Общественнэ движениеу «Адыгэ Хасэ — Черкес парламент» зыфиIорэм ия XXI-рэ зэфэхьысыжь-хэдзын зэфэсэу иIэщтым ипэгъокIэу Адыгеим и ЛIышъхьэу КъумпIыл Мурат мы организацием ипащэхэм ыкIи иактив аIукIагъ.

ЗэдэгущыIэгъум хэлэжьагъэх респуб­ликэ Адыгэ Хасэм итхьаматэу ЛIымыщэкъо Рэмэзан, Адыгеим ыкIи Краснодар краим ямуфтиеу Къэрдэнэ Аскэрбый, АР-м и ЛIышъхьэрэ министрэхэм я Кабинетрэ я Администрацие ипащэ игуа­дзэу Къонэ Заур, АР-м лъэпкъ IофхэмкIэ, IэкIыб къэралхэм ащыпсэурэ тилъэп­къэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, общественнэ движением игъэцэкIэкIо комитет хэтхэр.

КъызэрэхагъэщыгъэмкIэ, Тыркуем ыкIи Шам чIыгур къызэращысысыгъэм къы­хэкIэу нэбгырэ мин пчъагъэ хэкIодагъ, ахэм адыгэ диаспорэм илIыкIохэри ахэтых. Зэрар зыхьыгъэхэм IэпыIэгъу афэ­хъугъэным фэшI Адыгэ Хасэми, Адыгеим ыкIи Пшызэ шъолъыр ащыпсэурэ быслъы­мэнхэм я ДиндэлэжьапIи счетхэр къызэIуахыгъэх. Ахъщэр зэкIэ зэхаугъоещт ыкIи Адыгеим щыпсэухэрэм ацIэкIэ тилъэпкъэгъоу IэкIыбым исхэм афагъэ­хьыщт.

Республикэм ипащэ мы IофшIэным мэхьанэшхо ратынэу, амалэу яIэмкIэ финанс IэпыIэгъу къафэхъун зылъэкIыщтхэм къэбарыр алъагъэIэсынэу пшъэ­рылъ къафишIыгъ. — Мы тхьамыкIэгъошхоу къэхъу­гъэм ымыгъэгумэкIырэ цIыф Адыгеим зэримысым сицыхьэ телъ. Бэхэр Iэпы­Iэгъу афэхъунхэу фаех, арышъ а Iоф­шIэныр шIуагъэ къытэу зэхэщэ­гъэн фае, — къыIуагъ КъумпIыл Мурат.

Нэужым Адыгэ Хасэм изэфэсэу къэб­лагъэрэм изыфэгъэхьазырын епхыгъэ Iофыгъохэм атегущыIагъэх. Республикэм имуниципальнэ образованиехэр зэкIэ къэзыгъэлъэгъощт лIыкIо 400 агъэнэ­фагъ. Къэбэртэе-Бэлъкъарым, Къэрэщэе-Щэр­джэсым, адыгэхэр зыщыпсэухэрэ Краснодар краим ирайонхэм, Темыр Осетием ыкIи Абхъазым къарыкIыщтхэ хьа­кIэхэм яжэх. Форумым иIофшIэн мэзаем и 11-м сыхьатыр 11-м АР-м и Къэралыгъо филармоние щырагъэжьэщт.

Iофыгъо шъхьаIэу зытегущыIэщтхэм ащыщых адыгабзэр къэухъумэгъэныр ыкIи хэхъоныгъэ егъэшIыгъэныр, демографием изытет, адыгэ шэн-хабзэхэр, тарихъыр ыкIи культурэр нэмыкI лъэпкъ­хэм алъыгъэIэсыгъэнхэр. Грант IэпыIэгъум епхыгъэ Iофтхьабзэхэми Адыгэ Хасэр чанэу ахэлажьэ. ГущыIэм пае, мы илъэсым республикэм имуниципалитетхэм зэкIэми спорт зэнэкъокъухэр ащызэхащагъэх. Музеим кIэлэеджакIохэр фэщагъэ хъунхэм фытегъэпсыхьэгъэ лъэIу тхылъ общественнэ движением ыгъэхьазырыгъ, джырэ уахътэм ащ УФ-м культурэмкIэ и Министерствэ и Фонд хэплъэ. Джащ фэдэу кIэлэцIыкIухэр АР-м и Лъэпкъ музей ащэнхэу рахъухьэ.

ЗэIукIэгъум икIэ­ухым республикэм ипащэ пшъэрылъ къафишIыгъ зэфэсым изэхэщэн зэ­рэфэхьазырхэр джыри зэ ауплъэкIу­нэу ыкIи ащ хэла­жьэхэрэм, хьакIэхэм ящынэгъончъагъэ къаухъумэнэу.