КIэтхэгъу уахътэр пIалъэм къыпэу рагъэжьагъ
2023-рэ илъэсым иятIонэрэ илъэсныкъо телъытэгъэ кIэтхэгъу кампаниер Урысыем и Почтэу Адыгеим щыIэм пIалъэм къыпэу ригъэжьагъ.
Мэзаем и 1-м къыщыублагъэу гъэтхапэм и 31-м нэс блэкIыгъэ кIэтхэгъу уахътэм щыIэгъэ уасэмкIэ 2023-рэ илъэсым иятIонэрэ илъэсныкъом телъытэгъэ гъэзетхэмрэ журналхэмрэ къыратхыкIынхэ алъэкIыщт.
Урысыем къыщыдагъэкIырэ гъэзет ыкIи журнал 1400-м ехъу акцием хэлажьэ, ащ къыхеубытэх кIэлэцIыкIухэм афэгъэхьыгъэхэри, нэмыкIхэри. Сайтэу podpiska.pochta.ru зыфиIорэм, джащ фэдэу Урысыем и Почтэ мобильнэ гуадзэу иIэм, почтэм икъутамэхэм ахэм уащыкIэтхэн плъэкIыщт, почтальонхэми а фэIо-фашIэр агъэцакIэ. Онлайн шIыкIэм тетэу кIатхэхэрэм амал яI къыратхыкIыхэрэм ацIэкIэ е кIэгъэтхэн индексэу яIэмкIэ, темэмкIэ, хьарыфылъэмкIэ, ежьхэм нахь ашIогъэшIэгъонымкIэ къыхахынхэу, ащ зэкIэмкIи такъикъ заул ныIэп тырагъэкIодэщтыр.
Джащ фэдэу Урысыем и Почтэ кIэщакIо зыфэхъугъэ шIушIэ Iофтхьабзэу «ШIум ичъыг» зыфиIорэм шъухэлажьэзэ, кIэлэцIыкIу ибэхэр зычIэс унэм, еджэпIэ-интернатым, нэжъ-Iужъхэр зыщаIыгъырэ унэм е къоджэ тхылъеджапIэм къафишъутхыкIынхэ шъулъэкIыщт. Ащ пае учреждениеу къыхэшъухырэм сайтымкIэ е почтэмкIэ гъэзетыпкIэм ыуасэ фэшъутын фае. Акцием инэкIубгъоу podpiska.pochta.ru/derevo-dobra/region зыфиIорэм шъузфыкIэтхэщт социальнэ учреждениери шъолъырыри къыщыхэшъухын шъулъэкIыщт.