Адыгеим иеджапIэхэм агъэфедэрэ мэзхэр анахь дэгъух
Мэз хъызмэтымкIэ федеральнэ Агентствэм «ЕджапIэхэм агъэфедэрэ мэзхэр» зыфиIорэ Урысые зэнэкъокъоу заочнэ шIыкIэм тетэу зэхащэгъагъэм зэфэхьысыжьхэр фишIыгъэх. Анахь дэгъукIэ зыцIэ къыраIуагъэхэм Адыгеим илIыкIохэр ахэфагъэх.
«ЕджапIэхэм агъэфедэрэ мэзхэм зэрадэлажьэхэрэр» зыфиIорэ номинациемкIэ къыхагъэщыгъэр Красногвардейскэ гимназиеу N 1-м имэз хъызмэтэу «Мэзхэм яухъумакIох» зыфиIорэм ипащэу Александра Креховар ары.
«ЕджэпIэ мэзхэр гъэфедэгъэным шIэныгъэзехьэ Iофэу пылъыр» зыфиIорэ номинациемкIэ Мыекъопэ районым ит поселкэу Каменномостскэм игурыт еджапIэу N 7-м щызэхащэгъэ хъызмэтэу «Мэзпэс ныбжьыкI» зыфиIорэм ипащэу Анна Петуховам шIухьафтыныр къылэжьыгъ.
«Республикэм ит еджапIэхэм мэзэу агъэфедэхэрэм зарэдэлажьэхэрэм хэхъоныгъэ едгъэшIыныр типшъэрылъ къодыеу щытэп. КъыткIэхъухьэрэ лIэужым экологиер зыфэдэр ышIэу, мэз Iофхэм, ащ епхыгъэ сэнэхьатхэм ащыгъуазэу пIугъэнхэр, мэзми нахь фэсакъыхэ хъуныр къыдэтэлъытэ», — къыщаIуагъ АР-м мэзхэмкIэ и ГъэIорышIапIэ.