Адыгеим и ЛIышъхьэу КъумпIыл Мурат рес­пуб­ликэм и Правительствэ зычIэт унэм Урысые кIэлэцIыкIу гупчэу (ВДЦ) «Орленок» зыфиIорэм игенеральнэ пащэу Александр Джеус щыIу­кIагъ. Ащ хэлэжьагъэх АР-м и Премьер-министрэ ипшъэрылъхэр зыгъэцакIэу КIэрэщэ Анзауррэ ВДЦ-у «Орленкэм» ипа­щэ игуадзэу Василий Бабакрэ.

Республикэм и ЛIышъхьэ зэрэхигъэу­нэфыкIыгъэмкIэ, Адыгеимрэ ВДЦ-у «Орленкэмрэ» зэдэлэжьэныгъэшIоу зэдыряIэр гъэсэныгъэмкIэ ыкIи къыткIэхъухьэрэ ныбжьыкIэхэм япIункIэ пшъэрылъхэу УФ-м и Президентэу Владимир Путиным къыгъэнэфагъэхэм ягъэцэкIэн фэIорышIэ.

КъумпIыл Мурат къызэрэхигъэщы­гъэмкIэ, лъэпкъ проектхэмрэ къэралыгъо программэхэмрэ адиштэу гъэсэныгъэмкIэ инфраструктурэм хэхъоныгъэ егъэшIыгъэнымкIэ, кIэлэцIыкIу пэпчъ иамал­хэм нахь икъоу зыкъызэIуягъэхыгъэнымкIэ республикэм бэ щашIэрэр. Мы лъэныкъомкIэ ВДЦ-у «Орленкэр» Адыгеим ианахь цыхьэшIэгъу гъусэгъухэм зэу ащыщ.

«Орленкэм» зэфыщытыкIэшIу зыдытиIэр, лъэныкъо зэфэшъхьафхэмкIэ Iоф зыдэтшIэрэр бэшIагъэ. Мобилизацием къыхиубытагъэхэми яунагъо­хэм арыс кIэлэцIыкIухэм языгъэпсэфыгъо уахътэ мыщ гъэшIэгъонэу щагъакIо, республикэ естественнэ-хьисап еджапIэмрэ гупчэмрэ зэгъусэхэу проектхэр зэдагъэцакIэх. КIэлэцIыкIухэм яамалхэм нахь зыкъызэIуязыгъэхыщт зэдэлэжьэныгъэм зе­гъэу­шъомбгъугъэным мэхьанэшхо иI. КIэлэегъаджэхэм яIэпэIэсэныгъэ зыкъегъэIэтыгъэнри анаIэ зытырагъэтырэ лъэныкъохэм ащыщ», — къыIуагъ КъумпIыл Мурат.

Александр Джеус республикэм и ЛIышъхьэ гъэсэныгъэм епхыгъэ Iофыгъохэм, кIэлэцIыкIухэм яамалхэм зыкъы­зэIуягъэхыгъэным ренэу ынаIэ зэратыригъэтырэм фэшI зэрэфэразэр риIуагъ. Урысые кIэлэцIыкIу гупчэм ипащэ рес­публикэм зэдэлэжьэныгъэу къыдыряIэр нахь агъэпытэ зэрашIоигъор къыIуагъ, мы лъэныкъомкIэ Iофтхьабзэу рахъу­хьэхэрэм къатегущыIагъ.

«Зэдэлэжьэныгъэу Адыгэ къэралыгъо университетым дытиIэм зызэредгъэушъомбгъущтым фэгъэ­хьыгъэ зэзэгъы­ныгъэм тызэдыкIэтхагъ. Iоф­шIэныр зэредгъэжьэгъа­гъэр республикэ естественнэ-хьисап еджа­пIэм тыригъусэу проектхэр дгъэ­цакIэхэу, математическэ сме­нэхэр зэхатщэхэу ары. Мыгъэ Уры­сые Федерацием и Правительствэ IэпыIэгъу къытфэхъузэ математическэ сменэм нахь зызэри­ушъом­бгъущтым тицыхьэ телъ. Адыгеим щыщ кIэлэцIыкIухэм нахьыбэу путевкэхэр къафы­хэдгъэкIын тимурад», — къы­Iуагъ Александр Джеус.

ВДЦ-м ипащэ игуадзэ къызэрэхигъэщыгъэмкIэ, «Орленкэм» ипшъэ­рылъ шъхьаIэхэм зэу ащыщ кIэлэегъаджэхэм ягъэхьазырынкIэ ыкIи яIэпэIэсэныгъэ зыкъегъэIэтыгъэнымкIэ шъолъырхэм зэдэлэжьэныгъэу адыряIэм зыкъегъэIэ­тыгъэныр. УблэпIэ классхэм арысхэм атегъэпсыхьэгъэ программэу «Орлята России» зыфиIоу кIэлэцIыкIухэмрэ ныбжьыкIэхэмрэ я Урысые движение иапэрэ лъэоянэу щытым Адыгеири хагъэхьанэу рахъухьэ. Программэр зытегъэпсыхьагъэр ублэпIэ еджапIэхэм ачIэсхэм социальнэ Iофтхьабзэхэм нахь чанэу зыкъыщагъэлъэгъоныр ары.

Программэу «Орлята России» зыфиIорэм игъэ­цэкIэнкIэ апэрэ лъэбэкъоу хъущтыр кIэлэегъа­джэхэм яIэпэIэсэныгъэ хэгъэхъо­гъэныр ары. ЗыгъэпсэфыпIэу «Лэгъонакъэм» изэхэщэнкIэ, спортымкIэ мотоциклет лъэпкъхэм республикэм хэхъоныгъэ щягъэшIыгъэнымкIэ ВДЦ-м опытэу иIэр къызфагъэфедэн алъэкIыщтмэ зэрэзэгъэшIэгъэн фаем зэIукIэгъум щытегущыIагъэх.

КIэлэцIыкIухэм языгъэпсэфыгъо уахътэ изэхэщэнкIэ, проектхэр зэдэгъэцэкIэгъэнхэмкIэ, ныбжьыкIэ сэнаущхэм IэпыIэгъу ягъэгъотыгъэнымкIэ зэдэлэжьэныгъэу зэдыряIэм рес­публикэм нахь зыригъэушъомбгъу зэрэшIоигъор АР-м и ЛIышъхьэ хигъэунэфыкIыгъ.

«ЕджэнымкIэ шIыкIэ-амалыкIэхэр къызфэгъэ­федэгъэнхэм, кIэлэцIыкIухэм яамалхэм нахь зыкъызэIуягъэхыгъэным ателъытэгъэ Iофтхьабзэу къешъухьыжьэрэ пстэуми адедгъэштэнэу тыхьазыр», — къыIуагъ республикэм ипащэ.

АР-м и ЛIышъхьэ ВДЦ-у «Орленок» зыфиIорэм ипащэ «тхьауегъэпсэу» риIуагъ шIуагъэ къытэу зэрэзэдэлажьэхэрэм ыкIи республикэм ренэу ынаIэ къызэрэтыригъэтырэм афэшI. Гъэсэныгъэм­рэ къыткIэхъухьэрэ ныбжьыкIэхэм япIунрэ яIахь зэрэхашIыхьэрэм фэшI Александр Джеусрэ Василий Бабакрэ юбилей медалэу «Адыгэ Рес­публикэр зызэхащагъэр илъэси 100 хъугъэ» зыфиIорэр аратыгъ.

АР-м и ЛIышъхьэ ипресс-къулыкъу