УФ-м и Правительствэ медицинэм иIофышIэхэм апае хэушъхьафы­кIыгъэ социальнэ тынхэр мы илъэсым ыгъэнэфагъ. Ахъщэ тедзэр зыфашIыщтхэр псауныгъэр къэухъумэгъэнымкIэ къэралыгъо системэм хахьэхэрэр ыкIи шIокI зимыIэ медицинэ страхованием ипрограммэ хэлажьэхэрэр ары. Мыщ къытегущыIагъ АР-м псауныгъэр къэухъумэгъэнымкIэ иминистрэ игуадзэу Хьагъэудж Марыет.

Ахъщэ тедзэхэр зэратыщтхэр:

— гупчэ район сымэджэщхэм яврачхэр ыкIи гурыт медицинэ IофышIэхэр;

— участковэ врачхэр, участковэ терапевтхэр, участковэ педиатрэхэр, ахэм ягъусэу Iоф зышIэрэ гурыт медицинэ IофышIэхэр, джащ фэдэу диспансер лъыплъэным фэгъэзэгъэ врачхэр;

— IэпыIэгъу псынкIэм ыкIи диспансер учетым хэт сымаджэхэр зиIэ хэушъхьафыкIыгъэ медицинэ гупчэхэм яIофышIэхэр.

Ахъщэ тынхэр зэрамытыщт­хэр:

— учреждениехэм япащэхэр ыкIи ахэм ягуадзэхэр;

— медикхэу IофшIэпIитIу зэдэзыхьыхэрэр.

— Ахъщэ тедзэу аратыщтым ибагъэ IофышIэм ыкIи IофшIэн языгъэгъотырэм иIэ категорием елъытыгъэщт. Ар зыфэдизыщтыр мазэм сомэ мини 4,5-м къыщегъэжьагъэу мин 18,5-м нэс.

Техническэ ушъхьагъу горэхэм япхыгъэу IофышIэм а ахъщэр апэрэ мазэм, мэзитIум къырамытыгъэми, зэхэубытагъэу къыкIэлъыкIорэ мазэм къыратыжьыщт, — къыIуагъ Хьагъэудж Марыет. ХэушъхьафыкIыгъэ социальнэ тынхэр 2023-рэ илъэсым щылэ мазэм и 1-м къыщегъэжьагъэу агъэнэфагъэх.

Ахъщэр зэрэгощыгъэщтыр:

— сомэ мин 18,5-р — гупчэ район, район ыкIи участковэ сымэджэщхэм яврачхэр;

— сомэ мин 14,5-р — поликлиникэхэм ыкIи псауныгъэр къэухъумэгъэным иапэрэ звено хэхьэрэ амбулаторнэ учреждениехэм яврачхэр;

— сомэ мин 11,5-р — IэпыIэгъу псынкIэм иотделениехэм е истанциехэм яврачхэр, джащ фэдэу медицинэм емыпхыгъэ апшъэрэ гъэсэныгъэ зиIэ врачхэу ыкIи медицинэ Iофы­шIэхэу гистологическэ ыкIи цитологическэ ушэтынхэр зы­шIыхэрэр;

— сомэ мини 8-р — гупчэ район ыкIи участковэ сымэ­джэщхэм Iоф ащызышIэрэ медсестрахэр;

— сомэ мини 7-р — IэпыIэгъу псынкIэм ифельдшерхэр ыкIи имедсестрахэр;

— сомэ мини 6,5-р — гурыт гъэсэныгъэ зиIэ медицинэ IофышIэхэу поликлиникэхэм ыкIи псауныгъэр къэухъумэгъэным иапэрэ звено хэхьэрэ нэмыкI учреждениехэм Iоф ащызышIэхэрэр;

— сомэ мини 4,5-р — гупчэ район ыкIи участковэ сымэ­джэщхэм, поликлиникэхэм ыкIи нэмыкI учреждениехэу апэрэ звеном хахьэхэрэр, джащ фэдэу IэпыIэгъу псынкIэм аIут младшэ медицинэ

IофышIэхэр, IэпыIэгъу псынкIэм ителефонхэр къэзыIэтырэ фельдшерхэр ыкIи медсестрахэр.

Ахъщэ тедзэ тынхэр медицинэм иIофышIэхэм аратынхэм фэшI къэралыгъом сомэ миллиарди 152-рэ къыхигъэкIыгъ.