Адыгеим икъушъхьэ чIыпIэхэм ошIэ-дэмышIэу лъэшэу къащыучъыIи, ос зэхэлъыр къызэращецохъохыгъэм къыхэкIэу, Мыекъуапэ псэу къыIэкIахьэрэм къыщыкIагъ.

Къэлэ администрацием ипресс­-къулыкъу къызэриты­гъэмкIэ, псыр зыщызэIуагъа­кIэрэм итыр зыпкъ иуцожьыным, фабэр унэхэм къязыты­хэрэм, социальнэ псэуалъэхэм яIофшIэн къызэтемыуцоным афэшI ошIэ-дэмышIэ Iоф къэмыхъуным ыкIи ащ къыздихьыгъэ гумэкIыгъохэр дэгъэзыжьыгъэнхэм фэгъэзэгъэ Комиссием график гъэнэфагъэкIэ псыр къэтыгъэнэу унашъо ышIыгъ.

Ащ къызэрэдэлъытагъэмкIэ, мафэ къэс, пчэдыжьым сыхьатыр 6-м къыщыублагъэу 9-м нэс, пчыхьэм сыхьатыр 7-м къыщыублагъэу 10-м нэс псыр къаты. Адрэ уахътэм ащ икIуа­пIэхэм давлениеу яIэр агъэмэкIэщт. Мэзаем и 13-м къыщегъэжьагъ графикыр зыщыIэр.

Ащ фэдэ гъунапкъэхэр Мые­къуапэ игупчэ, «Шовгеновский городок», «Михайлово» зыфиIорэ районхэр, урамэу Железнодорожнэм шъхьапыры­дзыгъэу «ятIонэрэ урамкIэ» за­джэхэрэм ащыпсэухэрэр ары зынэсыщтхэр. Фэтэрыбэу зэхэт унэхэм яапэрэ къатхэм псы яIэщт, ау ышъхьагъ тесхэм аIэкIэхьащтэп.

ЗыщищыкIагъэм псы къабзэ къафащэщт. Къалэм ирайонэу «Черемушкэм», поселкэу Западнэм, станицэу Ханскэм, къутырхэу Гавердовскэм, Веселэм адэсхэм «артизианскэ» псыкъычIэщыпIэм псэу зэшъощтхэр къаIэкIегъахьэшъ, ахэр гъунапкъэхэм къахиубытэхэрэп.

УпчIэ зиIэр «Мыекъопэводоканалым» къытеон ылъэкIыщт. Мары телефоныр: 8(8772)52-26-09.