Экономикэм ихэхъоныгъэкIэ ишIогъэшхо къэкIощт
Адыгэ Республикэм исоциальнэ-экономикэ хэхъоныгъэ тегъэпсыхьэгъэ проектхэм япхырыщын епхыгъэ IофыгъохэмкIэ АР-м и ЛIышъхьэу КъумпIыл Мурат зэIукIэ зэхищэгъагъ. Тэхъутэмыкъое районым промышленнэ парк щыгъэпсыгъэныр ары тапэкIи республикэм хэхъоныгъэ ышIынымкIэ анахь мэхьанэшхо зиIэ проектхэм ащыщыр.
Республикэм ащ изэшIохын щыфежьагъэх. ИщыкIэгъэ инфраструктурэр промышленнэ паркым иIэным пае псэолъэшIыным ичэзыухэм мы зэIукIэм щатегущыIагъэх. АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур а IофыгъомкIэ псалъэ къышIыгъ.
Паркым пхырыкIыщт гъогухэм, инженер сетьхэм, газ, псы ыкIи электричествэ рыкIуапIэхэм япхыгъэ IофшIэнхэр непэкIэ агъэцакIэх.
Урысые Федерацием и Правительствэ иIэпыIэгъу хэлъэу гектар 200 зыубытыщт паркым ищыкIэгъэ инфраструктурэр щыгъэпсыгъэнымкIэ чэзыу-чэзыоу къэуцурэ Iофыгъохэр зэшIуахыщтых. Промышленнэ шъолъырым чIыпIэу ыубытырэми нахь зырагъэушъомбгъун мурад яI.
Ащ дакIоу проектымкIэ гъусэныгъэ зэдызиIэщтхэм, зэдэлэжьэщтхэм IофшIэн гъэнэфагъэ адызэшIуахы. Анахьэу инфраструктурэхэм алъэныкъокIэ гугъапIэу ыкIи амалэу щыIэхэм анаIэ атырадзэ. Промышленнэ паркыр зыдэгъэзэгъэ чIыпIэми макIэп елъытыгъэр. Транспорт зэхэкIыпIэ къэлэшхом — Краснодар ар пэблагъ. Федеральнэ гъогухэр благъэх, индустриальнэ паркым екIолIэщт гъогухэри ахэм къахэпщынхэкIэ Iэрыфэгъоу щыт. Ежь Тэхъутэмыкъое районым цIыфхэр зычIэсыщтхэ унэхэм яшIын етIупщыгъэу щэкIо, социальнэ псэуалъэхэр щагъэпсых, IофшIэнымкIи ящыкIэгъэ кIуачIэхэр яIэх.
Промышленнэ паркэу ашIыщтым къыхэлэжьэщтхэм зыкIэ ащыщ SFT Group. Инвесторым гухэлъэу иIэр джырэ уахътэм диштэрэ заводэу гофроупаковкэм икъыдэгъэкIын пылъыщтыр а чIыпIэм щишIыныр ары.
АР-м и ЛIышъхьэ къыIуагъ республикэр ащ фэдэ гъусэгъухэм Iоф адишIэным зэрэфэхьазырыр ыкIи инвестиционнэ проектыкIэхэм япхырыщынкIэ агъэпсыщт промышленнэ паркым амалышIухэр къызэритыщтхэр. ПэшIорыгъэшъэу къызэрэрадзагъэмкIэ, республикэм иэкономикэ тапэкIи нахь псынкIэу хэхъоныгъэ ышIынымкIэ а промышленнэ паркым ишIогъэшхо къэкIощт, IофшIэпIэ чIыпIакIэу мини 10 фэдиз щыIэ хъущт.
АР-м и ЛIышъхьэ ипресс-къулыкъу