Республикэу Татарстан и Раисэу Рустам Миннихановымрэ Адыгэ Республикэм и ЛIышъхьэу КъумпIыл Муратрэ IофшIэгъу зэIукIэгъу Казань щызэдыряIагъ.

Рустам Миннихановым Къум­пIыл Мурат шIуфэс къырихи, шъолъыритIумэ язэфыщытыкIэхэм ягъэпытэнкIэ кIэщакIо зыфэхъугъэхэ Iофтхьабзэхэм къадыригъэштагъ. Урысыем ишъо­лъыр пэрытхэу зипромышленность хэхъоныгъэшхо зышIыгъэхэм ащыщ, чIыдэгъэ промышленность, нефтехимие зэтегъэпсыхьагъэ зиIэ Татарстан фэгъэхьыгъэу республикэм и Раис кIэкIэу къафиIотагъ. Инновационнэ, производственнэ инфраструктурэм игъэпсын яшъыпкъэу ыуж итых. Мэкъумэщ продукцие лъэпкъ шъхьаIэхэу ищыкIагъэм фэдиз ежь республикэм къыщахьыжьы, мыхьарам шхыныгъохэм якъыдэгъэ­кIын зырагъэушъомбгъу.

Адыгеимрэ Татарстанрэ ащы­псэухэрэм бэшIагъэу блэгъэ­ныгъэ зэфыщытыкIэхэр зэрэ­зэдыряIэм, лъэпкъ зэгурыIоныгъэр Адыгеим щыгъэпытэгъэным къэндзалхэм яIахьышIу зэрэхашIыхьэрэм Адыгэ Респуб­ликэм и ЛIышъхьэ анаIэ тыраригъэдзагъ. Культурэ-просвет­ительскэ обществэу «Дуслык» зыфиIоу илъэсыбэ хъугъэу Адыгеим щызэхэщагъэм, респуб­ликэм исоциальнэ щыIэныгъэ чанэу хэлажьэрэм, Адыгеим ис къэндзал нэбгырэ мини 2,5-рэ фэдиз зыхахьэрэм зэдэлэжьэныгъэ пытэ зэрэдыряIэр ащ къыхигъэщыгъ. Къэндзал общественнэ организациехэм Iэпы­Iэгъу зэрафэхъухэрэм фэшI Рустам Миннихановым Адыгеим ипащэхэм зэрафэразэр къыIуагъ.

КъумпIыл Мурат Адыгеим хэхъоныгъэу, гъэхъагъэу иIэхэм къатегущыIагъ. ГущыIэм пае, зэхэугъоегъэ продуктэу республикэм къыщахьыжьырэм хэхъуагъ, инвестициехэмкIэ рейтингым Адыгеим я 13-рэ чIыпIэр щиубытыгъ. Организациехэм мылъкоу зэрагъакIорэмкIэ (проценти 125,7-рэ), унэхэм ятынкIэ (проценти 152,4-рэ), псэолъэшIынымкIэ (проценти 141,5-рэ), промышленнэ къыдэгъэкIыным ииндекскIэ (проценти 112,5-рэ) Адыгэ Республикэм Къыблэ федеральнэ шъолъырым апшъэрэ чIыпIэхэр щиIыгъых.

«Тиреспубликэ иэкономикэ, ипромышленнэ амалхэм ахэ­гъэхъогъэнымкIэ джыри пшъэ­рылъыбэ зэшIотхын фаеу хъущт. Промышленностми, нэмыкI лъэ­ныкъохэми IофшIэкIэ амалышIоу ащышъуиIэхэр тирес-пуб­ликэ зэригъашIэхэ шIоигъу. Ти­шъолъырхэм хэхъоныгъэ язы­гъэшIыщт нэмыкI лъэныкъохэри къыхэдгъэщынэу тыфай», — къыIуагъ КъумпIыл Мурат.

Адыгеим и ЛIышъхьэ зэри­лъытэрэмкIэ, индустриальнэ паркхэм ягъэпсынкIэ ахэр зэ­дэлэжьэнхэ алъэкIыщт. Энергетикэм, химием, машинэшIыным, нэмыкIхэм научнэ-производственнэ кластерхэр ащызэхэщэгъэнхэмкIэ, кадрэхэр зы­щагъэхьазырхэрэ гупчэхэмкIэ, научнэ-ушэтэкIо институтхэмкIэ, промышленнэ комплексхэмкIэ Татарстан опытышхо иI.

«Предпринимательствэм IэпыIэгъу егъэгъотыгъэнымкIэ, экономикэм ищыкIэгъэ кад­рэхэм ягъэхьазырынкIэ Iоф­шIэкIэшIоу тиIэмкIэ тадэгощэнэу сыдигъуи тыхьазыр, — къыIуагъ Рустам Миннихановым. — Цифрэ технологиехэр къызыфэгъэфедэгъэнхэр тизэдэлэжьэныгъэкIэ мэхьанэшхо зиIэ лъэныкъохэм ащыщ. МыщкIэ опытэу тиIэмкIэ тадэгощэнэу тыхьазыр».

Рустам Миннихановым федеральнэ сатыушIыпIэу «ЗаказРФ» зыфиIорэм амалэу иIэхэм афэгъэхьыгъэу къыIотагъ. Электрон сатыумкIэ технологиехэр къызфагъэфедэхэзэ, проектэу «Республиканский маркетинговый центр — центр импортоза­мещения» зыфиIорэр агъэцакIэ.

IофшIэкIэшIоу яIэхэмкIэ зэхъо­­­жьыгъэнхэм фэшI пшъэдэ­кIыжь зыхьыщт IофышIэхэр гъэ­нэфэ­гъэн, предложениехэм икъоу ахэплъэгъэн фаеу лъэныкъохэм игъо алъэгъугъ. Мы илъэсым ижъоныгъокIэ мазэ Адыгеим илIыкIохэр федеральнэ экономикэ форумэу «Kazan­Forum» зыфиIорэм хэлэжьэнхэ ямурад.

АР-м и ЛIышъхьэ ипресс-къулыкъу