ЗэкIэри, анахьэу кIэлэцIыкIухэр, зэжэгъэхэ осыр къытфесыгъ. ГидрометеорологиемкIэ ыкIи тыкъэзыуцухьэрэ дунаим лъыплъэгъэнымкIэ Гупчэм къызэритыгъэмкIэ, средизем­но­морскэ жьыбгъэшхом ос къыздихьыгъ.

Гупчэм ипащэ игуадзэу Виктория Гусевам къызэриIуагъэмкIэ, мэзаем и 6-м чэщым къыщегъэжьагъэу республикэм ичIыпIэ зэфэшъхьафхэм ос къащесыгъ. Осэу къытырилъхьагъэм илъэгагъэ сантиметри 8 мэхъу, къушъхьэ­хэм ащынахьыб, сантиметрэ 17-м къыщегъэжьа­гъэу 47-м нэсы. Мы уахътэм ехъулIэу осэу къесыгъэм ибагъэ щынагъо къыхэ­кIынэу щытэп.

— Мэзаем и 9-м Сыбыр лъэныкъом къикIырэ осым щигъэтыжьыщт, ау щтыргъукIы хъущт, къы­гъэ­щтыщт. ЧIыпIэхэм ащыщ­хэм гъогухэм осыр ащызэтырихьащт, ащыIумы­лыщт. Мыекъуапэ чэщым чъыIэр градус 13 — 14-м щынэсыщт, мафэм чъыIэр зы градус — градуси 6-м фэдизыщт, — къыIуагъ Виктория Гусевам.

Къушъхьэхэм ателъ осыр къызщигъэжъурэ уахътэм ыкIи лъэшэу къы­зещхыкIэ, псыхъохэм адэт псыр къыдэкIоещт, ау ар къыдэкIыным ищынагъо щыIэщтэп, шапхъэхэм ашIо­кIыщтэп.

КIАРЭ Фатим.