ГъогурыкIоныр щынэгъончъэнымкIэ Къэралыгъо автоинспекцием и Гъэ­IорышIапIэу АР-м щыIэм илъэсэу икIыгъэм ышIэгъэ IофшIэныр зэ­фихьысыжьыгъ.

Ащ фэгъэхьыгъэ пресс-зэIу­кIэу щыIагъэр зэрищагъ ин­спектор шъхьаIэм ипшъэрылъхэр зыгъэцэкIэрэ Хъунэго Мы­хьамодэ. Джащ фэдэу Iофтхьабзэм хэлэжьагъэх ащ игуа­дзэхэу Алексей Ковтуновыр, Алексей Чмыревыр, нэмыкI­хэри.

Кэралыгъо автоинспекцием Iофыгъо шъхьаIэу зэшIуихы­хэрэм ыкIи къулыкъум фэгъэ­хьыгъэ хэбзэгъэуцугъэм зэ­хъокIыныгъэу фашIыгъэхэм пресс-зэIукIэм щатегущыIагъэх. Анахьэу къызщыуцугъэхэр рес­публикэм игъогухэм къатехъу­хьэрэ хъугъэ-шIагъэхэм, ахэм ахэкIуадэхэрэм япчъагъ, гъогурыкIоным ишапхъэхэм алъы­плъэхэрэ видеокамерэхэм ягъэу­цун, хьылъэзещэ автомобильхэм язекIуакI, нэмыкIхэри.

АР-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и Къэралыгъо автоинспекцие и ГъэIорышIапIэу Адыгеим щыIэм ипащэ ипшъэрылъхэр зыгъэцэкIэрэ Хъунэго Мыхьамодэ пэублэм кIэкIэу икIыгъэ илъэсым икIэуххэм къатегущыIагъ.

— 2022-рэ илъэсым Адыгеим игъогухэм аварие 424-рэ къатехъухьагъ, ахэм нэбгырэ 69-рэ ахэкIодагъ ыкIи 503-мэ шъобж­хэр атещагъэх, — къыIуагъ Хъунэго Мыхьамодэ. — Къыпэрэ илъэсым ебгъапшэмэ, хъугъэ-шIагъэхэр 4-кIэ, цIыфышъхьэу хэкIодагъэр нэбгырэ 23-кIэ нахь макIэ хъугъэх, ау шъобж хэзыхыгъэхэм нэбгыри 9 ахэхъуагъ. Авариехэм нахьыбэмкIэ лъапсэу яIагъэр машинэ зэутэкIыр ыкIи лъэс­рыкIохэм зэратехьагъэхэр ары. Зидунай зыхъожьыгъэхэм япроцент 70-р мыхэм ахэфагъэх. Водителыр имыгъогу техьи, ыпэкIэ къикIырэ автомобилым еутэкIыгъэу атхыгъэ хъугъэ-шIагъэхэм япчъагъэ процент 20-кIэ нахьыбэ хъугъэ. КIэлэцIыкIухэр зыхэфэрэ хъугъэ-шIагъэхэр нахь макIэ шIыгъэнхэм тынаIэ тет зэпыт, а лъэ­ныкъом­кIи пэшIорыгъэшъ Iоф­тхьабзэу зэхатщэхэрэр макIэп, ау а пчъагъэм аварии 6 хэ­хъуагъ (пстэумкIи 49-рэ атхыгъ), зы нэбгырэ хэкIодагъ, 52-мэ шъобжхэр хахыгъэх.

Пресс-зэIукIэм къыщаIэтыгъэ упчIэхэм ащыщ ешъуагъэу машинэр зэрэзэрафэрэм тхьа­мыкIагъоу къыкIэлъыкIохэрэр. Водителым имыгъэсагъэ къыще­жьэ ешъуагъэу машинэр зэ­­рэ­зэрифэрэр. МыщкIэ хэбзэгъэуцугъэр зэрагъэлъэшыгъэм ахэр къыгъэуцухэрэп.

Къэралыгъо автоинспекцием мафэ къэс къулыкъур зэри­хьырэм имызакъоу, ешъуагъэхэр къыхэгъэщыгъэнхэмкIэ пэшIорыгъэшъ Iофтхьэбзэ 42-рэ икIы­гъэ илъэсым ригъэкIокIыгъ. Джащ фэдэу хэушъхьафыкIыгъэ Iофтхьэбзэ 249-рэ къоджэ псэупIэхэм, къалэхэм ащызэхащагъэх.

2022-рэ илъэсым ешъуагъэу автомобилыр зезыфэщтыгъэхэм ыкIи уплъэкIуныр зыкIунэу фэмыягъэхэм алъэныкъокIэ административнэ Iоф 1602-рэ инспекторхэм къызэIуахыгъ. Ешъуагъэу ятIуанэрэу къаубытыгъэхэм алъэныкъокIэ материали 168-рэ атхыгъ. Ыпэрэ илъэсхэм ябгъапшэмэ, мы пчъагъэхэр нахь макI, ау джыри уагъэрэхьатынэу щытэп. Адыгеим и Къэралыгъо авто­инспекцие мы гумэкIыгъом идэгъэзыжьын къихьэгъэ илъэс ми ынаIэ тыригъэтыщт.

Наркотикхэр зыгъэфедагъэу рулым кIэрытIысхьэхэрэм япчъа­гъи зэрэхахъорэр Iофыгъошхоу щыт. Ащ фэдэ нэбгырэ 23-рэ икIыгъэ илъэсым агъэунэфыгъ. Ешъуагъэу къагъэуцухэ­рэр ауплъэ­кIунхэу медицинэ учреждениехэм джы защэхэкIэ, зэу наркотикхэмкIи ауплъэкIух, ау ащ къезэгъырэр мэкIэ дэд.

Хэбзэнчъэу наркотикхэр зэрагъэзекIорэм къулыкъушIэхэр лъэплъэх. 2022-рэ илъэсым транспортхэм яуплъэкIун фэIорышIэрэ Iофтхьабзэхэм яшIуагъэкIэ наркотикхэр зэращэу гъогогъу 42-рэ агъэунэфыгъ.

ГъогурыкIоным ишапхъэхэр зыукъохэрэр къыхэгъэщыгъэнымкIэ сурэт ыкIи видео тезы­хырэ пкъыгъохэм мэхьанэшхо яI. Ащ фэдэ комплекси 128-рэ республикэм щагъэуцугъ. Ахэм автомат шIыкIэм тетэу Iоф ашIэ. Камерэхэм псынкIэу зекIохэрэр къыхагъэщых.

ГъогурыкIоным ишапхъэхэр амыукъонхэм, хъугъэ-шIагъэхэр нахь макIэ шIыгъэнхэм афэшI автомат шIыкIэм тетэу Iоф зы­шIэрэ мыщ фэдэ пкъыгъохэм япчъагъэ нахьыбэ ашIыщт ыкIи 2023-рэ илъэсым ащ фэдэ комп­лекс 16 джыри Адыгеим ща­гъэуцущт.

Журналистхэм къатыгъэ уп­чIэхэм ащыщ ахъщэ къолъхьэ тын-Iыхыныр тигъогухэм къазэращекIокIырэр. Водителэу къагъэуцухэрэм янахьыбэм а чIы­пIэм Iофыгъор щызэшIуахыныр нахь къыхахы. Ахъщэ къолъхьэ тын-Iыхыныр дэгъэзыжьыгъэным зэрэдэлажьэхэрэр, пэшIоры­гъэшъ зэдэгущыIэгъухэр къу­лыкъушIэхэм зэрадашIыхэрэр Адыгеим и Къэралыгъо автоинспекцие ипащэхэм къаIуагъ.

Пресс-зэIукIэм нэмыкI уп­чIабэхэр къыщаIэтыгъэх, ахэм игъэ­кIотыгъэ джэуапхэр инспекторхэм къаратыжьыгъэх. Сурэтыр Iэшъынэ Аслъан тырихыгъ.