Джащ фэдэу республикэ Парламентым и Тхьаматэу Владимир Нарожнэр, АР-м культурэмкIэ иминистрэу Аулъэ Юрэ, Къэралыгъо Советым — Хасэм идепутатхэу Къэгъэзэжь Мурат, ШъэоцIыкIу Схьатбый блэкIыгъэ тхьамафэм Джыракъые псэупIэ коим щыIагъэх. Ащ хахьэрэ къутырэу Свободнэм дэсхэр ары зыIукIагъэхэр, культурэм и Унэу ащ дэтым игъэкIэжьын ары ушъхьагъу шъхьаIэу фэхъугъэр. Мы уахътэм клубым бэджэндэу ыштэгъэ унэм Iоф щешIэ. Художественнэ самодеятельностымкIэ кружокитфэу яIэм кIэлэцIыкIуми, нахьыжъми нэбгыри 100 ахэт. Ахэр чанэу муниципальнэ ыкIи республикэ Iоф­тхьабзэхэм ахэлажьэх, мызэу-мытIоу апэрэ чIыпIэхэр къахьыгъэх. Ащ щылажьэхэрэм IофшIэкIэ амал тэрэзхэр зэрямыIэхэм пае къэмынэу, цIыфэу къутырым дэсхэм языгъэпсэфыгъо уахътэ шIуагъэ къытэу агъэкIоным пылъых. Владимир Нарожнэм къызэритхыгъэмкIэ, къоджэ клубхэм яшIын е ягъэкIэжьын къыздэлъытэгъэ проект­хэм, программэхэм ащыщ псэупIэр зэрэхэлэжьэщт шIыкIэм культурэмкIэ Министерствэмрэ муниципалитетымрэ зэдеплъыщтых. — Iоф псынкIэп, зы мафэкIэ хэкIыпIэ къыфэбгъотын плъэкIынэу щытэп, ау зэрэдгъэнэфагъэм тетэу лъыдгъэ­кIотэщт, — къытхыгъ Парламентым и Тхьаматэ. Клубым иIофхэм ямызакъоу, «социальнэ газификацием» фэгъэхьыгъэ программэм къыдыхэлъытагъэу гъэстыныпхъэ шхъуантIэр зимыIэхэм аIэкIэгъэхьэгъэным, гъогухэм ягъэцэкIэжьын, нэмыкIхэм зэIукIэгъум щатегущыIагъэх. Шъугу къэдгъэкIыжьын, аужырэ илъэси 10-р пштэмэ, лъэпкъ проектхэм, къэралыгъо программэхэм яшIуагъэ­кIэ мы псэупIэ коим ФАП-у тIу, зы гурыт еджапIэ, зы кIэлэцIыкIу IыгъыпIэ, культурэм и Унэу Джыракъые дэтыр, мы къоджэ дэдэр ыкIи къутырэу Свободнэр псым ирыкIуапIэу зэпызычыхэрэр, социальнэ псэуалъэхэм якIолIэрэ гъогухэр, общественнэ чIыпIэхэр, нэмыкIхэр щагъэцэкIэжьыгъэх е икIэрыкIэу щашIыжьыгъэх. ХЪУТ Нэфсэт.