Адыгеим и «Ныб­жьыкIэ гвардие» хэтхэр цIыфхэр социальнэу къэухъу­мэгъэнхэмкIэ Гупчэм мафэрэ чIэсырэ тинахьыжъхэм аIукIагъэх.

Мыекъуапэ идепутатэу, «НыбжьыкIэ гвардием» ипащэу Бэрзэдж Асыет «Единэ Россием» хэтхэмрэ «молодогвардейцэхэмрэ» хэушъхьафыкIыгъэ дзэ операцием хэлэжьэрэ тидзэ­кIолIхэм IэпыIэгъоу аратырэм къытегущыIагъ. Ащ къызэриIуагъэмкIэ, Хэгъэгум иухъумакIо и Мафэу къэблагъэрэм ипэгъокIэу «Тепло для героя» зыфиIорэ Iофтхьабзэр Адыгеим щырагъэ­жьагъ. Ащ къыдыхэлъытагъэу республикэм исхэм лъэпэд фабэхэр дзэкIолIхэм афахъых, мэфэкIымкIэ зыщафэгушIохэрэ открыткэхэр агъэхьазырых. Хэлажьэмэ зышIоигъор зэкIэ рагъэблагъэ.

Гупчэм чIэс нэжъ-Iужъхэми мыщ яIахь халъхьанэу рахъу­хьагъ. Ахэм Адыгеим и «НыбжьыкIэ гвардие» хэтхэр ягъусэхэу тидзэкIолIхэм апае лъэпэд фабэхэр ахъынхэу рагъэжьагъ. Ащ пае ящыкIэгъэщтыр зэкIэ «Единэ Россием» и Адыгэ шъо­лъыр къутамэ къаIэкIигъэхьагъ.

— Тызэкъоуцонышъ, тызэдеIэжьзэ тиухъумакIохэм IэпыIэгъу тафэхъун фае. Сыда пIомэ къин хэтхэу ахэм тихэгъэгу къаухъумэ. «Единэ Россиемрэ» «НыбжьыкIэ гвардиемрэ» ахэтхэм Донбасс ыкIи нэмыкI чIыпIэу шъхьафит ашIыжьыгъэхэм ащы­псэухэрэм апае шIушIэ IэпыIэгъум икъэугъоин лъагъэкIуатэ. «Единэ Россием» ипрограммэ ар хэушъхьафыкIыгъэу щыгъэнэфагъ. АР-м и ЛIышъхьэу, шъо­лъыр къутамэм и Секретарэу КъумпIыл Мурат ар зэхэщагъэ зэрэхъурэм лъэшэу ынаIэ тет. Адыгеим охътэ благъэм лъэпэди 100-м къыщымыкIэу щагъэ­хьазырыщт, ахэр волонтерхэм дзэкIолIхэм афащэщт, — къы­Iуагъ Бэрзэдж Асыет.

Партием ипроектэу «Тина­хьыжъхэр» зыфиIорэм къыды­хэлъытагъэу пхыращы Iоф­тхьабзэу «Тепло для героя» зыфиIорэр.