Зэхэсыгъор зыщыкIогъэ мэфэ дэдэм Къэралыгъо Советым — Хасэм идепутат купэу Владимир Нарожнэр зипащэмрэ Шъэо Аскэррэ Краснодар краим и Северскэ район ит станицэу Новодмитриевскэм кIогъагъэх.

Илъэс 220-кIэ узэкIэIэбэжьмэ Бзыикъо заоу щыIагъэм фэгъэхьыгъэ саугъэтэу мы чIыпIэм щагъэуцугъэм изытет зэгъэшIэгъэныр ары мурадэу яIагъэр.

Заор 1796-рэ илъэсым имэкъуогъу мазэ и 29-м псы­хъоу Бзыикъо икIэй щыкIуагъ. Шапсыгъэ мэкъумэщышIэ фэ­къолIхэмрэ оркъхэмрэ зэрэзэпэуцужьыгъэхэм ар къыпкъырыкIыгъагъ.

БлэкIыгъэ лIэшIэгъум ия 80-рэ илъэсхэм Адыгеим щыщ­хэу Емыж Руслъан, ЛIыIужъу Аскэр ыкIи Бэрэтэрэ Хьисэ кIэщакIо фэхъухи саугъэтыр агъэуцугъ. Мыекъуапэ искульп­торэу Антон Шикоян ащ иавторри, зышIыгъэри.

Новодмитриевскэ псэупIэ коим иадминистрацие ипащэ игуадзэу Наталья Маленковам саугъэтыр зыфэгъэ­хьыгъэ хъу­гъэ-шIагъэм ишIэжь зэрагъэлъапIэрэм къыкIигъэтхъыгъ. Ащ къызэриIуагъэмкIэ, кIэлэ­еджакIохэм яродинэ цIыкIу итарихъ зэрагъашIэзэ, саугъэ­тым дэжь кIохэу бэрэ къыхэ­кIы, чIыпIэу къы­зэлъиубытырэр къэбзэнми анаIэ тет.

— Саугъэтым ыкIи ащ къы­пэIулъ чIыпIэхэм ягъэкIэжьын къыдэлъытэгъэщт Iофтхьабзэ­хэм тызэдатегущыIагъ. Тэхъу­тэмыкъое районымкIэ парламентым идепутатхэр ащ хэлэжьэщтых. КъыткIэхъухьэ­хэ­рэм патриотизмагъэ ахэлъхьэ­гъэныр, тарихъым ыкIи культурнэ кIэным якъызэтегъэнэн тыфэбэнэныр, Пшызэ шъо­лъыррэ Адыгеимрэ ащыпсэурэ лъэпкъхэм азыфагу ныбджэгъуныгъэу илъыр дгъэпытэныр типшъэрылъ шъхьаIэхэм ащыщ, — къыIуагъ АР-м и Къэралы­гъо Совет — Хасэм и Тхьаматэу Владимир Нарожнэм.