Агъэнэфэгъагъэм нахьыбэу
Лъэпкъ проектэу «ПсэупIэм» ипхырыщын пае аштэгъэ федеральнэ проектэу «ПсэупIэр ыкIи къэлэ щыIакIэр» зыфиIорэм къыщыдэлъытагъэу икIыгъэ 2022-рэ илъэсым псэупIэ квадратнэ метрэ мин 468-рэ республикэм щатыгъ. Ар агъэнэфэгъагъэм хэпшIыкIэу нахьыб.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, икIыгъэ илъэсым квадратнэ метрэ мин 230-рэ республикэм ыгъэуцущтэу ары федеральнэ Гупчэм зэрэлъигъэIэсыгъагъэр, ау ащ фэдизым ехъукIэ нахьыбэу ышIыгъ.
ЗэкIэмкIи псэолъэшI хъызмэтшIэпIэ 38-мэ гъэрекIо Адыгеим Iоф щашIагъ, уни 120-мэ ягъэуцункIэ ахэм фитыныгъэ яIагъ. Министерствэм къызэрэщаIуагъэмкIэ, унэе псэолъэшIхэм квадратнэ метрэ мин 350-м ехъу агъэуцугъ. Ар 2021-рэ илъэсым егъэпшагъэмэ, процент 71,2-кIэ нахьыб.
Фэтэрыбэу зэхэт унэ 23-рэ, ар квадратнэ метрэ мини 117,6-рэ мэхъу, ашIыгъ. ЦIыфхэм ямылъку халъхьэзэ къатыбэу зэтет унэ 20 агъэуцугъ. Мыхэр зэкIэмкIи фэтэр 2451-рэ мэхъух, ар квадратнэ метрэ мин 96,1- рэ. Оборудованиеу ящыкIагъэр зэкIэми арыт.
Мы илъэсми ащ тетэу унэхэм яшIын лъагъэкIотэнэу пшъэрылъ зэрэзыфагъэуцужьыгъэм министерствэм къыщыкIагъэтхъыгъ. Мыгъэ хъызмэтшIэпIэ 39-мэ республикэм псэупIэхэр щашIых, уни 127-мэ ягъэуцункIэ фитыныгъэ ахэм яI.
ГущыIэм пае, «ПсэупIэр ыкIи къэлэ щыIакIэр» зыфиIорэ лъэпкъ проектым къыщыдэлъытагъэу мы уахътэм Тэхъутэмыкъое районым ит поселкэу Яблоновскэм къатипшIэу зэтет унэ щашIы. ПстэумкIи ар фэтэр 72-у зэхэтыщт, квадратнэ метрэ мини 3,2-рэ хъущт. Мыщ игъунэгъу псэупIэу къуаджэу АдыгеякIэми къатипшIэу зэтет унэ щагъэуцу, ар зэкIэмкIи квадратнэ метрэ мин 15,93-рэ зэрэхъущтыр.
Джащ фэдэу Мыекъуапэ хэхъоныгъэхэр егъэшIыгъэнхэм тегъэпсыхьэгъэ проектым къызэрэщыдэлъытагъэу, псэупIэ комплекс щырагъэжьагъ. Ащ хэт унэ- хэр къати 7 — 16-у зэтетыщтых.
«Эскроу-счетхэр» агъэфедэхэзэ псэупIэхэм яшIын цIыфхэм яIахь халъхьэ. Унэхэр аухыхэу, ахъщэр хэзылъхьагъэхэм ащыщэу зы нэбгыр нэмыIэми фэтэрыр зэриемкIэ фитыныгъэр фэмыгъэпсыгъэу а счетхэр къызэIуахыщтхэп. Джащ ыуж ахъщэу зэIукIагъэр псэолъэшIым зыфагъэкIощтыр.
ЦIыфэу фэтэрыбэу зэхэт унэм ишIын зиIахь хэзылъхьэхэрэр гъэпцIагъэ мыхъунхэм фэшI мыщ фэдэ шIыкIэр къэралыгъом къыугупшысыгъ.
ХЪУТ Нэфсэт.