Урысыем и Правительствэ ыштэгъэ унашъом къызэрэщиIорэмкIэ, мэзаем и 1-м къыщегъэжьагъэу социальнэ тын заулэхэр процент 11,9-кIэ нахьыбэ хъущтых. Правовой актхэмкIэ официальнэ интернет-порталым ащ фэгъэхьыгъэ документыр къихьагъ.

Хэгъэгум и Президенгтэу Владимир Путиным пшъэрылъ къызэрэфишIыгъэм тетэу Урысыем и Премьер-министрэу Михаил Мишустиныр щылэ мазэм и 31-м зыкIэтхэжьыгъэ унашъом къызэрэщиIорэмкIэ, мэзаем и 1-м къыщегъэжьа­гъэу тын ыкIи ахъщэ IэпыIэгъу зау­лэхэм, кIэлэцIыкIухэм апае ара­тыхэрэри къыдыхэлъытагъэу, процент 11,9-рэ къахэхъощт.

— Федеральнэ бюджетым а ахъщэр къыщыдалъытагъ ыкIи IэпыIэгъу тедзэ зищыкIэгъэ цIыфхэр социальнэу ухъумэ­гъэнхэм исистемэ изы Iахьэу ар щыт. Правительствэм ренэу а Iофыгъохэм ынаIэ атырегъэты, — къыIуагъ Михаил Мишустиным.

— Документым нафэ къызэришIырэмкIэ, сабый къызыфэ­хъурэм зэтыгъо ахъщэ IэпыIэгъоу ратырэр, сабыим зыщы­лъыплъэрэ лъэхъаным тегъэ­псыхьэгъэ ахъщэ IэпыIэгъоу мазэ къэс ратырэм, ны мылъкум, ветеранхэм мазэ къэс аратырэ ахъщэм, страховой тынхэм ыкIи социальнэ Iэпы­Iэгъум телъытэгъэ нэмыкI лъэныкъохэм къахэхъощт.

Адыгэ Республикэм IофшIэнымрэ социальнэ хэхъоныгъэм­рэкIэ и Министерствэ къызэрэщатыгъэмкIэ, 2023-рэ илъэсым мэзаем и 1-м къыщыублагъэу цIыф куп заулэхэм мазэ къэс ахъщэу аIэкIагъэхьащтыр рес­публикэ бюджетым къыщыда­лъытагъ.

2004-рэ илъэсым тыгъэгъазэм и 31-м телъытагъэу IофшIэным иветеранхэм ыкIи ахэм арагъа­пшэщтыгъэх — сомэ 1458,66-рэ, 1941-рэ илъэсым мэкъуогъум и 22-м къыщыублагъэу 1945-рэ илъэсым жъоныгъуакIэм и 9-м нэс мэзихым нахь мымакIэу Iоф зышIагъэхэм (СССР-м ичIыпIэхэу пIэлъэ гъэнэфагъэкIэ къа­дзыхьэгъагъэхэм Iоф зыща­шIэгъэ уахътэр хэмытэу) е Хэ­гъэгу зэошхом илъэхъан ­гуе-тыныгъэ ин фыряIэу Iоф зышIагъэхэу СССР-м иорденхэмрэ имедальхэмрэ къызфагъэшъошагъэхэм — сомэ 1547,19-рэ, цIыфхэу аухыижьыгъэхэм —сомэ 1703,94-рэ, политическэ репрессиехэм зэрар къызфахьыгъэкIэ алъытагъэхэм — сомэ 1703,94-рэ, медалэу «Адыгеим и Щытхъузехь» зыфиIорэр, Адыгэ Республикэм и Къэралыгъо Совет — Хасэм и ­Щытхъу тамыгъэу «Закон. Пшъэрылъ. ЦIыфыгъ» зыфиIорэр къызфагъэшъошагъэхэм (бзылъфыгъэ­хэм илъэс 20-м нахь мымакIэу, хъулъфыгъэхэм илъэс 25-м нахь мымакIэу Iоф ашIагъэ зыхъукIэ) — сомэ 1458,66-рэ, илъэс 40-м нахь мымакIэу Iоф зышIэгъэ бзылъфыгъэхэм ыкIи илъэс 45-м нахь мымакIэу Iоф зышIэгъэ хъулъфыгъэхэм — сомэ 1458,66-рэ мэзаем и 1-м къыщыублагъэу къаратыщт.