Адыгэ Республикэм и ЛIышъхьэу КъумпIыл Мурат инвестиционнэ проектхэу анахь гугъэпIэ инхэр зэрапхыхэрэм ащыщэу зыгъэпсэфыпIэу «Лэгъонакъэ» иинфраструктурэ игъэпсын ичэзыухэм зыщатегущыIэгъэхэ зэIукIэ зэхищэгъагъ.

Республикэм и ЛIышъхьэ къызэрэхигъэщыгъэмкIэ, лыжэхэмкIэ къызщачъы­хьан алъэкIыщт гъэпсэфыпIэу «Лэгъонакъэ» мэхьанэшхо иIэщт. ЗекIоным хэхъоныгъэ зэрэригъэшIыщтым имыза­къоу, Адыгеим зэрэпсаоу иэкономикэ ифэмэ-бжьымэшхо ащ къытырихьащт. ЗыгъэпсэфыпIэм IофшIэпIэ чIыпIэ мини 2 фэдиз къытыщт.

Инвесторым къызэрэхигъэщыгъэмкIэ, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Лэгъонакъэ» 2025-рэ илъэсым ыкIэхэм адэжь кIэшIэгъэ гъогуи 6 ыгъэпсыщт, пстэумкIи ахэр километрэ 25-рэ хъущтых. Номер 6042-рэ гъэпсэфыпIэм хэтыщт.

Ащ дакIоу республикэм ихэбзэ къулы­къухэр Урысые Федерацием и Правительствэ иIэпыIэгъу хэлъэу лъэпкъ про­ектым диштэщт инфраструктурэм тегъэпсыхьэгъэ Iофыгъохэм язэшIохын ыуж итых.

Адыгэ Республикэм зекIонымкIэ ыкIи зыгъэпсэфыпIэхэмкIэ и Комитет итхьаматэу Былымгъот Ибрахьим къызэриIуа­гъэмкIэ, корпорациеу «Туризм. РФ» зыфиIорэр игъусэу инфраструктурэ псэуалъэхэу зыгъэпсэфыпIэм ищыкIагъэ­хэр рахъухьагъэх, проект IофшIэнхэри макIох.

Дахъо икIэу Лэгъонакъэ нэсыщт автомобиль гъогум изэтегъэпсыхьан, чIычIэгъ рыкIуапIэхэмкIэ гъэстыныпхъэ шхъуантIэр, псыр, электричествэр нахь тэрэзэу зэраIэкIагъэхьащтхэм япхыгъэ Iофыгъохэм атегущыIагъэх. 2025-рэ илъэ­сым ыкIэм ехъулIэу псэуалъэхэр аухынхэу мэгугъэх. Мы илъэсым федеральнэ ыкIи республикэ бюджетхэм къахагъэкIынышъ, сомэ миллиарди 3,8-рэ фэдиз инфраструктурэм пэIуагъэхьащт.

Шъугу къэтэгъэкIыжьы: чIыопсым икъэухъумэнкIэ хэбзэгъэуцугъэу щыIэр амыукъоу, тыкъэзыуцухьэрэ дунаим изытет зэщамыгъакъоу а чIыпIэм хэ­хъо­ны­гъэ зэришIыщтым пылъыщтых. Инвесторхэми, псэолъэшIхэми а пшъэ­рылъым изэшIохын анаIэ тырагъэтыщт. Респуб­ликэм ипащэхэм а Iофыгъом зэшIохыкIэу фэхъущтыр ренэу къыда­лъытэ.

АР-м и ЛIышъхьэ ипресс-къулыкъу