Росстатым, УФ-м псауныгъэр къэухъумэгъэ­нымкIэ и Министерствэ, финансхэмкIэ и Министерствэ, Центробанкым къатыгъэ пчъагъэхэм атетэу агентствэу РИА Рейтинг 2021 — 2022-рэ илъэсхэм Урысыем ишъолъырхэм щыIэкIэ-псэукIэу яIагъэм къыпкъырыкIызэ рейтинг зэхигъэуцуагъ.

Адыгэ Республикэм я 22-рэ чIыпIэр ащ щеубыты, баллэу къыхьыгъэр 58-рэ. 2021-рэ илъэсым егъэпшагъэмэ, респуб­ликэм рейтингым чIыпIэу щи­Iыгъыгъэм зэхъокIыныгъэ фэ­хъугъэп.

Рейтингыр зэхагъэуцо зэхъум лъэныкъо 67-рэ къыдалъытагъ. Ащ хэхьэх цIыфхэм федэу къа­IэкIэхьагъэр, IофшIэн яIэ-ямы­Iэр, цIыфхэм псэукIэ амалэу яIэр, демографиемкIэ Iофхэм язытет, гъэсэныгъэр зынэсы­гъэр, социальнэ инфраструктурэм ипсэуалъэу яIэхэр, экономикэм, бизнес цIыкIум яхэ­хъоныгъэ зынэсыгъэр, транс­порт инфраструктурэм зызэрэ­рагъэушъомбгъугъэр.

АР-м и ЛIышъхьэ къызэ­рэхигъэщыгъэмкIэ, Адыгеим гъэхъагъэу иIэхэр а пчъагъэхэм къаушыхьаты. ГущыIэм пае, пстэумкIи республикэм зэхэубытагъэу къыщахьыжьырэ продуктым хэхъуагъ, инвестициехэу къыхалъхьэрэмкIэ Адыгеим я 13-рэ чIыпIэр рейтингым щиубытыгъ. Организациехэм мылъкоу зэрагъакIорэм (проценти 125,7-рэ), унэу атыгъэм (проценти 152,4-рэ), псэолъэшIыным (проценти 141,5-рэ), промышленнэ производствэм ииндекс (проценти 112,5-рэ) зэрэхахъорэмкIэ Адыге­им Къыблэ федеральнэ шъолъырым апшъэрэ чIыпIэхэр щиIыгъых.