Урысые шIэныгъэм и Мафэ фэгъэхьыгъэ зэхахьэ гуманитар ушэтын­хэмкIэ Адыгэ республикэ институтэу Т. КIэращэм ыцIэ зыхьырэм щы­кIуагъ.

Ар къызэIуихыгъ ыкIи зэ­рищагъ философие шIэныгъэ­хэмкIэ докторэу, институтым идиректорэу ЛIыIужъу Адам. Пащэр мэфэкIымкIэ коллективым къыфэгушIуагъ мэзаем и 8-р зэкIэ шIэныгъэ хьасэшхом щылажьэхэрэм ямэфэкI инэу, мэхьанэшхо зиIэу зэрэщытыр кIигъэтхъыгъ. IофшIагъэу яIэм, пшъэрылъэу зыфагъэуцужьы­гъэхэм кIэкIэу ягугъу къызэрашIыщтыр къыIуагъ. Проектхэм анахьыбэр гъэцэкIагъэ зэрэ­хъугъэр ыкIи ахэмкIэ гъэзагъэу, нахь куоу ахэр зэхэфыгъэнхэр, лэжьыгъэнхэр игъоу ылъэгъугъ. Илъэсэу икIыгъэм бзэзэгъэшIэным игумэкIыгъохэм язэхэфынкIэ Iофышхо зэрашIагъэр, тапэкIи ягухэлъхэр щытхъу хэлъэу зэшIуахынхэу, илъэсыкIэм шIэныгъэ гупшысэ гъэшIэгъонхэр пхыращынхэу къафэ­лъэIуагъ.

Филологие шIэныгъэхэмкIэ докторэу, институтым ипащэ игуадзэу Биданэкъо Марзят Iэнэ хъураем къиIотыкIынэу «Научная жизнь АРИГИ» зыфиIорэр къыщишIыгъ.

Джащ фэдэу институтым икIыгъэ илъэсым IофшIагъэу иIэхэм къащыуцугъ, научнэ Iофтхьэбзэ 14 зэрэзэхащагъэр къыIуагъ. Ахэр — конференциех, лъэтегъэуцох, Iэнэ хъураех. Дунэе конференции 4 ра­гъэ­кIокIыгъ: ныдэлъфыбзэм иухъумэн-хэгъэхъон, славян тхы­бзэм и Мафэ афэгъэхьыгъэ­хэр, нэмыкIхэри. ХьэдэгъэлIэ Аскэр ыныбжь илъэси 100 зэ­рэхъурэм епхыгъэу нартоведениемкIэ симпозиум тарихъымкIэ ыкIи дунэе щынэгъончъэнымкIэ гъэзагъэу Iофтхьэбзэ гъэшIэ­гъон зэхащэгъагъ. ЗэкIэ илъэсым къыкIоцI агъэцэкIагъэр Адыгеим къэралыгъо гъэпсыкIэ зи­гъотыгъэр илъэси 100 зэрэ­хъурэм зэрэфагъэшъошагъэр Мар­зят игущыIэ щыкIигъэтхъыгъ. ИкIыгъэ 2022-рэ илъэсымкIэ институтым ишIэныгъэлэжь нэбгырэ заулэмэ Г. Луган­скаям, А. Шъаукъом, Н. Денисовам ямонографиехэр, джащ фэдэу, «ШIэныгъэгъуаз» — «Вест­ник» зыфиIорэ журналэу статья зэфэшъхьафыбэ зыдэтыр, къызэрэдэкIыгъэхэр, егъэджэн IэпыIэгъухэр, гущыIалъэхэр кIэу яIэ зэрэхъугъэхэр къыриIотыкIыгъ. ТапэкIи мэхьанэ зиIэ проектхэм защаушэтызэ, наукэм хахъо фашIын гухэлъ зэряIэр кIигъэтхъыгъ, пстэуми мэфэ­кIымкIэ къафэгушIуагъ, псауныгъэ пытэ яIэнэу къафэлъэIуагъ.

МэфэкI Iэнэ хъураем зэкIэ институтым иотдел зэфэшъхьафхэм япащэхэр ыкIи яIофышIэхэр хэлэжьагъэх. Темэ зэфэшъхьафхэр къыщыраIотыкIыгъэх. ЗэкIэдэIукIыгъэх, зэхэгущыIэжьыгъэх, хэти ежь лъэныкъоу Iоф зыдишIэрэмкIэ гъэ­загъэу гупшысагъэ, гукъэ­кIыкIэхэр мэфэкI зэхахьэм къыгъэущыгъэх.

Мамырыкъо Нуриет. Сурэтхэр Iэшъынэ Аслъан тырихыгъэх.