Мы тхьамафэм АР-м и Къэралыгъо Совет — Хасэм и Тхьаматэу Владимир Нарожнэр Тэхъутэмыкъое районым щыIагъ.

Парламентым ипресс­-къулыкъу къызэритыгъэмкIэ, мы муниципальнэ образованием иадминистрацие ипащэу Шъэо Аскэр игъусэу Афыпсыпэ псэупIэ коим щыпсэухэ­рэм зэIукIэгъу адыряIагъ. ЗытегущыIагъэхэм ащыщых лъэпкъ проектхэм псэупIэ коир зэрахэлэжьэщтыр, медицинэм ыкIи гъэсэныгъэм яучреж­дениехэм Iоф ащызы­шIэщтхэр зэримыкъухэрэр, адыгабзэм изэгъэшIэн.

Хэбзэгъэуцун IофшIэным епхыгъэу тегущыIагъэх поселкэу Кубань­строир псэупIэхэм ацIэхэр зыдэт Къэралыгъо каталогым «поселок КубанстройкIэ» зэрэдатхагъэм. Ащ фэдэ хэукъоныгъэм цIыфэу ащ дэсхэм Iофыгъохэр къафихьыщтых.

Нэужым мы темэр лъа­гъэкIуатэзэ, Афыпсыпэ псэупIэ коим ыцIэ Шапсыгъэ псэупIэ койкIэ зэблэ­хъужьыгъэныр ащ щы­псэухэрэм игъоу зэралъэ­гъурэм тегущыIагъэх.

— Зэхэсыгъом хэлэ­жьа­гъэ пэпчъ иеплъыкIэ те­дэIугъ. ПсэупIэ коим ыцIэ зэблэхъугъэным игугъу къызашIырэр бэшIагъэ. Муниципалитетым итарихъ, бзэм, лъэпкъ шэн-­хабзэхэм якъэгъэнэжьын игъэкIотыгъэу татегущы­Iагъ. ЦIыфхэм яеплъыкIэ­хэр зэфэшъхьафых, ау мы Iофым иправовой лъэныкъуи, цIэр зэблэхъугъэ зыхъукIэ ащ игъэфедэн къыздихьыщтхэми тызэ­датегущыIэнэу зэдэтштагъэ, — къыIуагъ Тэхъутэ­мыкъое район администрацием ипащэу Шъэо Аскэр.

Афыпсыпэ псэупIэ коим къуаджэхэу Афыпсыпэ, Пэнэхэс, Псэйтыку, Хьащ­тыку ыкIи поселкэу ­Ку­баньстроир хэхьэх. ПстэумкIи нэбгырэ мини 5 щэпсэу, ащ ипроцент 85-р адыгэх, шапсыгъэ субэтносым щыщых.