Мэзаем и 6-м пчэдыжь пасэм Тыркуем чIыгур лъэшэу къызэрэщысысы­гъэм мы къэралыгъомрэ Шамрэ тхьамыкIэгъошхо къафихьыгъ. 1939-рэ илъэсым къыщегъэжьагъэу анахь чIыгу сысышхоу ахэм къяолIагъэм нэбгырэ 1200-м ехъу хэкIодагъ, мин пчъагъэмэ зэрар ахьыгъ, хэгъэгуитIумэ яинфраструктурэ зэхэкъутагъэ хъугъэ.

Урысые Федерацием и Президентэу Владимир Путиныр Тыркуемрэ Шамрэ япащэхэм афэтхьаусыхагъ. «Зигупсэхэмрэ зиIахьылхэмрэ чIэзы­нэ­гъэ пстэуми якъин адэтэгощы, зэрар зы­хьы­гъэхэм амал зэриIэкIэ нахь псынкIэу япсауныгъэ изытет зыпкъ иуцожьынэу тафэлъа­Iо. А ошIэ-дэмышIагъэ зыхэлъ тхьамыкIагъом къызыдихьыгъэ кIэух къинхэм ядэгъэзыжьынкIэ тишIуагъэ къэдгъэкIоным тыфэхьазыр», — къы­щеIо къэралыгъом ипащэ ителеграммэ.

ЯщыкIэгъэ IэпыIэгъур зэкIэ хэгъэгуитIуми зэрарагъэкIыщтым зэрэфэхьазырхэр Урысыем ошIэ-дэмышIэ IофхэмкIэ ыкIи зыкъэухъумэжьынымкIэ и Министерствэхэм къаIуагъ. Ащ фэгъэхьыгъэ къэбарыр Адыгеим и ЛIышъхьэ исоциальнэ нэкIубгъохэм къащитыгъ, тхьамыкIагъом хэфагъэхэм зафигъэзагъ.

«Тилъэпкъэгъухэр — адыгэхэр — Тыркуеми Шами бэу ащэпсэух. ХэкIодагъэхэмрэ зэрар зыхьыгъэхэмрэ афэгъэхьыгъэ къэбар гумэкIхэр ахэм къытIэкIагъахьэх.

ЦIыф лъэпкъыбэр зыщыпсэухэрэ тиреспубликэ ыцIэкIэ хэкIодагъэхэм яунагъохэм сафэтхьаусыхэ, зэкIэ зэрар зыхьыгъэхэр псынкIэу хъужьынхэу сафэлъаIо», — къытхыгъ КъумпIыл Мурат.