ЯпсэупIэ зыкъыIэтынэу
Къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм тапэкIи зэрэхэлэжьэщтхэм епхыгъэу Адыгеим и ЛIышъхьэу КъумпIыл Мурат правительствэм и Унэ щыкIогъэ зэIукIэм пшъэрылъхэр къыщигъэуцугъэх.
Ащ хэлэжьагъэх АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м мэкъу-мэщымкIэ и Министерствэ ыкIи муниципальнэ образованиехэм япащэхэр.
Адыгеим и ЛIышъхьэ къызэрэхигъэщыгъэмкIэ, къуаджэхэм ясоциальнэ инфраструктурэ нахь зэтегъэпсыхьэгъэнымкIэ программэм къыдилъытэрэ Iофтхьабзэхэм мэхьанэшхо яI. Илъэсэу къызэтынэкIыгъэхэм а программэм тегъэпсыхьагъэу социальнэ псэолъи 120-м фэдизмэ ягъэцэкIэжьынкIэ IофшIэнхэр зэшIуахыгъэх ыкIи кIэхэр ашIыгъэх.
«Къоджэдэсхэм ящыIакIэ ренэу нахь зыкъыIэтыныр ары тынаIэ зытедгъэтырэр. Арышъ, IофшIэнхэм къакIешъумыгъэч. Заявкэхэм ятын чанэу шъухэлэжьэн фае. Мы программэм нэфэшъхьафэу нэмыкIхэми шъуахэлажь, къоджэдэсхэм ящыIакIэ нахьышIу шIыгъэным пае къэкIуапIэхэми шъунаIэ атежъугъэт», — къыIуагъ АР-м и ЛIышъхьэ.
АР-м мэкъу-мэщымкIэ и Министерствэ къызэритыгъэмкIэ, мы илъэсым къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм сомэ миллиард 1,3-рэ фэдиз пэIуагъэхьащт, ащкIэ социальнэ мэхьанэ зиIэ учреждениехэр, инфраструктурэм къыхиубытэрэ унэхэр ашIыщтых, зэтырагъэпсыхьажьыщтых ыкIи агъэцэкIэжьыщтых (пстэумкIи унэ 27-рэ). Ащ нэужым АР-м мэкъу-мэщымкIэ иминистрэу Къуанэ Анзаур къызэриIуагъэмкIэ, къуаджэхэм хэхъоныгъэ ягъэшIыгъэным икъэралыгъо программэ ипхырыщын кIэу щыт екIолIакIэхэр ищыкIагъэх.
ГущыIэм пае, къуаджэхэм хэхъоныгъэ ягъэшIыгъэным ылъэныкъокIэ программэхэм шъолъырхэр ахэлажьэхэ зыхъукIэ, анахьэу анаIэ зытырагъэтыщтхэр псэупIэхэр ары. УФ-м мэкъу-мэщымкIэ и Министерствэ иметодическэ рекомендациехэм атетэу ахэр къагъэнэфэщтых. Ащ нэмыкIэу къоджэ псэупIэ цIыкIухэр зэхэгъэхьажьыгъэнхэмкIэ пIэлъэ кIыхьэм тегъэпсыхьэгъэ планхэр Iоныгъом и 1-м нэс зэхэгъэуцогъэнхэ фае. Ащ нэужым УФ-м и Правительствэ дэжь щыIэ межведомственнэ комиссием проектхэм апэIухьащт ахъщэм епхыгъэ унашъо ыштэщт.
ИкIэухым АР-м и ЛIышъхьэ пшъэрылъ къафишIыгъ проектнэ документацием игъэхьазырын анаIэ лъэшэу тырагъэтынэу, республикэм иминистерствэ УФ-м мэкъу-мэщымкIэ и Министерствэ ирекомендациякIэхэр къыдилъытэхэзэ, гъусэныгъэ пытэ ащ зэрэдыриIэщтым дэлэжьэнэу.
АР-м и ЛIышъхьэ ипресс-къулыкъу