Адыгэ Республикэм и ЛIышъхьэу КъумпIыл Мурат зипэщэгъэ лIыкIо купыр Республикэу Баш­кортостан щыIагъ. Башкортостан и Пащэу Радий Хабировым зыIокIэхэм, лъэныкъуитIу зэфы­щытыкIэхэм яхэхъоныгъэ иIофыгъохэм атегущыIагъэх, зэдэлэжьэныгъэм епхыгъэ зэзэгъыныгъэм кIэтхагъэх ыкIи псэолъэ заулэмэ ащыIагъэх.

ЛIыкIо купым хэтыгъэх Адыге­им ыцIэкIэ сенаторхэу Александр Наролинымрэ Хъопсэ­рыкъо Муратрэ, АР-м экономикэ хэхъоныгъэмкIэ ыкIи сатыум­кIэ иминистрэу Шэуджэн Заур, компание купэу «Ромекс GROUP» зыфиIорэм и Президентэу Алексей Прокопенкэр.

Пстэуми апэу генерал-майорэу Минигали Шаймуратовым исаугъэт къэгъагъэхэр кIэлъыралъхьагъэх. Мы саугъэтыр я 112-рэ Башкирскэ кавалерийскэ дивизием икомдив цIэрыIо, джащ фэдэу Хэгъэгум иухъу­мэкIо пстэуми афэгъэхьыгъ.

Программэм хэтыгъэх ин­дустриальнэ паркэу «Уфимский» зыфиIорэр, шъолъыр гъэIоры­шIэнымкIэ Гупчэр зэрагъэлъэгъунхэр, Адыгеимрэ Башкор­тостанрэ язэдэлэжьэ­ныгъэкIэ амалэу щыIэхэм атегущыIэнхэр, IофшIэкIэшIумкIэ зэхъожьынхэр. Шъолъырхэм азыфагу илъ зэ­дэлэжьэныгъэм игъэпытэн мэхьанэшхо зэриIэр республикэхэм япащэхэм хагъэунэфыкIыгъ.

«Непэрэ зэIукIэгъур зэрэзэ­хэтщагъэр лъэшэу гуапэ тщы­хъугъ. Ащ фэдэ зэхахьэхэм мэ­хьанэшхо яI тизэфыщытыкIэхэр нахьышIу хъунхэмкIэ, товарэу зэIэкIэдгъахьэрэр на­хьыбэ шIыгъэнымкIэ, ащ дакIоу IофшIэнэу зэдэдгъэцэкIэщтым епхыгъэ амалыкIэхэри щыIэ мэхъух. Непэ индустриальнэ паркэу «Уфимский» зыфиIорэм тыщыIагъ, ащ фэдэ чIыпIэхэм язэхэщэнкIэ опытэу тиIэ хъугъэмкIэ тыжъудэгощэным тыфэхьазыр, — къыIуагъ Радий Хабировым. — Баш­кортостан иэкономикэ псынкIэу хэхъоныгъэ ешIы. Адыгеим къи­­кIыгъэхэм IофыгъуабэхэмкIэ тызэрадэлэжьэщтым, IофшIэ­кIэшIоу бгъуитIумкIи тиIэ хъугъэ­хэмкIэ тызэхъожьыным тыфэ­хьазыр. ЗекIоным, мэкъу-мэщым, культурэм алъэныкъокIэ гъэшIэгъонэу а зэдэлэжьэны-гъэр зэхэтщэн тлъэкIыщт».

Адыгеим и ЛIышъхьэ къызэрэхигъэщыгъэмкIэ, шъолъыритIумэ бэ зэфэдэу ахэлъыр, лъэныкъуабэхэмкIэ шIуагъэ къэ­зытыщт зэдэгущыIэгъу зэдыряIэным иамали ащ къеты. «Непи къэтIон тлъэкIыщт ти­зэфыщытыкIэхэр нахьышIу, нахь пытэ зэрэхъухэрэр. Башкортостан дытиIэ блэгъэныгъэ зэ­фыщытыкIэхэмрэ зэдэлэжьэныгъэмрэ тэгъэлъапIэх. Тызэгъусэу Iоф зэдэтшIэнымкIэ амалышхо­хэр зэрэщыIэхэр тинэрылъэгъу. Адыгеим проект инитIу щызэшIотэхы. Пстэуми апэу ар гъэ­псэфыпIэу «Лэгъонакъэ» зыфиIорэр ары. Республикэм зекIоным ылъэныкъокIэ ихахъо­хэр хэпшIыкIэу нахьыбэ хъунхэм иамал ащ къытыщт. 2025-рэ илъэсым ехъулIэу псэуалъэм иапэрэ чэзыу тыухынэу ары. ЯтIонэрэ проектышхор зэпхыгъэр индустриальнэ паркым ишIын. Арышъ, непэ паркэу «Уфимскэм» тыкъызэрэкIуа­гъэм, шъуиопыт зыщыдгъэгъуазэ зэрэтшIоигъом мэхьэнэ гъэнэфагъэ яIэу щыт», — къыIуагъ КъумпIыл Мурат.

ШъолъыритIумэ амалэу яIэхэр зэдагъэфедэхэмэ, рес­пуб­ликитIуми яэкономикэ нахь зы­къызэриIэтыщтыр, цIыфхэм ящыIакIи нахьышIу зэрэхъущтыр Адыгеим и ЛIышъхьэ къыхи­гъэщыгъ.

Ащ нэужым игъэкIотыгъэ зэIукIэу рекIокIыгъэм хэлэжьагъэх республикэу Башкортостан и Правительствэ хэтхэр, бизнесым илIыкIохэр. КъызэраIуагъэмкIэ, экономикэм, культурэм, зекIоным алъэныкъокIэ 2019-рэ илъэсым зэдашIыгъэгъэ зэзэ­гъыныгъэхэр гъэцэкIагъэ зэрэ­хъущтхэм инэшанэхэр нэры­лъэгъух. ГущыIэм пае, лъэхъа­нэу ащ ыуж тешIагъэм къы­кIоцI Адыгеим ибизнес илIыкIохэр я V-рэ юбилейнэ дунэе форумэу хэгъэгубэмэ ябизнес цIыкIурэ ягурытрэ япхыгъэм хэлэжьэ­гъагъэх. Адыгеим имузыкантхэр патриотическэ орэдым и Урысые фестивалэу «Время Ге­роев» зыфиIорэм щыIагъэх. Ар Уфа щыкIогъагъ. Ащ нэмыкIэу кIэлэцIыкIухэм языгъэпсэфынрэ япсауныгъэ игъэпытэнрэ алъэныкъокIэ шъолъыритIумэ азыфагу илъыщт зэдэлэжьэныгъэм фэгъэхьыгъэ зэзэгъыныгъэм кIэтхагъэх.

Сатыу-экономикэ зэпхыныгъэхэм адиштэу Адыгеим гъомылэпхъэ лъэпкъ зэфэшъхьаф­хэр Башкирием IэкIегъахьэх. Ахэм ахэхьэх адыгэ къуаеу цIэрыIо хъугъэр, гъэщым хэшIыкIыгъэхэр, кIэлэцIыкIухэм апае пхъэшъхьэ-мышъхьэхэмрэ хэтэ­рыкIхэмрэ ахэшIыкIыгъэ шхыныгъохэр, адыгэ щыгъур. Рес­публикэу Башкортостан нахьыбэрэмкIэ Адыгеим производственнэ-техническэ мэхьанэ зиIэ товархэр ары къыIэкIи­гъахьэхэрэр: дизельнэ гъэстыныпхъэр, бензиныр.

Товарэу зэIэкIагъахьэрэр на­хьыбэ шIыгъэным анаIэ зэ­рэтырагъэтыщтыр, щыIэныгъэм илъэныкъо зэфэшъхьафхэмкIэ язэпхыныгъэхэм зызэрарагъэу­шъомбгъущтыр бгъуитIуми къыхагъэщыгъ. Ащ пае Адыгеим и ЛIышъхьэрэ Башкортостан и Пащэрэ сатыу-экономикэ, научнэ-техническэ ыкIи социальнэ-культурнэ зэдэлэжьэныгъэу республикитIумэ азыфагу илъы­щтым фэгъэхьыгъэ Зэзэгъыныгъэм кIэтхэжьыгъэх. Ащ къыделъытэх инвестиционнэ Iоф­шIэнымкIи Iофтхьабзэу зэшIуа­хыщтхэр, мэкъу-мэщым, промышленностым, унэ-коммунальнэ хъызмэтым, зекIоным, гъэсэныгъэм, культурэм, спортым, ныбжьыкIэ ыкIи лъэпкъ политикэм алъэныкъокIэ, къэбар жъугъэм иамалхэмкIэ, информатизациемкIэ, научнэ ушэтынхэмкIэ, инновациехэмкIэ ыкIи нэмыкIхэмкIэ зэшIуахыщтхэр.

«Джырэ лъэхъаным Iофхэм язытет зыфэдэ хъугъэм укъы­пкъырыкIын фае, лъэныкъо зэ­фэшъхьафхэмкIэ цыхьэшIэгъу гъусэгъухэм талъымыхъумэ хъу­щтэп. Ахэр гуманитар, соци­альнэ, экономикэ ыкIи культурнэ лъэныкъохэм япхыгъэнхэ фае. Хэгъэгубэмэ акIыб къытфагъэзагъ, тэр-тэрэу амалыкIэ­хэр къэтэгъотых ыкIи рес­пуб­ликэм имызакъоу, нэмыкIхэми тызэрадэлэжьэщтым илъэныкъо зэфэшъхьафхэр къыдэтлъытэнхэ фаеу мэхъу. Адыгеими, тэри унаIэ зытебдзэн плъэ­кIыщт опытышIу тиIэ хъугъэ. Нахьыбэрэ тызэхэхьан, зым зыр нахь зэрэдэIэпыIэщтым тынаIэ тедгъэтын фае. Мы зэIукIэгъум республикитIумэ, тицIыфхэм азыфагу илъ зэфыщытыкIэхэр зэригъэпытэщтхэм тицыхьэ телъ», — къыIуагъ Радий Хабировым журналистхэм гущыIэгъу за­фэ­хъум.

«БэшIагъэ тизэфыщытыкIэхэр щыIэ зыхъугъэхэр. ТапэкIэ Баш­кортостан илIыкIохэр Адыгеим ригъэблагъэхэу къыхэкIыгъ, зэдэлэжьэныгъэм илъэныкъохэм татегущыIэу хъугъэ. Непэ зичэзыу лъэбэкъухэр итхъухьагъэх. Культурэм къыщыублагъэу экономикэм нэсыжьэу бэ зэпэблагъэу тиIэр. Блэгъэныгъэ-зэпхыныгъэу, сатыу-экономикэ зэфыщытыкIэу тиIэхэм, бизнесым ылъэныкъокIэ, культурэм, гъэсэныгъэм япхыгъэ опытэу тиIэ хъугъэм такъыпкъырыкIызэ, тишъолъыритIумэ ясоциальнэ­-экономикэ хэхъоныгъэ кIочIакIэ зэрэхэтлъхьащтым сицыхьэ телъ», — къыIуагъ АР-м и ЛIышъхьэ.

Адыгэ Республикэм и ЛIышъхьэ ипресс-къулыкъу