Зэнэкъокъум шъукъыхэлажь
ЗыгъэпсэфыпIэу «Лэгъонакъэ» ипроектнэ офис ныбжьыкIэ проектхэмкIэ Урысые зэнэкъокъоу «Воплоти свою мечту!» зыфиIорэм ежь иноминацие щигъэнэфагъ.
Зэнэкъокъум щатекIохэрэм амал яIэщт япроектхэр агъэцэкIэнэу, зыгъэпсэфыпIэу «Гъэхъунэ Плъыжьым» тхьамафэрэ стажировкэ щахьынэу.
ГъэрекIо ишэкIогъу мазэ зыгъэпсэфыпIэу «Лэгъонакъэ» ипроектнэ офис Адыгэ Республикэм иапшъэрэ еджапIэхэм кадрэхэм якъэгъэхьазырынкIэ зэдэлэжьэныгъэ зэрадыриIэщтым ехьылIэгъэ зэзэгъыныгъэ адишIыгъагъ. Ащ диштэу 2022-рэ илъэсым Адыгеим истудент 600-м ехъумэ зыгъэпсэфыпIэу «Гъэхъунэ Плъыжьым» практикэ щахьыгъ. Проектыр зекIоным хэхъоныгъэ егъэшIыгъэным фэIорышIэн, Адыгэ Республикэм чIыопс, тарихъ-культурэ амалэу иIэхэр къыщыдэлъытэгъэнхэ ыкIи зыгъэпсэфыпIэу
«Лэгъонакъэ» ар щагъэцэкIэным телъытэгъэн фае. Проектыр зыгъэцэкIэн зылъэкIыщтыр Адыгэ Республикэм иапшъэрэ еджапIэхэм ащыщ горэм истудентитIу нахь мымакIэу зыхэхьэрэ купыр ары.
Зэнэкъокъум щатекIорэ купым зыгъэпсэфыпIэу «Гъэхъунэ Плъыжьым» стажировкэр щихьыщт. Джащыгъум студентхэм теоретическэ шIэныгъэхэр къызэрэзыIэкIагъэхьащтхэм дакIоу зекIоным изэхэщэн тегъэпсыхьэгъэ IофшIэнхэми ахэлэжьэнхэ алъэкIыщт. НыбжьыкIэ проектхэм я Урысые зэнэкъокъоу «Воплоти свою мечту!» зыфиIорэм фэгъэхьыгъэ Положением сайтэу «httрs://Iеаdеr-id.ru/еvеnts/387880» зыфиIорэм нэIуасэ зыщыфашIын алъэкIыщт. Зэнэкъокъум хэлажьэ зышIоигъохэм ялъэIу тхылъхэр 2023-рэ илъэсым мэзаем и 20-м нэс аIахыщтых.