Мыекъопэ районым чIыпIищ щагъэцэкIэжьыщт
«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу Адыгеим и Мыекъопэ район игъогу Iахьищ 2023-рэ илъэсэу къихьагъэм агъэцэкIэжьыщт.
Поселкэу Табачнэм екIурэ гъогоу агъэкIэжьыщтыр километри 3,1-рэ мэхъу, поселкэу Краснооктябрьскэм икIэу станицэу Дагестанскэм екIурэм щыщ Iахьэу агъэцэкIэжьыщтыри ащ фэдиз, километри 2,7-рэ икIыхьагъ Мыекъуапэ икIэу ТIуапсэ кIорэ автомобиль гъогум щыщэу ашIыжьыщтым.
Джащ фэдэу къутырэу Дьяковым екIурэ гъогум щыщэу зы километрэм, псэупIэу Гражданскэм екIуалIэрэм иIахьэу километри 2,34-м ателъ асфальтыр зэблахъущт.
Ащ тетэу, лъэпкъ проектым ишIуагъэкIэ, 2023-рэ илъэсым ишышъхьэIу мазэ нэс Мыекъопэ районым пстэумкIи гъогу километрэ 12,250-рэ щагъэкIэжьыщт. ПстэумкIи сомэ миллиони 160-рэ ащ пэIуагъэхьащт.
«Адыгеяавтодорым» ипащэу Алексей Корешкиным къызэриIуагъэмкIэ, пIалъэхэм апэ итхэу гъогухэм ягъэкIэжьын лъагъэкIуатэ. Мыгъэ ашIыжьыщт гъогу Iахь 23-у агъэнэфагъэр къыкIэлъыкIорэ 2024-рэ илъэсым агъэцэкIэжьын фэягъэхэм ащыщых. IофшIэнхэр ыпэ итхэу агъэцакIэхэми, цIыфхэр зыщыгугъухэрэм анаIэ тырагъэтыным, псэукIэ амал тэрэзхэр ятыгъэнхэм фэгъэхьыгъэ унашъоу АР-м и ЛIышъхьэ къышIыгъэр къыдалъытэ.
Гъогухэм чIыпIэ анахь дэеу яIэхэр къыхахызэ агъэкIэжьхэмэ, лъэпкъ проектым къызэрэдэлъытагъэм тетэу, шэпхъэшIухэм адиштэрэ гъогоу республикэм иIэр нахьыбэ мэхъу. Мы уахътэм Iофхэм язытет игугъу пшIымэ, шъолъыр ыкIи муниципальнэ автомобиль гъогоу Адыгеим иIэм ипроцент 59,62-р шэпхъэшIухэм адиштэ хъугъэ.
Къыхэгъэщыгъэн фаер, поселкэу Краснооктябрьскэм икIэу станицэу Дагестанскэм кIорэ гъогу Iахьэу агъэцэкIэжьыщтыр республикэм ичIыпIэ дахэу зекIоныр зикIасэхэр къыздакIохэрэм, гущыIэм пае, Хьаджыкъо къушъхьэ тIуакIэм, Рыфабгъо ипсыкъефэххэм, нэмыкIхэм якIухэрэм зэрэщыщыр ары.
Джащ фэдэу Мыекъуапэ икIэу ТIуапсэ кIорэ гъогум иIахьэу шъолъыр мэхьанэ зиIэр Адыгеим ыкIи гъунэгъу субъектхэм арыкIэу хы ШIуцIэ Iушъом кIохэрэм агъэфедэ.
Адыгеим ичIыпIэ дахэу зекIоныр зикIасэхэмкIэ анахь хъопсагъохэм ыкIи Краснодар краим изыгъэпсэфыпIэ чIыпIэхэм якIурэ гъогухэм яшIын, ягъэцэкIэжьын ыкIи яIыгъын епхыгъэ IофшIэнхэр республикэм ипащэхэм зэкIэлъыкIоу агъэцакIэх, лъэпкъ проектым къыдэлъытэгъэ мылъкум ащкIэ ишIогъэшхо къэкIо.