Мэзаем и 6-м къыщегъэжьагъэу и 10-м нэс Урысые шIэныгъэм и Мафэ фэгъэхьыгъэ Iофтхьэбзэ зэфэшъхьафхэр АкъУ-м щызэхащагъэх.

К.Д.Ушинскэр къызы­хъугъэ мафэр илъэс 200 зэрэхъурэм фэгъэхьыгъэ Урысые научнэ конфе­ренцие рагъэкIокIыгъ, шIэ­ныгъэлэжь ныбжьыкIэхэр ащ хэлэжьагъэх. Джащ фэдэу зэлъашIэрэ шIэныгъэлэжьхэм агъэ­хьазырыгъэ зэIухыгъэ лекциехэр, мастер-классхэр, интеллектуальнэ джэгукIэхэр, Iэнэ хъураехэр зэхащэщтых. Анахь Iофтхьэбзэ инхэм ащыщ мэзаем и 8-м кIогъэ фестивалэу «Наукоград» зы­фиIорэр.

ШIэныгъэм фэгъэхьыгъэ тхьамафэр «Популяри­за­ция науки и продвижение деятельности СНО в сети» зыфиIорэ семинарымкIэ аублагъ. Ащ АКъУ-м и Студент шIэныгъэ обществэ хэтхэр хэлэ­жьа­гъэх. ДжэгукIэу «Self-presentation», нэужым мастер-классхэр, интеллектуальнэ джэгукIэхэр, воркшоп, Iэнэ хъураехэр зэхащагъэх. Адыгэ къэ­ралыгъо университетым ипрофессорэу, экономикэ шIэныгъэхэмкIэ кандида­тэу, физикэ-хьисап шIэныгъэхэмкIэ докторэу, шIэныгъэмкIэ Урысые ака­демием хэтэу Алексей Савватеевым, философие шIэныгъэхэмкIэ докторэу, профессорэу Шъоджэ Асиет, АМАН-м хэтэу, физикэ-хьисап шIэныгъэ­хэмкIэ докторэу, АКъУ-м ипрофессорэу Шумэфэ Мыхьамэт ыкIи нэмыкIхэм агъэхьазырыгъэ лекциехэм студентхэр ядэIунхэр программэм къыдыхэлъытагъэу щытыгъ.

Мэзаем и 8-м зэхащэгъэ «Наукоградым» епхыгъэу зэнэкъокъу, лъэныкъо зэфэшъхьафхэмкIэ мастер-классхэр зэхащагъэх. Фестивалым Адыгеим ыкIи Краснодар краим ащыщ кIэлэеджакIохэр хэлэжьагъэх.

Адыгэ къэралыгъо университетым и Студент научнэ обществэ, АКъУ-м иныбжьыкIэ шIэныгъэлэжьхэм я Содружествэ ыкIи университетым ишIэныгъэ-гъэсэныгъэ клас­терхэр ары шIэныгъэм фэгъэхьыгъэ тхьамафэм кIэщакIо фэхъугъэхэр.