Мэзаем и 10-м Адыгеим шъолъыр гъэIорышIэнымкIэ и Гупчэ семинар-зэхысыгъоу «Политики новой волны: перспективы развития в 2023-м году» зыфиIорэр зэхищагъ. Ащ хэлэжьагъэх АР-м и ЛIышъхьэ и Администрацие, министрэхэм я Кабинет хэтхэр, гъэцэкIэкIо хэбзэ ыкIи чIыпIэ зыгъэIорышIэжьыпIэхэм якъулыкъухэм ялIыкIохэр.

Анахьэу зытегущыIагъэхэр шъолъыр гъэIорышIэнымкIэ Гупчэм ыкIи къэралыгъо хабзэм икъулыкъухэм икIыгъэ илъэсым яIофшIэн зэфэхьысыжьыгъэныр ыкIи 2023-рэ илъэсым интернетым епхыгъэу япшъэрылъхэр шIуагъэ къытэу гъэцэкIэгъэнхэр ары.

ШIуфэс гущыIэхэмкIэ къэзэрэугъоигъэхэм закъыфигъэзагъ Адыгеим шъо­лъыр гъэIорышIэнымкIэ и Гупчэ ипащэу Къоджэшъэо Казбек.

— Къихьэгъэ илъэсым зэ­хъокIыныгъакIэу къыздихьы­гъэхэм ащыщ гъэцэкIэкIо хэбзэ ыкIи чIыпIэ зыгъэIорышIэжьыпIэхэм якъулыкъухэм якъэгъэлъэ­гъонхэм занкIэу епхыгъэщт АР-м и ЛIышъхьэ ирейтинг зыфэдэщтыр, — къыIуагъ Къо­джэшъэо Казбек. — ЛъэгэпIэшIухэм танэсыным фэшI мэхьанэшхо зиIэр социальнэ хъытыухэр ары.

ЦУР-м ипащэ япшъэрылъ шъхьаIэ къыхигъэщыгъэр цIыфхэм хабзэм икъу­лыкъухэм зызэрафагъэзагъэмкIэ ищыкIэгъэ джэуапыр игъом агъотыжьыныр ыкIи зэпхыныгъэу азыфагу илъыр на­хьышIу шIыгъэныр ары. Ащ пае, «Платформа обратной связи» зыфиIорэ виджетыр ыкIи социальнэ хъытыухэр агъэфедэх. Нэужым Iофыгъор зэшIуахыным фэшI ащ фэгъэзэгъэ министерствэм е организацием рагъэхьы.

ИкIыгъэ илъэсым шъолъыр гъэIорышIэнымкIэ Гупчэм иIофшIэн зыфэдагъэм пащэр къытегущыIэзэ, къыхигъэщыгъэхэм ащыщ республикэм ит организацие 713-мэ къэралыгъо пабликхэр яIэ зэрэхъугъэр, социальнэ хъытыухэм официальнэ нэкIубгъо 2100-рэ къазэрэщызэIуахы­гъэр. ИщыкIагъэмэ гупчэм егъэджэнхэр мы лъэныкъомкIэ зэхещэх.

— НэкIубгъохэр къызэIутхын закъор арэп мэхьанэ зиIэр, ахэм Iоф ядгъэшIэн фае. Проценти 100-м телъытагъэу процент 30-р ары ныIэп Iоф зышIэрэр, ащ тезэгъынэу щытэп. ГущыIэм пае, гъэсэныгъэмкIэ министерствэр тштэмэ, инэкIубгъо зэригъэпсырэмкIэ апэрэ чIыпIэр ыIыгъ. Илъэсым икIэуххэр зэфахьысыжьхэ зыхъукIэ, янэкIубгъохэм тэрэзэу Iоф арамыгъэшIагъэ зы­хъукIэ министерствэм икъоу ипшъэрылъ ыгъэцэкIагъэу алъы­тэщтэп, — къыIуагъ Къоджэшъэо Казбек.

Зэхэсыгъом зигугъу щашIыгъэхэм ащыщ «Политики новой волны» е анахь «зэIухыгъэ» IэнэтIэзехьэхэр зыфиIорэр. ИкIыгъэ илъэсым изэфэхьысыжьхэм къызэрагъэлъэгъуагъэмкIэ, ащ фэдэу алъытагъэхэр псауныгъэр къэухъумэгъэ­нымкIэ министрэу Мэрэтыкъо Рустем, АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевыр, Шэуджэн ыкIи Красногвардейскэ район администрациехэм япащэхэу Аулъэ Рэщыдрэ Гъубжьэкъо Темуррэ.

2023-рэ илъэсым пшъэрылъ шъхьаIэу зыфагъэуцужьыхэрэми ЦУР-м ипащэ къатегущыIагъ. Социальнэ хъытыухэу «Одноклассники», в «Вконтакте» зыфи­Iохэрэм якъэралыгъо пабликхэм организациехэр джыри пашIэщтых.

Джащ фэдэу «Дашборд» зыфиIоу зэхагъэуцуагъэм иIофшIэн зэрэзэтырагъэуцощтым ыуж итыщтых. Мыр лъэшэу Iэрыфэгъу дэдэу агъэпсыгъ, зы чIыпIэм зэхэфын зэфэхьысыжьыр щыугъоигъ. ГущыIэм пае, Адыгеим и ЛIышъхьэ «Дашбордыр» къызызэIуихыкIэ, цIыфым даоу социальнэ хъытыум къыригъэхьагъэр, ащ фэгъэзэгъэ пащэм джэуапэу къыритыжьыгъэр, зэшIохыгъэ зэрэхъугъэр, нэмыкIхэри зы кнопкэкIэ ылъэгъунхэ елъэкIы.

Нэужым егъэджэн сыхьатымкIэ Iоф­тхьабзэр лъагъэкIотагъ.

Iэшъынэ Сусан. Сурэтхэр Iэшъынэ Аслъан тырихы­гъэх.