Тыркуем ыкIи Шам чIыгур защэсысым хэкIодагъэхэм япчъагъэ хэхъо зэпыт. Адыгэхэр бэу зыщыпсэурэ чIыпIэхэр ащ къыхиубытагъэх.

ТыркуемкIэ нахь зэрар зэрихыгъэ къэлипшIым адыгэхэр жъугъэу зыщыпсэухэрэ чIыпIэхэу Кахраманмараш, Адана, Хьэтай, Газиентеп къахэфагъэх. Шам ылъэныкъокIэ — Алеппо, Идлиб, Латакия. Мыхэм адыгэ чылагъохэу къягъэтIысэкIыгъэ­хэми чIыгусысыныр зэхашIагъ.

Тыркуем къикIыжьыгъэ ти­лъэпкъэгъумэ ащыщэу Едыдж Мэмэт тызэрэщигъэгъозагъэмкIэ, къалэу Мараш иадминистративнэ районэу Гексун ит адыгэ чылэгъо 20-м язытет дэи, унэ пчъагъэ щызэхэтэкъуагъ, ошIэ-дэмышIэ IофхэмкIэ къулыкъухэр анэсынхэу, зэхэтэкъогъэ унэхэр зэбгырахыжьынхэу игъо ифэхэрэп, амалэу щыIэр икъу­рэп. Чылэхэм адэс адыгэ кIалэхэр куп-купэу зэрэугъоигъэхэу къэралыгъо къулыкъухэм IэпыIэгъу афэхъух, псаоу къэнагъэхэм якъыхэгъэщыжьынкIэ, шъобж зиIэхэм IэпыIэгъу ягъэгъотыгъэнымкIэ яшIуагъэ арагъэкIы.

«КъащышIыгъэр илъэси 100-м зэ къэхъурэ бэлахь, — хегъэунэфыкIы Едыдж Мэмэт, — хэкIодагъэхэм, шъобж зиIэ хъугъэхэм ащыщхэм адыгэу къахэфагъэр зыфэдизыр джыдэдэм къэIогъуай. А къэлипшIым нэбгырэ миллион 13-рэ мин 500-рэ ащэпсэу. ЧIыгусысыным хэкIодагъэр мин пчъагъэхэмкIэ къалъытэ. ТхьамыкIагъом къыз­дихьыгъэ гумэкIыгъохэм ядэгъэзы­жьын пстэуми зыпэIуадзагъ. Зэрарышхо арихыгъ, псэупIэ зимыIэжьэу къэнагъэр бэдэд. Къэралыгъом фэлъэкIыщтыр ешIэ».

Дунэе Адыгэ Ха­сэм и Хэсашъхьэ хэтэу МэщфэшIу Нэдждэт тызэрэщигъэгъозагъэмкIэ, Рейханлы щыщэу Антакие щыпсэурэ тилъэпкъэгъу нэбгыритфым алъыIэсынхэ алъэкIырэп. Искендер щыпсэоу зы нэбгырэми икъэ­бар ашIэрэп. Яфэтэрхэр зыхэт унэхэр зэхэуагъэх, чIиубытагъэхэу ягуцафэх, псаоу алъы­Iэсынхэм игугъапIэ зыдаIыгъ.

ЧIыгусысыным зэрар къызфихьыгъэхэм IэпыIэгъу ягъэгъотыгъэ­нымкIэ Дунэе Адыгэ Хасэм счет къызэIуи­хыщт.

Анкара Хасэм Iоф щызышIэу Рахъо Елдыз макъэ къызэрэтигъэIугъэмкIэ, Кавказ хасэхэм я Федерациеу Тыркуем щызэхэщагъэм чIыгусысыным зэрар къызэригъэкIыгъэхэм апае шIушIэ IэпыIэгъу еугъои. Псы, медицинэ Iэмэ-псымэхэр, щыгъын ыкIи техъо фабэхэр ащ хэтых. ПсэупIэ зимыIэжьэу урамхэм къатенэгъэ цIыфхэм къэралыгъом IэпыIэгъу арегъэгъотыфэ яунэхэм арысынхэу Тыркуем ит къуаджэу Нарткъалэ щыпсэухэрэм къырагъэблагъэх.

Тэу Замир.