Пшызэ шъолъыр икъэзэкъыдзэ и Мыекъопэ отдел зичэзыу шIушIэ IэпыIэгъу хэушъхьафыкIыгъэ дзэ операцием хэлэжьэрэ отрядэу «Кубань» зыфиIорэм фитIупщыгъ.

ЗэкIэмкIи тонни 3,5-рэ хъурэ IэпыIэгъоу ащагъэм отрядым хэтхэм яунагъохэм къагъэхьазырыгъэхэр, кIэлэцIыкIухэм яписьмэхэр, сурэтэу къашIыгъэ­хэр, щыгъын фабэхэр, псэу зэшъощтхэр, генераторхэр, гъэ­стыныпхъэ шхъуантIэ зэрыт баллонхэр, гъомылапхъэхэр, нэмыкIхэр хэлъых.

КъауIэгъэ дзэкIолIэу госпиталым чIэлъхэри къагъэнагъэ­хэп. Ахэм ООО-у «Траст М» зыфиIорэм къыугъоигъэу те­хъон ыкIи щыгъын фабэхэр, алъакъо темыуцошъухэрэм апае бэщхэр, хьакъу-шыкъухэр афащагъэх.

Луганскэ народнэ респуб­ликэм щыпсэухэрэм къафаугъо­игъэхэр къалэу Новодружескэ иадминистрацие Iуащагъэх. КIэлэцIыкIухэм апае щыгъын фабэхэр, джэгуалъэхэр, гъомылапхъэхэр ащ хэлъых.

Мыекъопэ къэзэкъ отделым иобществэхэм ахэтхэу шIушIэ IэпыIэгъур къэзыугъоигъэхэм, нэмыкI цIыфэу зиIахь къыхэзылъхьагъэхэм, Пшызэ шъолъыр ыкIи Адыгеим яорганизациеу, япредпринимателэу къыхэлэжьагъэхэм, Мыекъуапэ и Свято-Георгиевскэ чылыс тафэразэу, «тхьашъуегъэпсэу» ятэIо.

ШIушIэ IэпыIэгъур зыщагъэхэр Апшеронскэ районым икъэзэкъ атаманэу Сергей Коростылевыр, ащ игуадзэу Сергей Хлудневыр, къэзэкъхэу Виктор Мельниковыр, Игорь Агарковыр ыкIи мы районым ис ермэлхэм я Союз ипащэу Владимир Тахмазян.

Джыри Хэгъэгум иухъумакIо и Мафэ ипэгъокIэу шIушIэ IэпыIэгъум иугъоин рагъэжьагъ.

Екатеринеа Загорулько.