Ом изытет зыкъызэблихъуи, гъогухэр къытыри­гъэщтыкIыгъэх, осыри къатесэжьыгъ. Адыгэ Рес­публикэм и Къэралыгъо автоинспекцие гъогурыкIоным хэлажьэхэрэм закъыфегъазэ сакъыныгъэ пстэуми къызхагъэфэнэу.

Нахь пасэу шIункI къызэрэхъурэм дакIоу, республикэм игъогухэр Iумыл хъугъэх. Водительхэм агу къагъэкIыжьы — блэгъащэу уапэ ит машинэм уекIуалIэ хъущтэп, узэрэчъэрэм илъэшыгъэ нахь къыщыбгъэкIэн фае. Мыщ фэдэ уахътэм зекIокIэ къулайныгъэхэр къэбгъэлъэгъонхэу, ошIэ-дэмышIэу автомобилыр къэбгъэуцунэу щытэп.

Зыщышъумыгъэгъупш гъогур Iумыл зыхъукIэ, хъугъэ- шIагъэ ухэфэным ищынагъо къызэрэуцурэр.

Общественнэ транспортыр къызыщыуцурэ чIыпIэхэм, гъогу зэхэкIыпIэхэу машинабэ зыщызэблэкIыхэрэм ыкIи нэфрыгъуазэхэм апашъхьэ сакъыныгъэ нахь къащыз­хэжъугъаф!

Водительхэм ямызакъоу, лъэсрыкIохэми мы лъэхъа­ным анахьэу ягулъытэ агъэIорышIэн фае. Машинэхэр зэрыкIохэрэ гъогур зэпышъучы зыхъукIэ бгъу пстэумкIи зышъуплъыхь.

Шъуищыгъынхэм къэнэфырэ пкъы­гъохэр ахэшъулъхьанхэр зыщышъу­мыгъэ­гъупш!

* * *

«Адыгеяавтодорым» къызэриты­гъэмкIэ, осым итхъун фытегъэпсы­хьэгъэ техникэ зэ­фэшъхьафи 118-рэ, пшэхъо тонн 6240-рэ, щыгъу тонн 2366-рэ ыкIи пшэ­хъо-щыгъу зэхэгъэ­кIухьэгъэ тонн 2855-рэ Адыгеим щагъэхьазырыгъ.