Лъэпкъ проектэу «ПсэупIэр ыкIи къэлэ щыIакIэр» зыфиIорэр гъэцэкIэгъэным пае аштэгъэ федеральнэ проектэу «Псы къабз» зыфиIорэм къыщыдэлъытагъэу, икIыгъэ илъэсым тиреспубликэ псы къабзэ къэзытырэ псэуалъэхэр кIэу щашIыгъэх е щагъэцэкIэжьыгъэх.

— «Псы къабз» зыфиIорэ проектым къыщыдэлъытагъэу шапхъэхэм адиштэрэ псы къабзэ цIыф­хэм аIэкIэзыгъэхьащт псэолъи 7 Адыгеим икIыгъэ илъэсым щатIупщыгъ, — къыхигъэщыгъ УФ-м псэолъэшIынымкIэ ыкIи псэупIэ-коммунальнэ хъыз­мэтымкIэ иминистрэ игуадзэу Алексей Ересько.

Ахэм ащыщ Теуцожь районымкIэ къуаджэу Джэ­джэхьаблэ ыкIи къутырэу Городскоим ащагъэкIэ­жьыгъэ, Тэхъутэмыкъое районымкIэ поселкэу Но­вэм икIэрыкIэу ща­шIы­жьыгъэ псы къычIэщыпIэхэр.

Джащ фэдэу Мыекъуапэ хэхьэрэ поселкэу Родниковэм псырыкIопIэ километри 6 щызэблахъугъ. Ащ ишIуагъэкIэ нэбгырэ 1100-мэ шапхъэхэм адиштэрэ псы къабзэ аIэкIахьэ. Адыгэкъалэ хэхьэрэ къутырэу Псэкъупсэ псы къы­чIэщыпIэу щагъэцэкIэжьыгъэм нэбгырэ 650-у мы псэупIэм дэсым псы къабзэ аритыщт, станицэу Хан­скэм псырыкIуапIэу щагъэпсыгъэм щагу 11500-рэ рап­хыгъ.

Ахэм анэмыкIэу Теуцожь районымкIэ къуаджэу Гъобэкъуае псы къабзэр къэзытыщт псэуалъэу ща­шIыгъэм къычIэщыпIитIу фашIыгъ, псыр зыгъэ- къэ­бзэщт станцие ща­гъэ­псыгъ.

— Адыгеим коммунальнэ псэолъакIэхэр зэрэщашIыхэрэм лъыплъагъэх «РосСтройКонтролым» иин­спекторхэр. ИщыкIэгъэ IофшIэнхэр хэзыгъэ имыIэу агъэцэкIэнхэм, проектым къыщыдэлъытагъэхэр пIа­лъэхэм апэ итэу зэрагъэцакIэхэрэм иягъэ къэмыкIоным анаIэ тетыгъ, — къыкIигъэтхъыгъ «РосСтройКонтролым» игенеральнэ директорэу Вла­димир Щербининым. 2019-рэ илъэсым къыщыублагъэу федеральнэ проектэу «Псы къабз» зы­фиIорэр Урысые Федерацием ишъолъырхэм зэращыпхыращырэм лъэплъэ Урысые Федерацием псэо­лъэшIынымкIэ ыкIи псэу­пIэ-коммунальнэ хъызмэтымкIэ и Министерствэ епхыгъэ къулыкъоу «РосСтройКонтролыр».

«РосСтройКонтролым» ипресс-къулыкъу.