Шэуджэн районым икъоджэ гупчэу Хьакурынэхьаблэ псыхъоу Фарзэ пхырэкIы. Ащ телъ лъэмыджым узэрикIэу къуаджэм ипчэгу шъхьаIэ уехьэ. Гъогубгъухэм къэралыгъо учреждениехэр, культурэм и Унэ, зыгъэпсэфыпIэ паркыр, район гъэзетэу «Зарям» иредакциерэ Адыгеим и Советхэм яа 1-рэ зэфэс зыщыкIогъэ унэ-музеимрэ зычIэтхэр, спорт комплекс иныр, тучанхэр къащызэкIэлъэкIох.

Къоджэ гупчэр хъоо-пщау ыкIи гуIэтыпI. Псэуалъэхэр зэрагъэкIэжьыгъэхэр мыгъуащэу кIэракIэх. Плъэгъурэм къэлэ цIыкIум итеплъэ угу къегъэкIы. Районым икъоджэ шъхьаIэ аужырэ лъэхъаным хэхъоныгъэу ыкIи зэхъокIыныгъэу фэхъугъэхэм Хьакурынэхьэблэ къоджэ псэупIэм итхьаматэу Беданэкъо Валерий Аслъан ыкъом тащигъэгъозагъ.

— Шъыпкъэр пIощтмэ, аужырэ илъэс заулэм хэхъоныгъэхэр зышIыгъэхэм тэри тахэт, къыддэхъугъэри макIэп. Тикъоджэ псэупIэ Хьакурынэхьаблэ, къутырхэу Хапачевымрэ Кировымрэ хэтых. Ахэм нэбгырэ мини 4,5-рэ фэдиз ащэпсэу, миныр — пенсионерых.

Къэралыгъо программэхэм лъэшэу яшIуагъэ къэкIуагъ. Къоджэдэсхэм ящыIэкIэ-псэукIэ зыкъегъэIэтыгъэнымкIэ ахэм мэхьанэ яI. «Къуаджэхэм хэхъоныгъэхэр ягъэшIыгъэнхэр» зыфиIорэм ихьатыркIэ Iофыгъо инхэр дгъэцэкIа­гъэх, — къыIотагъ тигущыIэгъу.

Къоджэ гупчэм ит зыгъэпсэфыпIэ паркым игъэкIэжьын аухыгъ. Ащ Шэуджэн Мосэ ыцIэ ехьы, исаугъэтэу дэтыр загъэуцугъэм къыщегъэжьагъэу агъэкIэжьыгъагъэп, джы ар паркым ынапэу ыкIи къыгъэдахэу щыолъэгъу.

Паркым остыгъэхэр, тетIысхьапIэхэр, лъэсгъогухэр щызэблахъугъэх. IофшIэнхэм апэIуагъэхьэгъэ ахъщэр федеральнэ, республикэ ыкIи чIыпIэ бюджетхэм къахагъэкIыгъ.

Парк кIыбым охътаби, ахъщаби зытырагъэкIодэгъэ спорт комплекс ин къыщагъэуцугъ. Къуаджэм дэс цIыфэу фаехэр зэкIэ ащ изалхэм къякIуалIэх, япсауныгъэ щапсыхьэ.

— КIэлэцIыкIухэр спортым нахь фэщэгъэнхэм фэшI футболымкIэ, дзюдомкIэ, нэмыкI спорт лъэпкъхэмкIэ зэнэкъокъухэр афызэхэтэщэх, текIоныгъэр къыдэзыхыхэрэм аратыщт кубокхэмрэ медальхэмрэ къафэтэщэфых. ТапэкIи спорткомплексым зэнэкъокъу зэфэшъхьафхэр щызэхэтщэнхэу, ахэм Адыгеим ирайонхэм яспортсменхэр къядгъэблэгъэнхэу амал тиIэ хъугъэ, — еIо Валерий.

УлъыкIуатэмэ, къат-къатэу зэтет унэ­хэм ящагухэр зэрэзэгъэзэфагъэхэр плъэгъущт. ТетIысхьапIэхэр, остыгъэхэр зэблахъугъэх, лъэсгъогухэр кIэх. Ящэ­нэрэ унэм ищагу кIэлэцIыкIу джэгупIэ щагъэпсыгъ. ГыкIыгъэхэр зыпалъэщт кIапсэхэр ращагъэх, унэм чIэсхэм а пстэури агу рехьы. — ЦIыфыбэ зыщыпсэурэ унэ зэтетхэм ащыщэу къихьэгъэ илъэсым джыри унищым ящагухэр зэтедгъэпсыхьащтых, цIыфхэмкIэ ахэр гупсэфынхэр къыдэтлъытэщт, — еIо Беданэкъо Валерий. Джащ фэдэу район администрацием иунэ ыпашъхьэр, Лениным исаугъэт зэрыт пчэгур плиткэкIэ пкIагъэх. Автомобиль уцупIэм зырагъэушъомбгъугъ. Редакциер зычIэт унэри къуаджэу Хьакурынэхьаблэ илъэси 100 зэрэхъурэм ипэгъокIэу агъэкIэжьыгъ. Унэжъым итеплъэ къагъэнэжьыгъ. Кабинетхэм афэшъхьафэу цIыфхэр зыщызэхэпщэнхэ зал хашIыхьагъ. ХьакIэу къафакIохэрэр зэрифэшъуашэу музейми редакциеми яIофышIэхэм ащ зэрэчIащэщтхэм егъэгушIох.

Валерий Хьакурынэхьаблэ фэшъхьа­фэу мы къоджэ псэупIэм хэхьэрэ къутырхэм ящыIэкIэ-псэукIэ зытетыр къытфиIотэнэу телъэIугъ.

— Зигугъу къэпшIыгъэ псэупIэхэм адэсхэр тщыгъупшэхэрэп, амалэу тиIэмкIэ IэпыIэгъу тафэхъу, тызэхэхьэ, тызэхэкIы. «Адыгеяавтодорым» ихьатыркIэ Хапачевым игъогу шъхьаIэу километрэрэ ныкъорэ фэдиз хъурэм асфальт тыралъхьагъ. Ар еджапIэм екIуалIэ, къутыр дэкIыгъом нэсы.

Къутырэу Кировым идэхьагъуи асфальт тетлъхьагъ. Гъогухэр къэдгъэ­нэфыгъэх, илъэскIэ узэкIэIэбэжьмэ, кIэлэцIыкIухэм апае джэгупIэ щыд­гъэпсыгъ.

Къоджэдэсхэри къутырхэм ащыпсэухэрэри зэгурэIох, зэщыщхэм фэдэу зэдэпсэух. Тэри тлъэкIырэр афэтэшIэ.

БэмышIэу Хьакурынэхьэблэ къоджэ псэупIэм 2022-рэ илъэсэу икIыгъэм пшъэрылъэу зыфигъэуцужьыгъагъэхэр зэрэзэшIуихыгъэхэр зэфихьысыжьыгъэх. Ащ ипащэу Беданэкъо Валерий зигугъу къышIыгъэхэм ащыщ къуаджэм иурамхэу асфальт зытелъхэр зэкIэ зэрагъэцэ­кIэжьыгъэхэр.

Чылэм ичIыпIэ заулэмэ асфальт атыралъхьагъ. Андырхъуаем ыкIи Гагариным ацIэхэр зыхьырэ урамхэм ягъэ­кIэжьынкIэ проектхэр агъэхьазырыгъэх. Чылэ гъогухэм якъэгъэнэфыни ащыгъу­пшагъэп, икIыгъэ илъэсым изакъоу остыгъи 120-рэ агъэуцугъ. Пыдзафэу гъогухэм ащызэхахъорэр OOO-у «ЭкоЦентрэм» дищынэу зэзэгъыныгъэ да­шIыгъ.

Къуаджэм ыкIи къутырхэм ащыпсэухэрэм Хьакурынэхьэблэ къоджэ псэупIэм иадминистрацие Iофэу ышIагъэр янэрылъэгъу. Къихьэгъэ илъэсми телъы­тэгъэ Iофыгъохэр агъэнэфагъэх.

Валерий къызэрэхигъэщыгъэу, ахэм язэшIохынкIэ къэралыгъо программэхэм, лъэпкъ проектхэм яшIуагъэ къякIыным щэгугъых. Ахэм ямызакъоу, ежьхэми афэлъэкIыщтыр ашIэ. — ЗэрэтфэлъэкIэу IофшIэнэу къэуцухэрэр зэшIотхыщтых, — къытиIуагъ Валерий.

Ахэр IэшIэх афэхъунхэу тэри афэтэIо.

Шъаукъо Аслъангуащ.