Республикэм социальнэ-экономикэ хэхъо­­ны­гъэ езыгъэшIыщт проектхэр зэрагъэцакIэ­хэрэм фэгъэхьыгъэ зэIукIэр АР-м и ЛIышъхьэу КъумпIыл Мурат зэрищагъ. Ащ зыщытегущыIагъэхэм ащыщ микрорайонэу Михайловым ыкIыб щыIэ чIыпIэр зэтегъэпсыхьэгъэным фэгъэхьыгъэ проектым игъэцэкIэн зэрэкIорэр.

Мыекъуапэ имэрэу Геннадий Митрофановым зэрэхигъэунэфыкIыгъэмкIэ, микрорайоным изы Iахьэу гектар 14 зэлъызыубытыщтым псэуалъэхэр зэди­штэу щагъэпсынхэу унашъо аштагъ. ПсэолъэшIыным фэгъэ­зэгъэщтыр зэфэшIыгъэ Iахьзэ­хэлъ обществэу «ОБД» зыфиIорэр ары. ГъэрекIо иIоныгъо мазэ ащкIэ зэзэгъыныгъэ ащ дашIыгъ. КъызэрэрадзэрэмкIэ, инвестициехэр сомэ миллиарди 7 фэдиз хъущтых.

ПсэолъэшIынымкIэ цIыфхэм яшIошIхэр зэрагъэшIагъэх, Iоф­тхьэбзэ заулэхэмкIэ зэзэгъыгъэх, проект документациемкIэ Iофхэр аухыгъэх. Инвесторыр псэолъэшIын IофшIэнхэм мыгъэ афежьэ шIоигъу. Фэтэрыбэу зэхэт унэ 13 мыщ щагъэпсынэу рахъухьэ. Микрорайонэу зэтырагъэпсыхьэрэм транспорт, инженер инфраструктурэм ипсэуалъэхэр, банкхэр, аптекэхэр, МФЦ-р къитэджэщтых.

Унэхэр зытырашIыхьащт чIыпIэхэм ягъэхьазырын джыдэдэм макIо, бюджет чIыфэхэр къызфагъэфедэзэ, ищыкIэгъэ инфраструктурэр агъэпсы. МикрорайоныкIэм котельнэр, псырыкIуапIэхэр, псыIущыпIэхэр, фабэмрэ электроэнергиемрэ къэзытыщт псэуалъэхэр щагъэпсыщтых.

Щагухэр зэрэзэтырагъэ­псы­хьащтхэм, кIэлэцIыкIу, спорт джэгупIэхэр зэрагъэпсыщтхэм, къэгъагъэхэр, куандэхэр, чъыг­хэр зэрагъэтIысхьащтхэм икъоу ягупшысэнэу, автомобиль гъэуцупIэхэр къыдалъытэнэу, социальнэ инфраструктурэм нахь лъэшэу анаIэ тырагъэтынэу Адыгеим и ЛIышъхьэ пшъэрылъ афишIыгъ. Шъугу къэтэгъэкIы­жьы Мыекъуапэ икъокIыпIэ лъэныкъо нэбгырэ 1100-мэ ате­лъытэгъэ гурыт еджапIэ зэрэщагъэпсыгъэр, поликлиникакIэм ишIын джыдэдэм зэрэкIорэр.

Джащ фэдэу Мыекъуапэ икъо­хьэпIэ лъэныкъуи, спорт комплексэу «Ошъутенэм» къыпэблэгъэ чIыпIэм изэтегъэпсыхьани афежьагъэх. МикрорайоныкIэу Яблоневэм къыхиубытэрэ гектар 23-р джырэ шапхъэхэм адиштэу зэтырагъэпсыхьащт.

АР-м и ЛIышъхьэ зэрэхигъэу­нэфыкIыгъэмкIэ, чIыпIэхэр планировкэ ашIыхэ зыхъукIэ цIыфхэмкIэ ахэр IэрыфэгъунхэмкIэ лъэныкъо пстэури къыда­лъытэн фае.

АР-м и ЛIышъхьэ ипресс-къулыкъу