Iофтхьабзэу «Хэгъэгум иухъумакIохэр» зыфиIорэм къызэрэщыдэлъытагъэу, «НыбжьыкIэ гвардием» хэтхэм хэушъхьафыкIыгъэ дзэ операцием хэлэжьэрэ дзэкIолIхэм апае письмэхэр агъэхьых.

Гвардием иныбжьыкIэ чанхэм ащыщэу Александр Ковальчевскэм къызэриIуагъэмкIэ, мызыгъэгум письмэхэр Адыгэ къэралыгъо университетым и Мыекъопэ гуманитарнэ-техническэ колледж исту­дент­хэр ягъусэхэу агъэхьазырыгъэх. Ащ ыпэкIэ дзэкIолIхэр зыщычъыещтхэ дзыохэм ядын хэлэжьагъэх.

— ГущыIэ фабэхэмкIэ тиухъумакIохэм тадеIэн фае. Гуфэбэныгъэ зыхэлъ псалъэ­хэр зэрыт письмэхэр «Единэ Россием» иобщественнэ приемнэхэу Мыекъуапэ ыкIи нэмыкI муниципальнэ образованиехэм адэтхэм, «НыбжьыкIэ гвардием» и Шъолъыр штаб ащытэугъоих. ГущыIэм пае, ИлъэсыкIэ мэфэкIым ипэгъокIэу открыткэ 1000-м ехъу республикэм икIэлэ­еджакIохэмрэ истудентхэмрэ дзэкIолIхэм апае къагъэхьазырыгъэу «молодогвардейцэхэм» атIупщыгъ. Джыри мары Хэгъэгум иухъумакIо и Мафэ ипэгъокIэу агъэхьазырых. Мыекъуапэ щыпсэоу Iофтхьабзэм къыхэлажьэмэ зышIоигъохэм открыткэхэр «Единэ Россием» иобщественнэ приемнэ къырахьылIэнхэ алъэкIыщт. Адресыр: урамэу Краснооктябрьскэр, унэр N 4-р, — къыIуагъ Мыекъуапэ инароднэ депутатхэм я Совет, «Единэ Россием» и Апшъэрэ Совет ахэтэу, Адыгеим и «НыбжьыкIэ гвардие» ипащэу Бэрзэдж Асыет.