ИнэIуасэ ыукIыжьыгъ

УФ-м и Следственнэ комитет иследственнэ ГъэIорышIапIэу АР-м щыIэм Джэджэ районымкIэ имежрайон отдел икъулыкъушIэхэм Шэуджэн районым щыщ хъулъфыгъэу илъэс 51-рэ зыныбжьым ылъэныкъокIэ уголовнэ Iоф къызэIуахыгъ. ИнэIосэ хъулъ­фыгъэр зэриукIыжьыгъэм фэшI ар агъэмысэ.

Следствием зэригъэунэфыгъэмкIэ, 2023-рэ илъэсым щылэ мазэм и 26-м, чэщым Шэуджэн районым ит къуаджэу Мамхыгъэ щыпсэурэ зэнэIосэ хъулъфы­гъитIум азыфагу зэгурымыIоныгъэ къихьагъ, ащ къы­хэкIэу илъэс 51-рэ зыныбжь хъулъфыгъэм Iашэр къышти, илъэс 41-рэ зыныбжь инэIосэ кIалэм ышъхьэ щэгъогогъо еуагъ. Шъобжэу тещагъэхэм къахэкIэу а чIыпIэм ащ идунай щихъожьыгъ. ПэшIорыгъэшъэу зэрагъэунэфыгъэмкIэ, хъулъфыгъитIум азыфагу къи­тэджэгъэ зэгурымыIоныгъэм лъапсэ фэхъугъэр чIыгу Iахьым епхыгъагъ. ХэбзэухъумэкIо къулыкъушIэхэр мы чIыпIэм псынкIэу къэсыгъэх ыкIи лажьэ зиIэр аубытыгъ.

Мы мафэхэм следствием икъулыкъушIэхэм зэхэ-фын Iофтхьабзэхэр рагъэкIокIых, мы хъугъэ-шIагъэм епхыгъэу къэбарыр нахь игъэкIотыгъэу къызIэ­кIа­гъахьэ.

Хэбзэ машинэмкIэ къекIокIыгъ

АР-м хэгъэгу кIоцI IофхэмкIэ и Ми­нистерствэ оперативнэ IофшIэнымкIэ иполицие ипащэ игуадзэу Iоф зышIэ­щтыгъэм уголовнэ Iофэу къыфы­зэ-Iуахыгъэм хэплъагъэх ыкIи ар агъэ­мысагъ.

ЩынэгъончъэнымкIэ федеральнэ къулыкъум и Гъэ­IорышIапIэу АР-м щыIэм икъулыкъушIэхэмрэ хэгъэгу кIоцI IофхэмкIэ и Министерствэм щынэгъончъэнымкIэ икъулыкъурэ зэгъусэхэу агъэунэфыгъ министерствэм иIофышIэу, полицием иполковникэу И.В. Мелиховым иIофшIэн емыпхыгъэу ежь ышъхьэ IофкIэ зыгъэпсэфыгъо мафэхэм къулыкъу автомобилыр зэрэфаем фэдэу зэригъэфедагъэр, джащ фэдэу министерствэм иахъщэкIэ гъэстыныпхъэр ащ зэрэригъэхъуагъэр.

Федеральнэ казеннэ учреждениеу «Центр хозяйственного и сервисного обеспечения МВД по РА» зыфиIорэм хэбзэ фитыныгъэхэр ыкIи шIоигъоныгъэхэр полицием иполковник зэриукъуагъэхэр къыгъэшъыпкъэжьыгъ.

ЩынэгъончъэнымкIэ федеральнэ къулыкъум ыкIи следственнэ гъэIорышIапIэу АР-м щыIэм къагъэхьазырыгъэ материалхэмкIэ уголовнэ Iофыр къызэIуа-­­хыгъ ыкIи зэхафыгъ.

2023-рэ илъэсым щылэ мазэм и 10-м Мыекъопэ къэлэ хьыкумым иунашъокIэ И.В. Мелиховыр агъэмысагъ ыкIи тазыр тыралъхьагъ.

Хьапсым зэрэчIэсзэ

УФ-м и Следственнэ комитет ислед­ственнэ ГъэIорышIапIэу АР-м щыIэм хьапсым чIэсым ылъэныкъокIэ уголов­нэ Iоф къызэIуихыгъ.

Экстремизмэм ылъэныкъокIэ Iоф зышIэрэ организацием зэрэхэтыгъэм ыкIи ахъщэ IэпыIэгъу ащ зэрэритыгъэм фэшI ар агъэмысэ.

ЩынэгъончъэнымкIэ федеральнэ къулыкъум и Гъэ­IорышIапIэу АР-м щыIэм къыугъоигъэ материалхэмкIэ уголовнэ Iофыр къызэIуахыгъ.

Следствием къызэритыгъэмкIэ, лажьэ зиIэу зэгуцафэхэрэр хьапсым чIэсызэ амыдэрэ экстремистскэ организациеу дунэе общественнэ движениеу «Арестантское уголовное единство» зыфиIорэм хэтэу 2022-рэ илъэсым мэлылъфэгъум къыщегъэжьагъэу организацием пае хьапсым чIэсхэм ахъщэ къаIихыгъ. Къыугъоигъэ ахъщэр нэужым экстремистскэ органи­за­цием ищыкIагъэхэм апэIуагъэхьагъ.

Мы уголовнэ IофымкIэ зэхэфынхэр лъагъэкIуатэх.

ЦIыфхэм ядаохэр зэхефых

ЦIыфхэм УФ-м и Следственнэ ко­митет зыкъызэрэфагъазэрэм мэхьанэшхо раты. Мыщ икъулыкъушIэхэм дао пэпчъ зэхафы ыкIи охътэ кIэкIым къы­кIоцI джэуапхэр аратыжьых.

Ахэм нахь Iофыгъо къинхэм анаIэ атырадзэ, хабзэр ыкIи хэбзэ рэхьатныгъэр къаухъумэхэзэ, шъыпкъагъэ хэлъэу цIыфхэм яупчIэхэр зэрэзэхафыщтхэм ыуж итых. Къулыкъум ипшъэрылъ шъхьаIэхэм ащыщ хабзэр зыукъуагъэхэм ыкIи бзэджашIэхэм пшъэдэкIыжь ягъэхьыгъэныр.

Урысыем и Следственнэ комитет иследственнэ ГъэIорышIапIэу АР-м щыIэм зызэрэфэбгъэзэн плъэкIыщтхэр:

— узыгъэгъозэрэ къэбархэм ятелефон номерыр 8(8772) 56-04-20;

— «цыхьэшIэгъу телефоным» иномерыр 8(8772) 56-04-26;

— Урысыем къыхэхьажьыгъэ субъектыкIэхэм ащы­псэухэрэм, джащ фэдэу Украинэм къикIыжьыгъэхэу тикъэралыгъо къихьэгъэ цIыфхэм упчIэжьэгъу къа­фэхъущтых телефон номерэу 8-918-022-70-07-м зытеохэкIэ;

— чэщи мафи Iоф зышIэрэ телефонэу «КIэлэцIыкIум щынагъо шъхьарыт» зыфиIорэм ителефон номерэу 8(8772) 56-00-08;

— къолъхьэ тын-Iыхыныр къызэтегъэуцогъэнымкIэ телефон номерхэу 8(8772) 56 -08-76, 8-988-080-14-74;

— бизнесым илIыкIохэм яIофхэм язэхэфынкIэ телефон номерэу 8(8772) 56-15-31.

Следственнэ комитетыр зыдэщыIэр: Адыгэ Рес­публикэр, къалэу Мыекъуапэ, урамыр Комсомольскэр, унэр 201а.

Уголовнэ Iофхэм якъызэIухын ыкIи язэхэфын япхыгъэ упчIэхэмкIэ, процессуальнэ уплъэкIунхэм, даохэм игъом ахэмыплъагъэхэмэ, унэшъо тэрэз амышIыгъэмэ цIыфхэр зыщыфэе уахътэм УФ-м и Следственнэ комитет иследственнэ ГъэIорышIапIэу АР-м щыIэм исле­довательхэм зафагъэзэн алъэкIыщт.

Урысыем и Следственнэ комитет иофицерхэм къы­хагъэщы социальнэ сетьхэм мэхьанэшхо зэряIэр. Ащ къыхэкIэу къулыкъум «ВКонтакте» зыфиIорэ аккаунтыр ыгъэпсыгъэу цIыфэу закъыфэзыгъазэхэрэм джэуап аратыжьы. 2022-рэ илъэсыр пштэмэ, социальнэ сетьхэмкIэ следственнэ ГъэIорышIапIэм икъулыкъушIэхэм дэо 1045-рэ зэхафыгъ, псэупIэ фитыны­гъэхэр, ахъщэ тедзэхэм ятын, социальнэ ухъумэнымкIэ, псауныгъэр къэухъумэгъэнымкIэ, нэмыкIхэмкIи нэбгырэ 594-мэ закъафагъэзагъ.

Псым ытхьэлагъ

Илъэс 81-рэ зыныбжь хъулъфыгъэр псым зэритхьэлагъэм епхыгъэ процес­суальнэ уплъэкIунхэр Мыекъопэ рай­оным щыIэ следственнэ отделым регъэкIокIых.

ПэшIорыгъэшъэу зэрагъэунэфыгъэмкIэ, 2023-рэ илъэсым щылэ мазэм и 24-м, мафэм Мыекъопэ районым ит станицэу Безводнэм щыпсэурэ илъэс 81-рэ зыныбжь хъулъфыгъэр имотороллер тесэу къа­пэгъунэгъу псыхъураеу къыгъэщтыгъэм пцэжъыяшэ кIуагъэ. Пчыхьэ хъугъэу инэIосэ хъулъфыгъэу а чIыпIэм блэкIыщтыгъэм хъулъфыгъэм имотороллер псыхъураем дэжь щытэу зелъэгъум, къызэтеуцуагъ. Нахь благъэу а чIыпIэм зекIуалIэм, ылъэгъугъ мыл пхырыутыгъэм дэжь хъулъфыгъэм ипаIорэ ицуакъэрэ щылъхэу.

ОшIэ-дэмышIэ IофхэмкIэ УФ-м и Министерствэ и ГъэIорышIэпIэ шъхьаIэу АР-м щыIэм икъэгъэнэжьа­кIохэм лъыхъун Iофтхьабзэу зэрахьагъэхэм яшIуа­гъэкIэ мыл чIэгъым хъулъфыгъэм ихьадэ къыщагъотыжьыгъ.

Мы хъугъэ-шIагъэмкIэ следственнэ ГъэIорышIапIэм икъулыкъушIэхэм уплъэкIунхэр рагъэкIокIых, ащ кIэухэу фэхъущтым елъытыгъэу унашъо ашIыщт.

Следственнэ ГъэIорышIапIэм икъулыкъушIэхэм цIыфхэм анаIэ тырарегъадзэ кIымэфэ лъэхъаным псыуцупIэхэр щынагъоу зэрэщытхэм, ежьхэри, ясабыйхэри мыкIонхэу къяджэх.

Зыщышъумыгъэгъупш:

— цIыфыр псы чъыIэм зыхафэкIэ, такъикъ 15 — 20-кIэ ыпсэ хэкIын ылъэкIыщт;

— мылыр чагъэу гу лъышъутагъэмэ, псынкIэу нэпкъым шъуекIужь;

— мыл чагъэм шъупхырызыгъэмэ, псыр къызди­чъырэ лъэныкъом зызэрэбгъэзэщтым упылъын фае.

Зыгъэхьазырыгъэр КIАРЭ Фатим.