрафэлъэкIэу Адыгеим социальнэ-экономическэ хэхъоныгъэ ышIыным, обществэм зэгурыIоныгъэ ыкIи зыпкъитыныгъэ хэлъыным, цIыфхэм япатриотическэ пIуныгъэ яIахьышIу хашIыхьаным зэрэпылъхэм фэшI АР-м и ЛIышъхьэ зэрафэразэр Мырзэ Джанбэч къыIуагъ.

Нэужым Iофтхьабзэм къыщыгущыIагъэх АР-м заомкIэ, Iоф­шIэнымкIэ, УIэшыгъэ КIуачIэхэмкIэ ыкIи хэбзэухъумэкIо къулыкъухэмкIэ иветеранхэм я Совет итхьаматэу Къоджэ Аслъан, Адыгэ Респуб­ликэм и Парламент и Тхьаматэ игуадзэу, УФ-м и ЛIыхъу­жъэу Цэй Эдуард, Мые­къопэ къэлэ администрацием ипащэу Геннадий Митрофановыр. Гу­шъхьэ кIуачIэу яIэр, патриот шъыпкъэу зэрэщытхэр тидзэ­кIолIхэм Афганистан къызэрэщагъэлъэгъуагъэр, яинтернациональнэ пшъэрылъ зэра­гъэ­цэкIагъэр къэгущыIэгъэ пстэ­уми къы­хагъэщыгъ. Ти­лIэ­ужхэр пытэу зэрэзэпхыгъэхэр Афганистан щыкIогъэ заом, нэмыкIхэми тидзэкIолIхэм къащагъэшъыпкъэжьыгъ. Заом хэ­лэжьагъэхэм лIыгъэу зэрахьагъэр тщыгъупшэ зэрэмыхъущтыр хагъэунэфыкIыгъ.

Зэхахьэм Афганистан щы­фэхыгъэ тидзэкIолIхэм шъхьащэ щафашIыгъ, зы такъикърэ афэшъыгъуагъэх. Саугъэтэу пчэгум итым къэгъагъэхэр кIэлъыралъхьагъэх.

Iэшъынэ Сусан. Сурэтыр Iэшъынэ Аслъан тырихыгъ.