Бэрэ тызэжэгъэ осыр къытфэкIуагъ. Гъогухэр техникэм етIупщыгъэу етхъух нахь мышIэми, пыдзэфэ пытэхэр зэрахьылIэрэ чIыпIэхэм ащыщхэм уякIолIэн плъэкIырэп. Ащ пае шъолъыр операторым хэкIыр дэзыщырэ транспортым изекIон зэхъокIыны­гъэхэр фишIыгъэх.

— Ом зызэрэзэблихъурэм диштэу хэкIыр зэрэ­дэтщырэ графикыр зэтхъокIын фаеу мэхъу. Тиспециа­листхэмрэ район ыкIи къэлэ администрациехэм ялIыкIохэмрэ зэпхыныгъэ зэдыряIэшъ, цIыфхэм пыдзэфэ пытэхэр къызэрахьылIэрэ чIыпIэу екIолIапIэ зимыIэхэм ащытэгъэгъуазэх, къагъэкъабзэхэшъ, хэкIыр аIутэщы, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый.

Шъолъыр операторым шъугу къегъэкIыжьы, пы­дзафэхэр игъом дащынхэм фэшI ахэр зыщыратэ­къущтхэ чIыпIэхэм екIолIапIэ яIэн фае.

ООО-у «ЭкоЦентрэм» и Адыгэ шъолъыр къутамэ ипресс-къулыкъу.