Адыгэ къэралыгъо ыкIи Мыекъопэ технологическэ университетхэм ястудентхэм тыгъуасэ аIукIагъ УФ-м и Къэралыгъо Думэ идепутатэу, ЛДПР-м ифракцие хэтэу, бюджетымкIэ ыкIи хэбзэIахьхэмкIэ ащ и Комитет ипащэ игуадзэу Пэнэшъу Къэплъан.

— НыбжьыкIэхэм непэ хэгъэгум ихъухьэхэрэм тады­тегущыIэныр, Президентым иунашъохэм ямэхьанэ, неу­щырэ мафэм зэхъокIыныгъэу къыздихьын ылъэкIыщтхэм афэхьазырынхэ фаеу зэрэщытыр алъыдгъэIэсыныр ары мы зэIукIэгъум мурад шъхьаIэу иIэр, — къытиIуагъ депутатым Iофтхьабзэр рамыгъа­жьэзэ гущыIэгъу тызыфэ­хъум.

Адыгэ къэралыгъо университетым зэIукIэгъур щыкIуагъ. Ащ хэлэжьагъэх мы апшъэрэ еджапIэм иректорэу Мамый Даутэ, АР-м и Къэралыгъо Совет — Хасэм идепутатэу, гъэсэныгъэмкIэ, наукэмкIэ, ныбжьыкIэ IофхэмкIэ, спортымкIэ, СМИ-кIэ ыкIи об­щественнэ организациехэм зэпхыныгъэу адыряIэмкIэ и Ко­митет ипащэу Шэуджэн Тембот, нэмыкIхэри.

Пэнэшъу Къэплъан гущыIэр зештэм, апэрапшIэу ЛДПР-м непэ ипащэу Леонид Слуцкэм студентхэм зыкъызыща­фи­гъазэрэ видеороликым ри­гъэплъыгъэх. Нэужыми партиер зэхэзыщагъэу, илъэсыбэрэ ащ ипэщагъэу, дунаим ехы­жьыгъэ Владимир Жириновскэм ныбжьыкIэхэм афэгъэ­хьыгъэ псалъэу къы­шIыгъа­гъэхэр къагъэлъэгъуагъэх.

Пэнэшъу Къэплъан тарихъ хъугъэ-шIэгъэ зэфэшъхьафхэр агу къыгъэкIыжьзэ, Хэгъэгу зэошхом илъэхъан Сталинград шъхьафит зашIыжьыгъэр ­илъэс 80 зыщыхъурэ мафэм зэIу­кIэгъур зэрэтефагъэр къыхи­гъэщыгъ. Яхэгъэгу, я Родинэ ита­рихъ ашIэным, ар нэмыкIэу къэзыгъэлъагъомэ, кIэзы­IотыкIыжьмэ зышIоигъохэм апэуцужьышъунхэм мэхьанэшхо зэриIэм къыкIигъэтхъыгъ.

ХэушъхьафыкIыгъэ дзэ операциеу Украинэм щызэхащагъэми игугъу къышIыгъ. ЛДПР-р ащ фэдэ Iофтхьабзэ зэхэщэгъэным игъоу зылъытагъэхэм, Президентым дезыгъэштагъэ­хэм зэращыщыр къыIуагъ.

— НэмыкI хэкIыпIэ щыIэ­жьыгъэп. ТекIоныгъэр къызэ­рэдэтхыщтым зэкIэми тицыхьэ телъын фае. ЗыкIыныгъэр ары ткIуачIэр, — къыкIигъэтхъыгъ депутатым.

ЛДПР-м къэралыгъом ищы­Iэ­ныгъэ иIахьэу хилъхьэрэми, ащ ифракцие хэт депутатхэм хэбзэгъэуцун Iофэу ашIэрэми, кIэщакIо зыфэхъухэрэми кIэ­кIэу къатегущыIагъ. Пстэумэ ауж студентхэм яупчIэхэм джэуапхэр къаритыжьыгъэх.

Шъугу къэдгъэкIыжьын, Пэ­нэшъу Къэплъан къэралыгъо ыкIи политическэ Iофы­шIэшху, экономикэ шIэныгъэхэмкIэ кан­дидат, 2011 — 2021-рэ илъэс­хэм АР-м и Къэралыгъо Совет — Хасэм идепутатыгъ, ащ ыуж УФ-м и Къэралыгъо Думэ идепутатэу хадзыгъ.

ХЪУТ Нэфсэт.