Адыгеим и ЛIышъхьэу КъумпIыл Мурат республикэм игъогу-транспорт инфраструктурэ тапэ­кIи нахьышIу шIыгъэным, джащ фэдэу лъэпкъ проектэу «Щынэгъончъэ гъогу дэгъухэр» зыфиIоу 2023-рэ илъэсым тегъэпсыхьагъэм иIофыгъохэмкIэ зэIукIэ зэхищэгъагъ.

Ащ хэлэжьагъэх АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м финансхэмкIэ иминистрэу Виктор Орловыр, АР-м псэо­лъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэу Валерий Картамышевыр, АР-м и ЛIышъхьэрэ иминистрэхэм я Кабинетрэ я Администрацие ипащэ игуадзэу Хъоткъо Саниет, АР-м икъэралыгъо бюджет учреждениеу «Адыгеяавтодорым» ипащэу Алексей Корешки­ныр, Мыекъуапэ имэрэу Ген­на­дий Митрофановыр, Ябло­новскэ къэлэ псэупIэм ипащэу Iэтэжьыхьэ Заурдин.

ЗэIукIэм илъэхъан гъогухэмкIэ проектхэм игъэкIотыгъэу атегущыIагъэх, лъэпкъ проектхэмрэ къэралыгъо программэхэмрэ атегъэпсыхьагъэу рахъу­хьагъэхэр гъэцэкIагъэ зэрэ­хъущтхэ амалхэр агъэунэфы­гъэх. Шъугу къэтэгъэкIыжьы: лъэпкъ проектэу «Щынэгъончъэ гъогу дэгъухэр» зыфиIорэр зы­щыпхыращырэ уахътэм къы­кIоцI республикэмкIэ проектым Iоф дэзышIагъэхэм ягухэлъ къадэ­хъугъ. Ары пакIошъ, Адыгеир а лъэпкъ проектым ипхырыщынкIэ анахь шъолъыр дэгъу-хэм ахалъытагъ.

Илъэсэу икIыгъэм лъэпкъ про­ектым диштэу республикэм иавтомобиль гъогухэм ащыщ Iахь 49-мэ (километрэ 300 фэдиз) гъэцэкIэжьын IофшIэнхэр арашIылIагъэх, джащ фэдэу лъэ­мыджи 3 зэтырагъэпсыхьагъ, транспортым ионтэгъугъэ иуплъэкIункIэ пунктитIу, гъогухэм шапхъэхэр зэращаукъохэрэр зыгъэунэфыщт камерэ 18 агъэу­цугъ. Ащ нэмыкIэу Адыгеим къэралыгъо гъэпсыкIэ иIэ зы­хъу­гъэм ия 100-рэ илъэс ехъу­лIэу псэолъэшхохэм яшIын аухыгъ. Ахэм зыкIэ ащыщ Мые­къуапэ къэзыухьэрэ автомобиль гъогум ишIын (я 3-рэ чэзыур).

ТапэкIи инфраструктурэм хэ­хъоныгъэ егъэшIыгъэным, АР-м и Гъогу фонд икъэкIуапIэхэр нахь шIогъэ ин хэлъэу гъэфедэгъэнхэм япхыгъэ Iофыгъохэр Адыгеим и ЛIышъхьэ къыхигъэщыгъэх.

«Гухэлъхэр къыжъудэхъунхэм пае IофшIэнэу жъугъэцэкIэщтхэм икъоу шъунаIэ атежъугъэт, бюджет мылъкур тэрэзэу жъугъэфедэ ыкIи къэкIуапIэхэм акIэшъуугъуай. ЗэкIэ ишъухъу­хьэхэрэр нафэу щытынхэ фае», — къыIуагъ КъумпIыл Мурат.

Валерий Картамышевым къы­зэрэхигъэщыгъэмкIэ, 2023-рэ илъэсым республикэм и Гъогу фонд ибюджет сомэ миллиарди 4,2-м ехъущт. Ащ щыщэу сомэ миллиард 1,2-р федеральнэ бюд­жетым, сомэ миллиарди 3-р — республикэ бюджетым къа­хэкIыщт. Лъэпкъ проектымрэ программэу «Къуаджэхэм хэ­хъо­ныгъэ ягъэшIыгъэныр» зыфи­Iорэмрэ атегъэпсыхьагъэу Iоф­тхьэбзэ заулэ а мылъкумкIэ зэшIуахыщт.

Лъэпкъ проектым къыдыхэлъытагъэу Мыекъуапэ, псэу­пIэу Яблоновскэм, Кощхьэблэ, Джэ­джэ, Мые­къопэ ыкIи Шэуджэн районхэм ягъогухэр агъэцэ­кIэжьыщтых. Республикэм и Гъогу фонд шъхьафэу къыды­хэлъытагъэх чIыпIэ мэхьанэ зиIэ гъогухэм ягъэцэкIэжьынкIэ муниципалитетхэм субсидиехэр аIэкIэгъэхьэгъэнхэр.

Адыгеим и ЛIышъхьэ гъогу­хэм ящынэгъончъа­гъэкIэ къэра­лыгъо инспекциер ягъусэу камерэхэр зыщагъэуцущт чIыпIа­кIэ­хэм ягъэнэфэн епхыгъэ пшъэ­рылъхэр афишIыгъэх. Гъо­­гухэм къатехъухьэрэ тхьамы­кIагъохэм къакIегъэчыгъэнымкIэ ащ мэхьэнэ гъэнэфагъэ иI.

Къэлэ гъогухэм яIы­гъын­кIэ пшъэрылъхэм занэсхэм, ­цIыф-хэм ялъэIу тхылъхэм къа­пкъыры­кIыхэзэ тапэкIи IофшIэнхэр нахь дэгъоу зэрэзэхащэщтхэмкIэ АР-м и ЛIышъхьэ пшъэ­рылъ­хэр афишIыгъэх.

АР-м псэолъэшIынымкIэ иминистрэ игуадзэу Лафышъ Рэмэзан къы­Iотагъ муниципальнэ гъогукIэм игъэпсынкIэ Iофтхьабзэхэу зэра­хьэхэрэм афэгъэ­хьыгъэу. АР-м и ЛIышъхьэ къу­ты­рэу Чернышевым щыпсэухэ­рэм за­IокIэм ащ фэгъэхьыгъэу къелъэ­Iугъагъэх. Хабзэм икъулы­къушIэ­хэм анахьэу анаIэ зытырагъэтын фаер псэупIэ мыинхэ­ми, аужыпкъэм, анахь чыжьэу пэ­Iу­дзыгъэхэми, цIыфхэм яфэшъо­шэ щыIакIэ щаряIэнымкIэ амал дэгъухэр ягъэгъотыгъэнхэр ары.

«Iофтхьабзэхэу итхъухьагъэ­хэм кIэух шъхьаIэу афэхъун фаер гъогухэм къатехъухьэрэ тхьамы­кIагъохэм ыкIи хэкIуа­дэ­хэрэм япчъагъэ нахь макIэ шIы­гъэныр ары. Ащ пае бэ зэшIотхыгъэр, ау ахэм тягупсэфылIэ хъущтэп — джыри пшъэ­рылъыбэ зэшIотхынэу къыт­пыщылъ», — къы­хигъэщыгъ Къум­пIыл Мурат.

АР-м и ЛIышъхьэ ипресс-къулыкъу