Адыгеим и ЛIышъхьэу КъумпIыл Мурат SFT Group зыфиIорэм ипащэу, правлением итхьаматэу Евгений Глезман, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Картонтарэм» ипащэу Сергей Погодиным, корпоративнэ коммуникациехэмкIэ пащэу Анатолий Сафроновым зэIукIэ адыриIагъ.

SFT Group иинвестиционнэ проект зэрагъэцэкIэщтым — Тэхъутэмыкъое районым ипромышленнэ парк гофроупаковкэхэр къызыщыдагъэкIыщт заводыкIэ зэрэщагъэпсыщтым тегущыIагъэх. «2030-рэ илъэсым нэс «SFT Group и Стратегие игъэцэ­кIэнкIэ пшъэрылъ шъхьаIэр гофроупаковкэхэр къыдэзы­гъэ­кIыхэрэм нахь зягъэушъом­бгъугъэныр ары. Пандемиемрэ санкциехэмрэ тигухэлъхэм зэхъокIыныгъэ горэхэр афашIыгъэхэми, гофроупаковкэхэр къызыщыда­гъэ­кIыщт, джырэ шапхъэхэм адиштэщт заводыкIэм игъэ­псын телъытэгъэ проектым ипхырыщын тапэкIи ти­шъып­къэу тыдэлэжьэщт», — къыIуагъ Евгений Глезман.

SFT Group зыфиIорэр апэрэ резидентэу хъун, Тэхъутэмы­къое районым щагъэпсырэ промышленнэ паркым иинвестиционнэ проект щыпхырищын ылъэкIыщт. Адыгеим и ЛIышъхьэрэ инвесторхэмрэ а чIыпIэм щыIагъэх, инфраструктурэр зэрагъэпсырэм нэIуасэ зыфашIыгъ. Джащ фэдэу АР-м и ЛIышъхьэ игъусагъэх Адыгеим экономикэ хэхъоныгъэм­рэ сатыумрэкIэ иминистрэу Шэуджэн Зауррэ муниципальнэ образованиеу «Тэхъутэмыкъое районым» ипащэу Шъао Аскэррэ. Инвесторхэр зыгъэгумэкIырэ упчIэ пстэуми ахэм джэуап къаратыжьыгъ.

Джыдэдэм промышленнэ паркым магистральнэ инженер сетьхэм, электроэнергиер, газыр, псыр аIэкIэзыгъэхьэрэ псэуа­лъэхэм, гъогухэм ягъэпсынкIэ Iофхэр щызэрахьэх.

КъумпIыл Мурат къызэрэ­хигъэ­­щыгъэмкIэ, 2025-рэ илъэсым ехъулIэу IофшIэн шъхьа­Iэхэр аухын ямурад. Коммуникациехэр, энергиекъэкIуапIэхэр зиIэщт, транспортымкIэ Iэрыфэгъущт инвестиционнэ площадкэу промышленнэ пар­кыр хъущт. Промышленностым­рэ нэмыкI отрас­лэхэмрэ инвестиционнэ проектышхохэр ащыпхырыщыгъэнхэмкIэ ищыкIэгъэ пстэур ащ щызэгъэуIугъэщт.

«Адыгеим ипсэупIэхэу хэхъоныгъэ зышIыхэрэмрэ Краснодаррэ апэблагъэу Тэхъутэмыкъое районым индустриальнэ паркышхо щагъэпсыщт. Урысыем и КъыблэкIэ ар анахь иныщт, IофшIэпIэ чIыпIэ мини 10 фэдиз щызэхащэщт», — къыIуагъ КъумпIыл Мурат.

Лъэныкъохэм ялIыкIохэм язэ­дэлэжьэныгъэ лъагъэкIуатэмэ зэрашIоигъор зэIукIэм щыхагъэ­унэфыкIыгъ. Инвестиционнэ проектым игъэцэкIэнкIэ гугъапIэ къязытырэр холдингым ипредприятие анахь пэрытым — пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Кар­тонтарэм» республикэм Iоф зэ­рэщишIэрэр ары. Предприятием опытышIу зэриIэм ишIуагъэ къэкIощт проектым игъэцэкIэнкIэ.

«Республикэм ипащэхэр тигъу­­сэхэу проектхэр зэдэдгъэ­цэ­кIэн­хэу опытышIу зэрэтиIэм, индустриальнэ паркым игъэ­псынкIэ планыр зэрэ­дгъэцэкIэ­щтым тицыхьэ зэ­рэтелъым яшIуагъэкIэ инвестиционнэ проектыр псын­кIэу дгъэцэкIэн ыкIи респуб­ликэм ихэхъоныгъэ тиIа­хьышIу хэтшIыхьан тлъэ­кIыщт», — къыIуагъ Евгений Глезман.

Правлением итхьаматэ зэрэхигъэунэфыкIыгъэмкIэ, предприятиякIэм илъэсым къыкIоцI гофроупаковкэ квадрат метрэ миллион 200-м нэс къыдигъэ­кIын, IофшIэпIэ чIыпIэ 300 фэдиз щызэхащэн алъэкIыщт. Инвестициехэр сомэ миллиарди 4-м нэсышъущтых.

«Мы проектым ишIогъэшхо къэкIонэу сэлъытэ. Ащ промышленнэ паркым зыригъэ­ушъомбгъущт. БэшIагъэу гъу­сэныгъэ зыдытиIэ SFT Group зэдэлэжьэныгъэу дытиIэр тапэкIи лъыдгъэкIуатэ тшIоигъу. Ащ производствэу щыIэ­хэм ягъэкIэжьын имылъку къы­зэрэхилъхьэрэм дакIоу предприятиякIэхэри ыгъэ­псыхэ, IофшIэпIэ чIыпIэхэр зэхищэхэ шIоигъу», — къы­Iуагъ КъумпIыл Мурат.

Инвесторхэм задэгущыIэ нэуж республикэм и ЛIышъхьэ АР-м и Правительствэ зычIэт унэм зэIукIэгъоу щызэрищагъэм промышленнэ паркым игъэпсынкIэ пшъэрылъ гъэнэфагъэхэр щафишIыгъэх.

АР-м и ЛIышъхьэ ипресс-къулыкъу